കണ്ണീരടക്കാവാതെ.... നാട്ടിൽ നിന്ന് മാതാവിനോടൊപ്പം പിതാവിന്റെയടുത്ത് എത്തിയ പിഞ്ചുബാലൻ വാഹനാപകടത്തിൽ മരിച്ചു. മലപ്പുറം ചട്ടിപ്പറമ്പ് നെല്ലോളി സ്വദേശി ഷറഫുദ്ദീന്റെയും സഫ്‌നയുടെയും മകൻ അലൻ റൂമിയാണ് (2) ഷാർജയിലുണ്ടായ അപകടത്തിൽ മരിച്ചത്.

തലാൽ ഗ്രൂപ്പ് ജീവനക്കാരനായ ഷറഫുദ്ദീനെ കാണാനായി കഴിഞ്ഞ മാസം 18-നാണ് അലൻ ഉമ്മയോടൊപ്പം സന്ദർശക വീസയിൽ ഷാർജയിലെത്തിയത്.

സന്തോഷം നിറഞ്ഞുനിൽക്കേണ്ട സന്ദർശനകാലയളവ് തീരുംന്നതിനു മുൻപേ വിധി ദുരന്തമായി എത്തുകയായിരുന്നു. ബുധനാഴ്ച വൈകുന്നേരം താമസസ്ഥലത്തിന് സമീപം കാറിടിച്ചാണ് അപകടം സംഭവിച്ചത്.

മകനൊപ്പമുള്ള മനോഹരമായ നിമിഷങ്ങൾക്കായി കാത്തിരുന്ന ഷറഫുദ്ദീനും കുടുംബത്തിനും അലന്റെ വേർപാട് താങ്ങാവുന്നതിലും അധികമായി. നിയമനടപടികൾ പൂർത്തിയാക്കിയ ശേഷം വ്യാഴാഴ്ച മുഹൈസിന ഖബർസ്ഥാനിൽ മൃതദേഹം സംസ്കരിക്കുകയും ചെയ്തു.