അയർലൻഡിൽ മലയാളി യുവാവിനെ വീടിനുള്ളിൽ മരിച്ച നിലയിൽ കണ്ടെത്തിയ സംഭവത്തിൽ ഞെട്ടൽ വിട്ടുമാറാതെ മാതാപിതാക്കളടങ്ങുന്ന കടുംബം. പാലക്കാട്‌ നിന്നും കർണാടകയിലെ മംഗലാപുരത്തിന് സമീപം ദക്ഷിണ കർണാടക ജില്ലയിൽ ഉൾപ്പെടുന്ന കഡബയിലേക്ക് കുടിയേറിയ മലയാളി കുടുംബത്തിലെ അംഗവും കുട്ടൂർപാഡൈ സ്വദേശിയുമായ സാൻജോ സുനിൽ (31) ആണ് വീടിനുള്ളിൽ ചൊവ്വാഴ്ച വൈകിട്ട് 6.30 യോടെ തൂങ്ങി മരിച്ച നിലയിൽ കാണപ്പെട്ടത്.2025 ജനുവരി 9ന് നടന്ന വിവാഹത്തിന് ശേഷം ഇക്കഴിഞ്ഞ ജനുവരി 20നാണ് സാൻജോ ഡിപ്പെൻഡൻഡ് വീസയിൽ അയർലൻഡിലെ ഫിൻഗ്ലാസിൽ എത്തുന്നത്.

രണ്ട് വർഷം മുൻപ് അയർലൻഡിലെ സ്വകാര്യ കെയർഹോമിൽ നഴ്സായി ജോലി ലഭിച്ചെത്തിയ ഭാര്യ ലിഷ്മ ഫിലിപ്പിന് ഒപ്പമായിരുന്നു താമസം. ഇരുവരും 10 വർഷത്തെ പ്രണയത്തിനൊടുവിലാണ് വിവാഹിതരായത്. ഇവർ നാട്ടിൽ അടുത്തടുത്ത് താമസിച്ചിരുന്നവരും വിമലഗിരി സെന്റ് മേരീസ് മലങ്കര സിറിയൻ കത്തോലിക്കാ ചർച്ചിലെ അംഗങ്ങളുമാണ്.ഒരേ നാട്ടിലെ അടുത്തറിയുന്ന രണ്ടു ചെറുപ്പക്കാര്‍ ആയിരുന്നു സാന്‍ജോയും ലീഷ്മയും.  പ്രണയദിനത്തില്‍ പോസ്റ്റ് ചെയ്ത ചിത്രത്തിന് വീട്ടുകാരുടെയും പ്രിയപ്പെട്ടവരുടെയും ഒക്കെ സ്‌നേഹം ലൈക്കുകള്‍ ആയി എത്താന്‍ പോലും സമയം നല്‍കും മുന്‍പേ മൂന്നു നാള്‍ കഴിഞ്ഞപ്പോഴേക്കും

സാന്‍ജോ ഈ ലോകത്തില്ല എന്ന നടുക്കുന്ന വാര്‍ത്തയാണ് ഏവരെയും തേടിയെത്തിയത്. ഇപ്പോള്‍ ആ ചിത്രത്തിന് താഴെ തന്നെയാണ് പ്രിയ കൂട്ടുകാര്‍ ഓരോരുത്തരായി എന്ത് പറ്റി, വിശ്വസിക്കാനാകുന്നില്ലല്ലോ എന്ന വാക്കുകളുമായി ആദരാഞ്ജലി അര്‍പ്പിക്കാന്‍ എത്തുന്നത്.സാൻജോ ഏതോ ഒരു ദുർബലനിമിഷത്തിൽ ചെയ്ത ആത്മഹത്യയ്ക്ക് കാരണങ്ങൾ കണ്ടെത്താൻ കഴിഞ്ഞിട്ടില്ലെങ്കിലും സംഭവം ഇനിയും ഉൾക്കൊള്ളാൻ കഴിയാത്ത അവസ്ഥയിലാണ് നാട്ടിൽ സാൻജോയുടെയും ലിഷ്മയുടെയും മാതാപിതാക്കൾ.