കേരളം ആസ്ഥാനമായ പ്രമുഖ ബാങ്കിതര ധനകാര്യ സ്ഥാപനമായ മണപ്പുറം ഫിനാന്‍സിന്റെ 46.66 ശതമാനം ഓഹരികള്‍ ഏറ്റെടുക്കാന്‍ യുഎസ് ഇക്വിറ്റി സ്ഥാപനമായ ബെയ്ന്‍ ക്യാപിറ്റലിന് ആര്‍ബിഐ അനുമതി. ബെയ്ന്‍ ക്യാപിറ്റലിന്റെ രണ്ട് അനുബന്ധ സ്ഥാപനങ്ങള്‍ വഴിയാണ് ഏറ്റെടുക്കലെന്നും മണപ്പുറം അറിയിച്ചു.

കഴിഞ്ഞ വര്‍ഷം മാര്‍ച്ച് 20ന് ഒപ്പിട്ട ധാരണ പ്രകാരം, ബെയ്ന്‍ ക്യാപിറ്റല്‍ ഏകദേശം 4,835 കോടി രൂപയാണ് മണപ്പുറം ഫിനാന്‍സില്‍ നിക്ഷേപിക്കുക. ഓഹരിയൊന്നിന് 236 രൂപയാണ് നിശ്ചയിച്ചിരിക്കുന്നത്. പ്രിഫറന്‍ഷ്യല്‍ അലോട്ട്‌മെന്റിലൂടെയാണ് ഏറ്റെടുക്കല്‍. കൂടാതെ പൊതു ഓഹരി ഉടമകളില്‍ നിന്ന് ഓപ്പണ്‍ ഓഫറിലൂടെ 26 ശതമാനം ഓഹരികളും ബെയ്ന്‍ ക്യാപിറ്റല്‍ ഏറ്റെടുക്കും. ഇതിനും ഓഹരിയൊന്നിന് 236 രൂപയാണ് വില. ഇതോടെ മണപ്പുറം ഫിനാന്‍സിന്റെ പ്രൊമോട്ടര്‍ പദവിയും ബെയ്ന്‍ ക്യാപിറ്റലിന് ലഭിക്കും. നിലവിലെ പ്രൊമോട്ടര്‍മാര്‍ക്കൊപ്പം കമ്പനിയുടെ നിയന്ത്രണ കാര്യങ്ങളില്‍ ഇടപെടാനും അധികാരമുണ്ടാകും.

കമ്പനിയുടെ ഡയറക്ടര്‍ ബോര്‍ഡ് ഇതനുസരിച്ച് പുനസംഘടിപ്പിക്കുമെന്നും മണപ്പുറം ഫിനാന്‍സ് അറിയിച്ചു. ഏറ്റെടുക്കല്‍ ധാരണ പ്രകാരം ഡയറക്ടര്‍ ബോര്‍!ഡില്‍ ബെയ്ന്‍ ക്യാപിറ്റലിന്റെ നോമിനിയെ നിയോഗിക്കേണ്ടതുണ്ട്. നിലവിലെ പ്രൊമോട്ടര്‍മാരുടെ വിഹിതം 28.9 ശതമാനമായിരിക്കും.

ബെയ്ന്‍ ക്യാപിറ്റല്‍ പങ്കാളിയായി എത്തുന്നതോടെ കമ്പനിയുടെ വളര്‍ച്ച വേഗത്തിലാകുമെന്ന് മണപ്പുറം ഫിനാന്‍സ് എംഡിയും സിഇഒയുമായ വി.പി. നന്ദകുമാര്‍ പറഞ്ഞു. സാങ്കേതികവിദ്യയിലും റിസ്‌ക് മാനേജ്‌മെന്റിലും കൂടുതല്‍ നിക്ഷേപം നടത്താനും നീക്കം സഹായിക്കുമെന്നും അദ്ദേഹം പറഞ്ഞു.

അതേസമയം, ഡിസംബറില്‍ അവസാനിച്ച മൂന്നാം പാദത്തില്‍ സമ്മിശ്രമായ പാദഫലമാണ് മണപ്പുറം ഫിനാന്‍സ് പുറത്തുവിട്ടത്. ഇന്ത്യയിലെ ഏറ്റവും വലിയ സ്വര്‍ണപണയ സ്ഥാപനങ്ങളിലൊന്നായ മണപ്പുറം 381 കോടി രൂപയുടെ ലാഭമാണ് മൂന്നാം പാദത്തില്‍ നേടിയത്. മുന്‍വര്‍ഷത്തെ മൂന്നാം പാദത്തിലെ 453 കോടി രൂപ ലാഭത്തില്‍ നിന്ന് 15.9 ശതമാനം കുറവാണിത്. അറ്റ പലിശ വരുമാനം മുന്‍വര്‍ഷത്തേക്കാള്‍ 0.9 ശതമാനം മാത്രം കുറഞ്ഞ് 1,150 കോടി രൂപയായി. കമ്പനിയുടെ പ്രവര്‍ത്തന വരുമാനം മുന്‍വര്‍ഷത്തേക്കാള്‍ 6.5 ശതമാനം വര്‍ധിച്ച് 1,915.35 കോടി രൂപയിലെത്തി.