കൊള്ളസംഘത്തെ സംരക്ഷിക്കേണ്ട ബാധ്യത ഗവര്ണര്ക്കുണ്ടോ?; മാഫിയകളും മന്ത്രിമാരും തമ്മില് വലിയ വ്യത്യാസമില്ല: പിണറായി
മാഫിയകളെ വെല്ലുന്ന കൊള്ളസംഘമായ മുഖ്യമന്ത്രിയും മന്ത്രിമാരുമടങ്ങുന്ന സര്ക്കാരിനെ സംരക്ഷിക്കേണ്ട ബാധ്യത ഗവര്ണര്ക്കുണ്ടോയെന്ന് സിപിഐ എം പൊളിറ്റ് ബ്യൂറോ അംഗം പിണറായി വിജയന് ചോദിച്ചു. സംസ്ഥാനത്ത് ഒരു ഗവര്ണര്ക്കും ഇത്രയും ഗതികേട് വന്നിട്ടില്ല. ഉമ്മന്ചാണ്ടിയുടെയും സംഘത്തിന്റെയും മാഫിയ ഭരണത്തെ സുവര്ണകാലമെന്ന് വിശേഷിപ്പിക്കേണ്ടി വന്ന ഗവര്ണര്ക്ക് സ്വന്തം മനസാക്ഷിയോട് ഉത്തരം പറയേണ്ടി വരുമെന്നും നവകേരള മാര്ച്ചിന്റെ ഭാഗമായുള്ള വാര്ത്താസമ്മേളനത്തില് പിണറായി പറഞ്ഞു. ചില കുട്ടികള് മാര്ക്ക്ലിസ്റ്റില് സ്വന്തമായി മാര്ക്കെഴുതി പ്രോഗ്രസ് കാര്ഡ് കാണിക്കുന്നത് പോലെയാണ് സര്ക്കാര് നയപ്രഖ്യാപനം നടത്തിയത്. ജനം മാര്ക്കിട്ടാല് സര്ക്കാരിന് പൂജ്യമായിരിക്കും കിട്ടുകയെന്നും പിണറായി പറഞ്ഞു. അഴിമതിക്കാര്ക്കെതിരെ നടപടി എടുത്ത മികച്ച ന്യായാധിപനായിരുന്നു ഗവര്ണറായ പി സദാശിവം. എന്നാലിപ്പോള് അഴിമതിക്കാരെ പുകഴ്ത്തി സംസാരിക്കേണ്ടി വന്ന അദ്ദേഹത്തിന്റെ ഗതികേടില് സഹതാപമുണ്ട്. സ്ത്രീപീഡകര്ക്കെതിരെയും ശക്തമായ നടപടികളാണ് ജസ്റ്റീസായിരിക്കുമ്പോള് കൈകൊണ്ടിട്ടുള്ളത് . സ്ത്രീപീഡകരുടെ കൂടാരമായ സര്ക്കാര് എഴുതികൊടുത്ത കള്ളത്തരങ്ങള് അദ്ദേഹത്തിന് വായിക്കേണ്ടി വന്നു.
ഇവിടെ മാഫിയകളും മന്ത്രിമാരും തമ്മില് വലിയ വ്യത്യാസമില്ല. എത്രകേസുകളാണ് മുഖ്യമന്ത്രിക്കും മന്ത്രിമാര്ക്കും എതിരെയുള്ളത്. സോളാര്,ബാര് കോഴ, പാറ്റൂര്, പാമോലിന്, ടൈറ്റാനിയം അങ്ങിനെ നിരവധി കേസുകള്. അധികാരം ഉപയോഗിച്ച് അതെല്ലാം തേച്ചു മാച്ചു കളയുകയല്ലെ. ഇത്തരക്കാരേ സംരക്ഷിക്കേണ്ട ബാധ്യത ഗവര്ണര്ക്കുണ്ടോ.
അന്വേഷണ ഏജന്സികളെയെല്ലാം സര്ക്കാര് പാവകളാക്കി മാറ്റി. വിജിലന്സിനെയാണ് അത്തരത്തില് ആദ്യം മാറ്റിയത്. ആരോപണ വിധേയരെ രക്ഷിക്കാനാണ് ഉദ്യോഗസ്ഥരോട് ആവശ്യപ്പെടുന്നത്. എസ് പി സുകേശനെതിരായ കേസും ഇത്തരത്തില് കണ്ടാല് മതി. കെ എം മാണിക്കെതിരെ ബിജു രമേശ് കൈമാറിയ സിഡിയിലെ തെളിവ് ശക്തമല്ലെന്നും അതിനാല് നിലനില്ക്കുന്നതല്ലെന്നും ചുണ്ടിക്കാട്ടി സുകേശനെ കൊണ്ട് റിപ്പോര്ട്ട് കൊടുപ്പിച്ച ആളാണ് ശങ്കര് റെഡ്ഡി. ഇപ്പോള് ആ സിഡിയില് പറയന്ന കാര്യങ്ങള് വെച്ചാണ് സുകേശനെതിരെ കേസെടുപ്പിച്ചിട്ടുള്ളതും. അങ്ങിനെയെങ്കില് തമ്പാന്നൂര് രവിക്കെതിരെയും കേസെടുക്കേണ്ടതല്ലെ. കെ ബാബുവിന് അനുകൂലമായി നിശാന്തിനിയെ കൊണ്ട് റിപ്പോര്ട്ട് കൊടുപ്പിക്കുന്നതും ശങ്കര് റെഡ്ഡിയാണ്. അതിനാണ് മൂന്ന് ഡിജിപിമാരെ തഴഞ്ഞ് എഡിജിപിയായ ശങ്കര് റെഡ്ഡിയെ വിജിലിന്സിന്റെ തലപ്പത്ത് കൊണ്ടുവന്നത്.
സോളര് കേസില് ഇന്നലെ സരിത നല്കിയ മൊഴിയില് ശങ്കര് റെഡ്ഡിയുടെ പേരുമുണ്ടല്ലോ. സര്ക്കാരിന് വേണമെന്നുള്ളവരെ സംരക്ഷിക്കാനും അല്ലാത്തവരെ ശിക്ഷിക്കാനുമാണ് അധികാരം ഉപയോഗിക്കുന്നതെന്നും പിണറായി പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
