കൊല്ലം പുത്തൂരിൽ പതിനാറുകാരിയെ ജ്യോത്സ്യൻ പീഡിപ്പിക്കാൻ ശ്രമിച്ചെന്ന് പരാതി. വെണ്ടാർ സ്വദേശി മുരാരി തന്ത്രി എന്ന രാജൻ ബാബുവിനെതിരെയാണ് പോക്സോ കേസ് എടുത്തിരിക്കുന്നത്. ബാധയൊഴിപ്പിക്കലിനായി അമ്മയ്‌ക്കൊപ്പം എത്തിയതായിരുന്നു പെൺകുട്ടി. ഈ വിഷയത്തിൽ പ്രതികരിച്ച് അഞ്ജു പാർവതി പ്രഭീഷ്. കുറിപ്പിന്റെ പൂർണ്ണ രൂപം ഇങ്ങനെ;-

ഇയാളല്ലേ ആ റീൽസ് ജ്യോൽസ്യൻ. ഗജഫ്രോഡ് ആണെന്ന് മുഖത്ത് എഴുതി വച്ചിട്ടുണ്ട്. ഈ ഇരുപത്തൊന്നാം നൂറ്റാണ്ടിലും കവടി, ബാധ ഒഴിപ്പിക്കൽ, ഭാവി പ്രവചനം എന്നൊക്കെ കേൾക്കുമ്പോൾ ചാടി ഇറങ്ങി ഓടി കാപ്പാത്തുങ്കോ ചാമി എന്നും പറഞ്ഞ് ഇവന്റെയൊക്കെ അടുക്കൽ പോകുന്ന ആളുകളെ പറഞ്ഞാൽ മതിയല്ലോ. ഇയാളെ ആദ്യം കാണുന്നത് അന്ന് പുത്തൂരിൽ ഒരു കുട്ടിയെ തട്ടിക്കൊണ്ട് പോയ സംഭവത്തിൽ പ്രവചനവും ആയിട്ട് വന്നപ്പോഴാണ്. അപ്പോഴേ പറഞ്ഞതാണ് ഇയാളൊരു ഗജ fraud ആണെന്ന്. പക്ഷേ ജ്യോതിഷത്തിനും ജ്യോൽസ്യത്തിനും മുകളിൽ മറ്റൊന്നും ഇല്ലെന്ന് വാദിച്ച കുറേ മരപ്പാഴ് ഫാൻസ്‌ നമ്മളെ പ്രശ്നക്കാരിയാക്കി. സ്വന്തം കുതന്ത്രങ്ങൾ റീൽസ് ആക്കിയ മുരാരി ജ്യോൽസ്യൻ തന്നെ മുൻകൈ എടുത്ത് അതിന് പ്രൊമോഷനും കൊടുത്തു. പിന്നെ റീലോട് റീലുകൾ. അത് കണ്ട് ആളുകൾ പിന്നാലെ കൂടി.അങ്ങനെ ഓട്ടോ ഓടിച്ച് നടന്ന മുരാരി വളർന്നു, ലക്ഷങ്ങൾ സമ്പാദിക്കുന്ന എലൈറ്റ് ജ്യോൽസ്യൻ ആയി.

നമ്മൾ തമ്മിൽ ഷോയിൽ വന്നിരുന്ന് തള്ളൽ കൊണ അടിച്ചത് നമ്മൾ കണ്ടതാണ്. വിശ്വാസം വില്പന ചരക്ക് ആക്കിയ അവന് പണി പാലും വെള്ളത്തിൽ എളുപ്പം കിട്ടി. ചോദ്യം ചോദിച്ചവർക്ക് വലിയ അപകടം സംഭവിക്കാൻ പോകുന്നു എന്ന് ഓൻ പറഞ്ഞപ്പോൾ ഇത്രയും പ്രതീക്ഷിച്ചില്ല. വിദേശ പര്യടനം, സന്താന സൗഭാഗ്യം, ഭാവിപ്രവചനം, ബാധ ഒഴിപ്പിക്കൾ, രോഗം സൗഖ്യമാക്കൽ എന്ന് വേണ്ട സകല കാര്യങ്ങൾക്കും പരിഹാരം thaan എന്ന് വിശ്വസിപ്പിച്ച്, ജനങ്ങളെ മണ്ടന്മാരാക്കി അന്നം കണ്ടെത്തുന്ന പല തരം ഉഡായിപ്പരിൽ കൂടിയ ഐറ്റം ആയിരുന്നു ഇവൻ.

ബാധ ഒഴിപ്പിക്കാൻ അമ്മയ്‌ക്കൊപ്പം എത്തിയ കുട്ടിക്കു നേരെയാണ് ഈ മുരാരി പ്രതി ലെെംഗികാതിക്രമം നടത്തിയത്. അമ്മയെ പുറത്തിരുത്തി പെൺകുട്ടിയെ മുറിയിലേക്ക് കൂട്ടിക്കൊണ്ടുപോയി കടന്നു പിടിക്കുകയായിരുന്നു. പെൺകുട്ടി നിലവിളിച്ച് പുറത്തേക്കോടി. ബഹളം കേട്ട് നാട്ടുകാർ ഓടിയെത്തിയപ്പോഴേക്കും പിൻവാതിലിലൂടെ ജോത്സ്യൻ കടന്നുകളഞ്ഞു. ഇപ്പൊ കേരള പോലീസ് ഇവനെ തപ്പി ഇറങ്ങിയിട്ടുണ്ട്. കിട്ടി കഴിഞ്ഞാൽ അവന്റെ സമയം അവര് നോക്കിക്കൊള്ളും.

അവനവന്റെ ഉള്ളിലുള്ള ഊർജ്ജം, അതിനെ ഏറ്റവും പോസിറ്റീവ് ആയിട്ട് വിനിയോഗിക്കാൻ കഴിഞ്ഞാൽ ഏതൊരാൾക്കും വിജയിക്കാൻ കഴിയും. അതിന് ആദ്യം വേണ്ടത് അവനവനിൽ ഉള്ള വിശ്വാസം തന്നെയാണ്. സെൽഫ് ലവ്, സെൽഫ് റെസ്‌പെക്ട്, സെൽഫ് കോൺഫിഡൻസ് ഇത് മൂന്നും ഉണ്ടെങ്കിൽ നമുക്ക് മുന്നിൽ ഉള്ള ഏതൊരു പ്രശ്നത്തെയും തരണം ചെയ്യാൻ നമുക്ക് കഴിയും. അതിന് ഈ പ്രപഞ്ചം കൂട്ട് നില്ക്കും. ഒപ്പം നമ്മൾ വിശ്വസിക്കുന്ന പ്രപഞ്ച ശക്തികളും. അത്രേയുള്ളൂ. ഈ തിരിച്ചറിവ് ഓരോരുത്തർക്കും ഉണ്ടാവുമ്പോൾ അന്ന് തീരും ഇത്തരം ഉഡായിപ്പുകളുടെ മുതലെടുപ്പ്..