നിവിന്‍ പോളി നായകനായ 'ആക്ഷന്‍ ഹീറോ ബിജു' സിനിമയില്‍ ശ്രദ്ധേയ വേഷം ചെയ്ത 'അല്‍കു' എന്ന ഷഫീഖ് 52 ലീറ്റര്‍ മദ്യവുമായി എക്‌സൈസിന്റെ പിടിയില്‍. ഇതില്‍ 15 ലീറ്റര്‍ ഇന്ത്യന്‍ നിര്‍മിത വിദേശ മദ്യവും 58 ബോട്ടില്‍ (37.7 ലീറ്റര്‍) ബീയറുമാണ്. രാത്രി 12 മണിക്കു ശേഷം ആവശ്യക്കാര്‍ക്ക് മദ്യം എത്തിച്ചു നല്‍കിയിരുന്ന ഇയാളെ എറണാകുളം എക്‌സൈസ് റേഞ്ച് ഇന്‍സ്‌പെക്ടറുടെ നേതൃത്വത്തില്‍ നടത്തിയ പരിശോധനയിലാണ് പിടികൂടിയത്.

തിരൂരങ്ങാടി സ്വദേശിയായ ഷെഫീഖ് നിരവധി സിനിമകളില്‍ ജൂനിയര്‍ ആര്‍ട്ടിസ്റ്റായി അഭിനയിച്ചിട്ടുണ്ട്. മദ്യവില്‍പനയിലൂടെ ലഭിച്ച പേരായിരുന്നു 'അല്‍കു'. എറണാകുളം ടൗണില്‍ രാത്രി മദ്യം ആവശ്യമുള്ളവരെ കണ്ടെത്തി അവര്‍ക്ക് സ്വന്തം വാഹനത്തില്‍ മദ്യം എത്തിച്ചു നല്‍കുകയായിരുന്നു അല്‍കു ചെയ്തിരുന്നത്. ഇതിനുപയോഗിച്ച കാറും എക്‌സൈസ് സംഘം കണ്ടെത്തി.

അനുശ്രീ നായികയായ ഓട്ടോര്‍ഷ എന്ന ചിത്രത്തിലൂടെയാണ് ഷഫീഖ് സിനിമയിലെത്തിയത്. പെറ്റി അടിക്കുന്നതിനിടെ പൊലീസ് ഉദ്യോഗസ്ഥനെ ചേര്‍ത്ത് നിര്‍ത്തി ഇയാള്‍ സെല്‍ഫി പകര്‍ത്തിയിരുന്നു. സമൂഹമാധ്യത്തില്‍ പങ്കുവച്ച ഈ ചിത്രം വൈറലായതിനെ തുടര്‍ന്നാണ് സിനിമയില്‍ അവസരം കിട്ടിയത്.