ഇനി ചെറിയ ഉള്ളി ചേർത്തുള്ള കറികൾ ഹോട്ടലുകളിൽ കിട്ടാൻ പ്രയാസമാകും. ചെറിയ ഉള്ളി വാങ്ങാൻ ഇനി പോക്കറ്റ് കാലിയാകുന്ന അവസ്ഥ! കേരളത്തിലെ വിപണിയിൽ ചെറിയ ഉള്ളിയുടെ വില കുതിച്ചുയർന്ന് കിലോയ്ക്ക് 150 രൂപയും കടന്നതോടെ സാധാരണക്കാരുടെ കുടുംബ ബജറ്റിന് വീണ്ടും തിരിച്ചടി. സവാളയേക്കാൾ വില കൂടുതലുള്ള ചെറിയ ഉള്ളി ഇപ്പോൾ പല വീടുകളിലും അളന്നുമുറിച്ചാണ് വാങ്ങുന്നത്. ഹോട്ടലുകളെയും ഭക്ഷ്യവ്യാപാര മേഖലയെയും വിലക്കയറ്റം ബാധിക്കുമെന്ന ആശങ്കയും ശക്തമാണ്.

കേരളത്തിൽ ചെറിയ ഉള്ളിയുടെ വില ഇത്രത്തോളം ഉയരാൻ കാരണം എന്താണ്? തമിഴ്നാട്ടിൽ നിന്നാണോ പ്രധാനമായും കേരളത്തിലേക്ക് ഉള്ളി എത്തുന്നത്? ഉൽപ്പാദനത്തിലുണ്ടായ കുറവും കാലാവസ്ഥാ വ്യതിയാനവും വിപണിയിലെ ലഭ്യതക്കുറവും വിലക്കയറ്റത്തിന് കാരണമായിട്ടുണ്ടോ? ഈ ചോദ്യങ്ങളാണ് ഇപ്പോൾ ഉപഭോക്താക്കൾക്കിടയിൽ ഉയരുന്നത്.

ചെറിയ ഉള്ളിയുടെ വിലക്കയറ്റത്തിന് പിന്നിൽ തമിഴ്നാട്ടിലെ മഴയും വിളവെടുപ്പ് പ്രതിസന്ധിയും. കോയമ്പത്തൂരിനും പൊള്ളാച്ചിക്കും സമീപമുള്ള പ്രധാന കൃഷിമേഖലകളിൽ കനത്ത മഴ പെയ്തതോടെ പുതിയ ഉള്ളിയുടെ വിളവെടുപ്പ് വൈകുകയാണ്. ഇതോടെ കേരളത്തിലേക്കുള്ള ചെറിയ ഉള്ളിയുടെ വരവ് കുറഞ്ഞു. വിപണിയിൽ പഴയ സ്റ്റോക്കിനെ ആശ്രയിക്കേണ്ടിവന്നതാണ് വില കുതിച്ചുയരാൻ പ്രധാന കാരണമായി വ്യാപാരികൾ ചൂണ്ടിക്കാട്ടുന്നത്.

കേരളത്തിലേക്ക് ചെറിയ ഉള്ളി പ്രധാനമായും എത്തുന്നത് തമിഴ്നാട്ടിൽ നിന്നാണ്. തിരുപ്പൂർ, കോയമ്പത്തൂർ, പൊള്ളാച്ചി, നാമക്കൽ തുടങ്ങിയ മേഖലകളാണ് പ്രധാന വിതരണ കേന്ദ്രങ്ങൾ. അവിനാശിപാളയം, പാലന്തുറൈ, ആനമലൈ, വരപ്പട്ടി തുടങ്ങിയ പ്രദേശങ്ങളിൽ നിന്നുള്ള ഉള്ളി പൊള്ളാച്ചി വിപണിയിലെത്തിച്ചാണ് കേരളത്തിലേക്കും വിതരണം ചെയ്യുന്നത്. തമിഴ്നാട്ടിലെ തിരുച്ചി, പെരമ്പലൂർ, ധാരാപുരം തുടങ്ങിയ മേഖലകളും ചെറിയ ഉള്ളിയുടെ പ്രധാന ഉൽപ്പാദന കേന്ദ്രങ്ങളാണ്. കർണാടകയിൽ നിന്നും ചെറിയ ഉള്ളി വിപണിയിലെത്തുന്നുണ്ട്.

മഴ കാരണം കൃഷിയിടങ്ങളിൽ നിന്ന് വിളവെടുക്കാൻ കഴിയാത്തതും വിളവെടുത്ത ഉള്ളി വിപണിയിലെത്തിക്കുന്നതിലെ തടസ്സങ്ങളും ലഭ്യതയെ ബാധിച്ചിട്ടുണ്ട്. തമിഴ്നാട്ടിലെ പ്രധാന മൊത്തവിപണികളിൽ ചെറിയ ഉള്ളിയുടെ വരവ് ഗണ്യമായി കുറഞ്ഞതായി വ്യാപാരികൾ പറയുന്നു. തിരുച്ചി ഗാന്ധി മാർക്കറ്റിൽ സാധാരണ ദിവസം 300 ടണ്ണോളം ചെറിയ ഉള്ളി എത്തിയിരുന്ന സ്ഥാനത്ത് ഇപ്പോൾ 150 മുതൽ 200 ടൺ വരെയാണ് എത്തുന്നത്. അതായത് വരവിൽ പകുതിയോളം കുറവ്. ആവശ്യത്തിന് ചരക്ക് ലഭിക്കാതായതോടെ മൊത്തവിലയും ഉയർന്നു. ഇതിന്റെ പ്രതിഫലനമാണ് കേരളത്തിലെ ചില്ലറ വിപണിയിലും കാണുന്നത്.

ഇതിനിടെ വലിയ ഉള്ളിയുടെ വിലയിൽ ഇത്രയും വർധനയില്ലെന്നതും ശ്രദ്ധേയമാണ്. കേരളത്തിലെ ചില വിപണികളിൽ വലിയ ഉള്ളി കിലോയ്ക്ക് 60 രൂപയോടടുത്ത് ലഭിക്കുമ്പോൾ ചെറിയ ഉള്ളിയുടെ വില 150 രൂപ കടന്നിരിക്കുകയാണ്. ചെറിയ ഉള്ളിയുടെ ലഭ്യതക്കുറവ് തന്നെയാണ് ഈ വിലവ്യത്യാസത്തിന് പ്രധാന കാരണം. കേരള സർക്കാരിന്റെ വിലവിവരമനുസരിച്ച് നവംബർ അഞ്ചിന് ആലപ്പുഴയിൽ ചെറിയ ഉള്ളിയുടെ വില കിലോയ്ക്ക് 130 രൂപയായിരുന്നു. അതായത് ജില്ലകൾക്കും വിപണികൾക്കും അനുസരിച്ച് വിലയിൽ വ്യത്യാസമുണ്ട്.

ദീപാവലി ഉൾപ്പെടെയുള്ള ഉത്സവകാലത്തെ അധിക ആവശ്യവും വിലക്കയറ്റത്തിന് ആക്കം കൂട്ടിയിട്ടുണ്ട്. എന്നാൽ പുതിയ വിളവെടുപ്പ് ആരംഭിച്ച് കൂടുതൽ ചരക്ക് വിപണിയിലെത്തുന്നതോടെ വില കുറയുമെന്നാണ് വ്യാപാരികളുടെ പ്രതീക്ഷ. ഒന്നോ രണ്ടോ ആഴ്ചയ്ക്കുള്ളിൽ പുതിയ ഉള്ളിയുടെ വരവ് വർധിച്ചാൽ വില കിലോയ്ക്ക് 80 രൂപയിലേക്ക് താഴാൻ സാധ്യതയുണ്ടെന്നാണ് വ്യാപാരികൾ പറയുന്നത്. എന്നാൽ മഴ തുടർന്നാൽ ഈ പ്രതീക്ഷയും വൈകിയേക്കാം.

സാമ്പാറിനും തീയലിനും ചമ്മന്തിക്കുമെല്ലാം ഒഴിച്ചുകൂടാനാകാത്ത ചെറിയ ഉള്ളിയുടെ വിലക്കയറ്റം വീട്ടമ്മമാരെയും ഹോട്ടൽ മേഖലയെയും ഒരുപോലെ പ്രതിസന്ധിയിലാക്കുകയാണ്. വില കുറയുമെന്ന പ്രതീക്ഷയിൽ കാത്തിരിക്കുകയല്ലാതെ ഇപ്പോൾ ഉപഭോക്താക്കൾക്ക് മുന്നിൽ മറ്റ് വഴികളില്ല.