ശബരിമല സ്വർണ്ണക്കൊള്ള കേസിൽ നടൻ ജയറാം ഇന്ന് ഇ ഡിക്ക് മുന്നിൽ ഹാജരാകുമ്പോൾ കേരളം ഉറ്റുനോക്കുന്നത് ഒരേയൊരു കാര്യമാണ്... പ്രിയ താരം ഈ കേസിൽ കുടുങ്ങുമോ അതോ നിരപരാധിത്വം തെളിയിക്കുമോ? ചോദ്യം ചെയ്യലിന് ഹാജരാകണമെന്ന് കാണിച്ച് ഇഡി നോട്ടീസ് അയച്ചതിന് പിന്നാലെ എൻഫോഴ്സ്‌മെന്റ് ഡയറക്‌ടറേറ്റിന് (ഇ ഡി) മുന്നിൽ നടൻ ഹാജരായി. കടവന്ത്രയിലെ ഓഫീസിലാണ് താരം ഹാജരായത്.

പറയാനുള്ളതെല്ലാം ഇഡിയോട് പറയുമെന്നും ജയറാം മാദ്ധ്യമങ്ങളോട് പറഞ്ഞു. 'കുടുങ്ങാനുള്ളവരെല്ലാം കുടുങ്ങട്ടെ, കള്ളത്തരം കാണിച്ചവരെ അയ്യപ്പൻ വെറുതെ വിടുമോ? നടന്ന സംഭവങ്ങളുടെ സത്യാവസ്ഥ പുറത്തുവരണം.

50 വർഷമായി ഞാൻ ശബരിമലയിൽ മുടങ്ങാതെ പോകുന്നു. ഉണ്ണികൃഷ്ണൻ പോറ്റി വന്നപ്പോൾ ഒരു ഭക്തൻ എന്ന നിലയിലാണ് സൗകര്യം ഒരുക്കിയത്. അതിനപ്പുറം ഉണ്ണികൃഷ്ണൻ പോറ്റിയുമായി ഒരു ബന്ധവുമില്ല. ശബരിമലയിൽ മാത്രമല്ല മറ്റ് പല ക്ഷേത്രങ്ങളിലും അതിഥിയായി പോയിട്ടുണ്ട്. ശബരിമല കേസിൽ സത്യം പുറത്തുവരണം'- ജയറാം വ്യക്തമാക്കി.