എസ് ഡി കോളേജ് പരീക്ഷാ വിവാദത്തില് പ്രതികരിച്ച് കോളേജ് പ്രിന്സിപ്പല്
എസ് ഡി കോളേജിലെ പരീക്ഷാ നടത്തിപ്പിലെ വീഴ്ചയില് പ്രതികരിച്ച് കോളേജ് പ്രിന്സിപ്പല് ഡോ. വി ആര് പ്രഭാകരന് നായര്. വീഴ്ച സംഭവിച്ചിട്ടില്ലെന്നും ഇപ്പോള് നടക്കുന്ന പ്രതിഷേധങ്ങള് കോളേജിലെ കുളം നികത്തലുമായി ബന്ധപ്പെട്ടതാണെന്നുമാണ് പ്രിന്സിപ്പലിന്റെ വിശദീകരണം.മൂല്യനിര്ണയം തുടങ്ങിയപ്പോള് തന്നെ ചോദ്യപേപ്പറിന്റെ കോഡ് മാറിയത് കണ്ടെത്തിയിരുന്നുവെന്ന് പ്രിന്സിപ്പല് വ്യക്തമാക്കി. വിവരം സര്വകലാശാലയെ അറിയിക്കുകയും ചെയ്തു. തുടര്നടപടികള് സ്വീകരിക്കേണ്ടത് സര്വകലാശാലയാണെന്നും പ്രിന്സിപ്പല് ചൂണ്ടിക്കാട്ടി.
സപ്ളിമെന്ററി പരീക്ഷയുടെ ചോദ്യപേപ്പറും റെഗുലര് പരീക്ഷയുടെ ചോദ്യപേപ്പറും മാറി നല്കിയതാണ് പ്രശ്നങ്ങള്ക്കിടയാക്കിയത്. വീഴ്ചയുണ്ടായതിന് പിന്നാലെ പരീക്ഷാഫലം കേരള സര്വകലാശാല തടഞ്ഞു. ഇതില് പ്രതിഷേധിച്ചാണ് എസ്എഫ്ഐ കോളേജില് സമരം നടത്തിയത്.
ഒന്നാം സെമസ്റ്റര് പരീക്ഷയുടെ ചോദ്യപേപ്പറാണ് മാറി നല്കിയത്. സപ്ളിമെന്ററി പരീക്ഷയ്ക്കെത്തിയവര്ക്ക് റെഗുലര് പരീക്ഷയുടെ ചോദ്യപേപ്പറും റെഗുലര് പരീക്ഷയ്ക്കെത്തിയവര്ക്ക് സപ്ളിമെന്ററിയുടെ ചോദ്യപേപ്പറും നല്കുകയായിരുന്നു. ഡിസംബര് അവസാനവും ജനുവരി ആദ്യവുമാണ് പരീക്ഷകള് നടന്നത്. ഫെബ്രുവരി നാലുമുതല് ഫലം വന്നുതുടങ്ങി. എന്നാല് ചോദ്യപേപ്പര് കോഡ് മാറിയ പരീക്ഷകളുടെ ഫലം വന്നില്ല.
അദ്ധ്യാപകര് തെറ്റായ ചോദ്യപേപ്പര് നല്കിയതിനാലാണ് കോഡ് മാറിയത്. കോഡ് മാറിയതോടെ സര്വകലാശാല പരീക്ഷാഫലം തടയുകയായിരുന്നു. ഇതോടെയാണ് പിഴവുണ്ടായതായി കണ്ടെത്തിയത്. പിന്നാലെ കോളേജ് അധികൃതരുടെ പിഴവിനെത്തുടര്ന്ന് പരീക്ഷാഫലം സര്വകലാശാല തടഞ്ഞതില് പ്രതിഷേധിച്ച് വിദ്യാര്ത്ഥികള് രംഗത്തെത്തുകയായിരുന്നു.
https://www.facebook.com/Malayalivartha
