സുകേശനെതിരായ റിപ്പോര്ട്ട് പൂഴ്ത്തിയത് കെ.എം മാണിയുടെ രാജിക്ക് വേണ്ടിയോ?സുകേശന് ബാര് ഉടമ ബിജു രമേശ് മുഖേന ചോര്ത്തിക്കൊടുത്തെന്ന രഹസ്യ റിപ്പോര്ട്ട് ഒരുവര്ഷത്തിലേറെ സര്ക്കാര് പൂഴ്ത്തിവച്ചു
ബാര് കോഴക്കേസിലെ അന്വേഷണവിവരങ്ങള് എസ്.പി: ആര്. സുകേശന് ബാര് ഉടമ ബിജു രമേശ് മുഖേന ചോര്ത്തിക്കൊടുത്തെന്ന രഹസ്യ റിപ്പോര്ട്ട് ഒരുവര്ഷത്തിലേറെ സര്ക്കാര് പൂഴ്ത്തിവച്ചു. മുന്മന്ത്രി കെ.എം. മാണികോതിരായ ബാര്ക്കോഴ കേസിന്റെ രഹസ്യ മൊഴികളും ഫോണ് സംഭാഷണങ്ങളും പുറത്തായിരുന്നു.
മുന്മന്ത്രി കെ.എം. മാണി പ്രതിയായ കേസില് അന്വേഷണവിവരങ്ങള് ഒന്നൊന്നായി പുറത്തുവരുന്നതിനിടെയാണ് എറണാകുളം ക്രൈംബ്രഞ്ച് എസ്.പിയുടെ രഹസ്യ റിപ്പോര്ട്ട് ആഭ്യന്തരവകുപ്പിനു ലഭിച്ചത്. എന്നാല് മന്ത്രിമാരായ രമേശ് ചെന്നിത്തല, വി.എസ്. ശിവകുമാര് എന്നിവര്ക്കെതിരേ ആരോപണമുയര്ന്നപ്പോള് മാത്രമാണ് ഇതിന്മേല് സുകേശനെതിരേ നടപടിയെടുക്കാന് സര്ക്കാര് തയാറായത്. ബാര്ക്കോഴ കേസില് കോണ്ഗ്രസ്സ് സ്വീകരിച്ച നിലപാട് ഇരട്ട നീതിയായിരുന്നെന്ന് നേരത്തെ വിമര്ശനമുയര്ന്നിരുന്നു. രാജി വച്ച മന്ത്രി ബാബുവിന്റെ രാജി സ്വീകരിക്കാതെ പീന്നിട് മന്ത്രിപദത്തിലേക്ക് തിരികെ വിളിച്ച ഉമ്മന് ചാണ്ടി ഇതേ സാഹചര്യത്തില് കെ.എം. മാണിയുടെ രാജിക്കായി തിടുക്കം കാട്ടി.
വിജിലന്സ് ഡയറക്ടറുടേതു പുതിയ കണ്ടെത്തലാണെന്ന മട്ടിലാണു സുകേശനെതിരേ ഇപ്പോള് അന്വേഷണം പ്രഖ്യാപിച്ചിട്ടുള്ളത്. എന്നാല്, എസ്.പിക്കെതിരേ നടപടിയാവശ്യപ്പെട്ട് ഒരുവര്ഷം മുമ്പു ലഭിച്ച റിപ്പോര്ട്ട് ഇതുവരെ പൂഴ്ത്തിയതു പുതിയ രാഷ്ട്രീയവിവാദങ്ങള്ക്കു വഴിതെളിക്കും.
സുകേശന്റെ നീക്കങ്ങളില് സംശയം തോന്നിയ കേരളാ കോണ്ഗ്രസ് മുന് എം.എല്.എ. ജോസഫ് എം. പുതുശേരി നല്കിയ പരാതിയിലാണു ക്രൈംബ്രഞ്ച് രഹസ്യാന്വേഷണം നടത്തിയത്. 2015 ഫെബ്രുവരി ആറിന് എ.ഡി.ജി.പി: എസ്. ആനന്ദകൃഷ്ണന് എറണാകുളം ക്രൈംബ്രഞ്ച് എസ്.പി. റിപ്പോര്ട്ട് കൈമാറി. ബിജു രമേശും സുകേശനുമായി വഴിവിട്ടബന്ധമുണ്ടെന്നായിരുന്നു റിപ്പോര്ട്ടിന്റെ ഉള്ളടക്കം. ഇതിന്മേല് നടപടി ശിപാര്ശചെയ്ത് എ.ഡി.ജി.പി: ആനന്ദകൃഷ്ണന് ഫയല് കൈമാറി. അന്വേഷണത്തിന്റെ ഓരോഘട്ടത്തിലും ബിജു രമേശിനു സുകേശന് വിവരങ്ങള് ചോര്ത്തിനല്കിയെന്ന് എസ്.പിയുടെ റിപ്പോര്ട്ടില് പറയുന്നു. സുകേശന് അറിയാതെ അദ്ദേഹത്തിന്റെ നീക്കങ്ങള് ക്രൈംബ്രഞ്ച് നിരീക്ഷിച്ചിരുന്നു. ഇരുവരുടെയും ടെലിഫോണ് വിശദാംശങ്ങളും പരിശോധിച്ചു. ഇതേത്തുടര്ന്നാണ് ആഭ്യന്തര അഡീഷണല് ചീഫ് സെക്രട്ടറിക്ക് എ.ഡി.ജി.പി. റിപ്പോര്ട്ട് നല്കിയത്. എന്നാല്, ഈ അന്വേഷണ റിപ്പോര്ട്ട് വെളിച്ചംകണ്ടില്ല. ഇപ്പോള് മറ്റു മന്ത്രിമാരടക്കമുള്ളവര്ക്കെതിരേ ആരോപണങ്ങളുടെ മുന തിരിഞ്ഞതോടെ സുകേശനെതിരേ അന്വേഷണത്തിനു നടപടിയായി. ബാര് കേസുമായി ബന്ധപ്പെട്ട ഗൂഢാലോചന െ്രെകംബ്രാഞ്ച് അന്വേഷിക്കുമെന്നു മന്ത്രി രമേശ് ചെന്നിത്തല വ്യക്തമാക്കി. മന്ത്രിമാരുടെ പേരുകള് വെളിപ്പെടുത്താന് ബിജു രമേശിനെ പ്രേരിപ്പിച്ചെന്നാണു സുകേശനെതിരായ ആരോപണം. അദ്ദേഹത്തെ ഉടന് സസ്പെന്ഡ് ചെയ്യുമെന്നാണു സൂചന. നടപടിക്കു മുന്നോടിയായി വിജിലന്സില്നിന്നു മാറ്റും.
അതെ സമയം ബാര് കോഴക്കേസില് ക്രൈംബ്രാഞ്ച് റിപ്പോര്ട്ട് ആഭ്യന്തര വകുപ്പ് പൂഴ്ത്തിയതിനെക്കുറിച്ച് പ്രതികരിക്കാനില്ലെന്ന് കെ.എം. മാണി പറഞ്ഞു. ഗൂഢാലോചനയുടെ ചുരുളഴിയുകയാണ്. സത്യം ഉടന് പുറത്തുവരുമെന്നും മാണി പറഞ്ഞു. ബിജു രമേശിനൊപ്പം സര്ക്കാരിനെതിരെ ഗൂഢാലോചന നടത്തിയെന്നാരോപിക്കപ്പെടുന്ന എസ്പി ആര്.സുകേശനെതിരെ ക്രൈം ബ്രാഞ്ച് ഒരു വര്ഷം മുമ്പ് നല്കിയ റിപ്പോര്ട്ട് ആഭ്യന്തര വകുപ്പ് പൂഴ്ത്തിവച്ചതായി ഇന്നു വെളിപ്പെട്ടിരിക്കുന്ന സാഹചര്യത്തിലാണ് കെ.എം. മാണിയുടെ മൗനം. കെ.എം.മാണിക്ക് അനുകൂലമായേക്കാവുന്ന റിപ്പോര്ട്ടാണ് പരിഗണിക്കാതിരുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
