പ്രശസ്ത കവിയും ഗാനരചയിതാവുമായ മുരുകൻ കാട്ടാക്കടയുടെ കണ്ണട എന്ന കവിതയുടെ 25 വർഷം തികയുന്നതിന്റെ  ഭാഗമായി നടക്കുന്ന രജതജൂബിലി ആഘോഷങ്ങൾ അദ്ദേഹത്തിന്റെ ജന്മദേശമായ കുച്ചപ്പുറം ക്രൈസ്റ്റ് നഗർ സെൻട്രൽ സ്കൂൾ അങ്കണത്തിൽ വിവിധ കലാ പരിപാടികളോട് കൂടി 2026 ഫെബ്രുവരി 11 ന് അരങ്ങേറുന്നു.  റൈസിംഗ് സ്റ്റാർ ഗ്രന്ഥശാലയുടെ വജ്ര ജൂബിലി ആഘോഷങ്ങളുടേയും, കണ്ണടയുടെ ഒരുവർഷം നീണ്ടുനിൽക്കുന്ന രജതജൂബിലി ആഘോഷങ്ങളുടേയും ഔപചാരികമായ ഉദ്ഘാടനം ബഹുമാനപ്പെട്ട കേരള മുഖ്യമന്ത്രി പിണറായി വിജയൻ നിർവ്വഹിക്കും. സാംസ്‌കാരിക വകുപ്പ് മന്ത്രി സജി ചെറിയാൻ അദ്ധ്യക്ഷത വഹിക്കും. മുഖ്യാതിഥി എം. വി. ഗോവിന്ദൻ മാസ്റ്റർ, എം.ൽ.എ മാരായ ഐ.ബി.സതീഷ്, വി.ജോയ്, കടകംപള്ളി സുരേന്ദ്രൻ, ജി.സ്റ്റീഫൻ എന്നിവരും, കാട്ടാക്കട ഗ്രാമ പഞ്ചായത്ത് പ്രസിഡന്റ് വി.ജെ.സുനിത, ദിവ്യ.എസ്. അയ്യർ ഐ.എ.എസ്, പി.വിജയൻ ഐ.പി.എസ്, സൂര്യ കൃഷ്ണമൂർത്തി, ശ്രീകണ്ഠൻ നായർ, ടി. കെ രാജീവ്‌ കുമാർ, എം.ജയചന്ദ്രൻ, എം.വി.നികേഷ്‌ കുമാർ, സന്തോഷ്‌ ജോർജ്ജ് കുളങ്ങര  എന്നിവരും സന്നിഹിതരായിരിക്കും.

        തദവസരത്തിൽ മുരുകൻ കാട്ടാക്കടയുടെ പരസ്പരം എന്ന നവകേരള ഗാനം, പ്രശസ്ത പിന്നണി ഗായകനും സംഗീതസംവിധായകനുമായ ജാസി ഗിഫ്റ്റിന്റെ നേതൃത്വത്തിൽ സിനിമ പിന്നണി ഗായകരുടെ സംഘം ആലപിക്കും. തുടർന്ന് ആറുമണി മുതൽ മുരുകൻ കാട്ടാക്കടയുടെ സർഗ്ഗ സഞ്ചാരങ്ങൾ കോർത്തിണക്കിക്കൊണ്ട് പ്രശസ്ത നാടക ചലച്ചിത്ര സംവിധായകനും ഭാരത് ഭവൻ മെമ്പർ സെക്രട്ടറിയുമായ ഡോ. പ്രമോദ് പയ്യന്നൂർ അണിയിച്ചൊരുക്കുന്ന ഡാൻസിങ് പോയട്രി മൾട്ടിമീഡിയ മെഗാഷോ അരങ്ങേറും. വേദിയിൽ 100 ഓളം കലാകാരന്മാർക്കൊപ്പം മാർഗി ഉഷ, റിഗാറ്റ ഗിരിജ, സിതാര ബാലകൃഷ്ണൻ,  അലൈന ജാസ്മിൻ, സൈദ് സബർമതി എന്നീ പ്രശസ്ത കലാ പ്രതിഭകളും, കലാഞ്ജലി സ്കൂൾ ഓഫ് ഡാൻസ്, ഷൈജു ഷാഡോസ് എന്നിവരുടെ  നൃത്തച്ചുവടുകളും മാറ്റുരയ്ക്കും.

 ഫോട്ടോ അടിക്കുറിപ്പ് :

ഡാൻസ് പൊയട്രി മൾട്ടി മീഡിയ മെഗാ ഷോയിൽ കണ്ണട കവിതയുടെ ദൃശ്യവിഷ്ക്കാര പരിശീലനത്തിൽ നിന്ന്.