അമേരിക്കൻ പ്രസിഡന്റ് ഡോണൾഡ് ട്രംപിന് രാഷ്ട്രീയമായി കനത്ത തിരിച്ചടി നേരിട്ടതോടെ ആ അവസരം മുതലെടുത്ത് ഇറാന്റെ വമ്പൻ നീക്കം! യുദ്ധം അവസാനിപ്പിക്കണമെങ്കിൽ അമേരിക്ക തങ്ങളുടെ ഏഴ് കടുത്ത ആവശ്യങ്ങൾ അംഗീകരിക്കണമെന്നാണ് ഇറാന്റെ നിലപാട്. ട്രംപിന്റെ രാഷ്ട്രീയ പരാജയം ഇറാന് നൽകിയത് പുതിയ ആത്മവിശ്വാസം. അമേരിക്കയെ സമ്മർദത്തിലാക്കുന്നതിനൊപ്പം ഹോർമുസ് കടലിടുക്കിന്റെ നിയന്ത്രണവും കൈവിടില്ലെന്ന നിലപാടിലാണ് ഇറാൻ. ഇതിനിടെ അമേരിക്കൻ ഓഹരി വിപണിയിൽ വൻ തകർച്ച. ജപ്പാനും ദക്ഷിണ കൊറിയയും അടക്കമുള്ള ഏഷ്യൻ വിപണികളിലും ഇടിവ്. ഇന്ത്യൻ ഓഹരി വിപണിയിലും ആശങ്ക പടരുകയാണ്. ലോക സമ്പദ്‌വ്യവസ്ഥയെ തന്നെ ബാധിച്ചേക്കാവുന്ന പുതിയ പ്രതിസന്ധിയുടെ കേന്ദ്രബിന്ദുവായി മാറുകയാണ് ഇറാൻ.

അമേരിക്കയിൽ നടന്ന ഇടക്കാല തിരഞ്ഞെടുപ്പിൽ ട്രംപിന്റെ റിപ്പബ്ലിക്കൻ പാർട്ടിക്കുണ്ടായ കനത്ത തിരിച്ചടിയാണ് പുതിയ സംഭവവികാസങ്ങൾക്ക് പിന്നിലെ പ്രധാന പശ്ചാത്തലം. ഇറാനെതിരായ യുദ്ധവും അതുണ്ടാക്കിയ സാമ്പത്തിക പ്രത്യാഘാതങ്ങളും അമേരിക്കൻ രാഷ്ട്രീയത്തിൽ വലിയ ചർച്ചയായി മാറി. യുദ്ധത്തിന്റെ പേരിൽ രാജ്യത്ത് ആഭ്യന്തര രാഷ്ട്രീയ സമ്മർദവും വർധിച്ചു. വൈസ് പ്രസിഡന്റ് ജെ.ഡി. വാൻസ് ഉൾപ്പെടെയുള്ളവരുടെ പ്രതികരണങ്ങളും ട്രംപ് ഭരണകൂടത്തിനുള്ളിലെ ഭിന്നതയെക്കുറിച്ചുള്ള റിപ്പോർട്ടുകളും സ്ഥിതിഗതികൾ കൂടുതൽ സങ്കീർണമാക്കുന്നു.

ഈ സാഹചര്യം മുതലെടുത്താണ് ഇറാൻ അമേരിക്കയ്ക്ക് മുന്നിൽ ഏഴ് നിർദേശങ്ങൾ വച്ചിരിക്കുന്നത്. യുദ്ധം അവസാനിപ്പിക്കണമെങ്കിൽ ഈ ആവശ്യങ്ങൾ അംഗീകരിക്കണമെന്നാണ് ഇറാന്റെ നിലപാട്.

എന്തൊക്കെയാണ് ഇറാന്റെ ഏഴ് ആവശ്യങ്ങൾ എന്ന് നോക്കാം

ഒന്നാമതായി, പശ്ചിമേഷ്യയിലും ഗാസയിലും ലെബനനിലും നടക്കുന്ന ആക്രമണങ്ങൾ അവസാനിപ്പിക്കണം.

രണ്ടാമതായി, ഹോർമുസ് കടലിടുക്കിലൂടെ ഇറാനിലേക്കും തിരിച്ചും പോകുന്ന കപ്പലുകളെ തടയുന്ന അമേരിക്കൻ നാവിക ഉപരോധം അവസാനിപ്പിക്കണം.

മൂന്നാമതായി, ഇറാനുമേൽ ഏർപ്പെടുത്തിയിരിക്കുന്ന എല്ലാ സാമ്പത്തിക ഉപരോധങ്ങളും പിൻവലിക്കണം.

നാലാമതായി, വിദേശരാജ്യങ്ങളിൽ മരവിപ്പിച്ചിരിക്കുന്ന ഇറാന്റെ ആസ്തികൾ വിട്ടുനൽകണം.

അഞ്ചാമതായി, പശ്ചിമേഷ്യയിൽനിന്ന് അമേരിക്കൻ സൈന്യത്തെ പിൻവലിക്കണം.

ആറാമതായി, യുദ്ധത്തിൽ ഇറാനുണ്ടായ നാശനഷ്ടങ്ങൾക്ക് അമേരിക്ക നഷ്ടപരിഹാരം നൽകണം.

ഏഴാമതായി, ഭാവിയിൽ ഇറാനെ ആക്രമിക്കില്ലെന്ന് അമേരിക്ക ഉറപ്പുനൽകണം.

ചുരുക്കത്തിൽ, യുദ്ധം അവസാനിപ്പിക്കുന്നതിനൊപ്പം പശ്ചിമേഷ്യയിലെ അമേരിക്കൻ സ്വാധീനം കുറയ്ക്കുകയും സാമ്പത്തികമായി ഇറാനെ ശക്തിപ്പെടുത്തുകയും ചെയ്യുന്ന ആവശ്യങ്ങളാണ് ടെഹ്റാൻ മുന്നോട്ടുവച്ചിരിക്കുന്നത്. ഈ ആവശ്യങ്ങളോട് അമേരിക്ക ഔദ്യോഗികമായി ഇതുവരെ പ്രതികരിച്ചിട്ടില്ല. അമേരിക്കയുടെ മറുപടി ലഭിച്ചശേഷം തുടർനടപടികൾ തീരുമാനിക്കുമെന്നാണ് ഇറാന്റെ സുരക്ഷാ മേധാവി മൊഹ്സിൻ റെസായിയുടെ നിലപാട്.

ഇതിനിടെ, യുദ്ധത്തിന്റെ സാമ്പത്തിക പ്രത്യാഘാതങ്ങൾ ലോകവിപണിയിലും പ്രകടമാകുകയാണ്.

അമേരിക്കൻ വിപണിയിൽ ഉണ്ടായത് വലിയ തകർച്ചയാണ്. ട്രംപിന്റെ തിരഞ്ഞെടുപ്പ് തിരിച്ചടിക്ക് പിന്നാലെ ടെക്‌നോളജി, ആർട്ടിഫിഷ്യൽ ഇന്റലിജൻസ് മേഖലകളിലെ കമ്പനികളുടെ ഓഹരികൾ കുത്തനെ ഇടിഞ്ഞു. എൻവിഡിയ, ക്വാൽകോം, ടെസ്‌ല തുടങ്ങിയ പ്രമുഖ കമ്പനികളുടെ ഓഹരികൾ ഒൻപത് ശതമാനത്തിലേറെ ഇടിവ് നേരിട്ടപ്പോൾ എഎംഡിയുടെ തകർച്ച 17 ശതമാനത്തിലെത്തി.

അമേരിക്കയിലെ ഏറ്റവും വലിയ ഏഴ് ടെക് കമ്പനികൾ ഉൾപ്പെടുന്ന മാഗ്നിഫിസന്റ് സെവൻ വിഭാഗത്തിന്റെ ആകെ വിപണിമൂല്യത്തിൽനിന്ന് ഒരു ട്രില്യൺ ഡോളറാണ് ഒറ്റയടിക്ക് ഇല്ലാതായത്.

നാസ്ഡാക് സൂചിക 5.82 ശതമാനവും എസ് ആൻഡ് പി 500 സൂചിക 5.97 ശതമാനവും ഇടിഞ്ഞു. ഡൗ ജോൺസ് സൂചികയും 2200 പോയിന്റിലധികം താഴ്ന്നു. 2025 ഏപ്രിലിന് ശേഷമുള്ള ഏറ്റവും വലിയ ഏകദിന തകർച്ചകളിലൊന്നാണ് അമേരിക്കൻ വിപണിയിൽ രേഖപ്പെടുത്തിയത്.

അമേരിക്കയിലെ ഈ നഷ്ടക്കാറ്റ് ഏഷ്യൻ വിപണികളിലേക്കും വ്യാപിച്ചു. ദക്ഷിണ കൊറിയയുടെ കോസ്പി സൂചിക ആറ് ശതമാനവും ജപ്പാന്റെ നിക്കെയ് 5.9 ശതമാനവും ഇടിഞ്ഞു. ഹോങ്കോങ്, ഷാങ്ഹായ് വിപണികളിലും നഷ്ടം രേഖപ്പെടുത്തി.

ഇന്ത്യൻ ഓഹരി വിപണിയിലും ഇതിന്റെ പ്രതിഫലനം ഉണ്ടാകുമെന്ന ആശങ്ക ശക്തമാണ്. കഴിഞ്ഞ ദിവസം വലിയ മുന്നേറ്റം നടത്തിയ സെൻസെക്സും നിഫ്റ്റിയും വീണ്ടും സമ്മർദത്തിലാകുമെന്നാണ് സൂചന. വ്യാപാരത്തിന് മുന്നോടിയായി ഗിഫ്റ്റ് നിഫ്റ്റി 173 പോയിന്റ് നഷ്ടത്തിലായിരുന്നു.

അതേസമയം, ക്രൂഡോയിൽ വിലയിലെ ചാഞ്ചാട്ടവും ശ്രദ്ധേയമാണ്. ട്രംപിന്റെ പാർട്ടിക്ക് തിരഞ്ഞെടുപ്പിൽ തിരിച്ചടി നേരിട്ടതോടെ യുദ്ധം അവസാനിപ്പിക്കാനുള്ള നീക്കങ്ങൾ ശക്തമാകുമെന്ന പ്രതീക്ഷയിൽ ബ്രെന്റ് ക്രൂഡ് വില 108–110 ഡോളർ നിലവാരത്തിൽനിന്ന് 93 ഡോളറിലേക്ക് താഴ്ന്നിരുന്നു. എന്നാൽ ഹോർമുസ് കടലിടുക്കിലെ പുതിയ സംഘർഷസാധ്യതകളും സൗദിക്കെതിരായ ഹൂതി ആക്രമണങ്ങളും റിപ്പോർട്ട് ചെയ്തതോടെ വില വീണ്ടും ബാരലിന് ഏകദേശം 99 ഡോളറിലേക്ക് ഉയർന്നു.

ഇന്ത്യയെ സംബന്ധിച്ചിടത്തോളം ക്രൂഡോയിൽ വില നിർണായകമാണ്. എണ്ണ ഇറക്കുമതിയെ വലിയ തോതിൽ ആശ്രയിക്കുന്ന രാജ്യമായതിനാൽ വില ഉയർന്നാൽ പെട്രോൾ, ഡീസൽ വിലയിലും പണപ്പെരുപ്പത്തിലും സമ്മർദമുണ്ടാകാം. മറിച്ച് എണ്ണവില കുറഞ്ഞാൽ രാജ്യത്തിന്റെ ഇറക്കുമതി ചെലവ് കുറയുകയും സമ്പദ്‌വ്യവസ്ഥയ്ക്ക് ആശ്വാസമാകുകയും ചെയ്യും.

സ്വർണവിപണിയിലും അനിശ്ചിതത്വം തുടരുകയാണ്. അന്താരാഷ്ട്ര വിപണിയിൽ സ്വർണം ഔൺസിന് 4064 ഡോളർ നിലവാരത്തിലായിരുന്നു. കേരളത്തിൽ ഒരു പവൻ സ്വർണത്തിന്റെ വില 1,07,080 രൂപ. അമേരിക്കയിൽ പുറത്തുവരുന്ന തൊഴിൽ കണക്കുകളും പലിശനിരക്കുകളെക്കുറിച്ചുള്ള പ്രതീക്ഷകളും സ്വർണവിലയുടെ അടുത്ത നീക്കത്തെ സ്വാധീനിക്കും.

ഇതിനിടെ മറ്റൊരു നിർണായക നീക്കവും ഇറാന്റെ ഭാഗത്തുനിന്നുണ്ട്. ഹോർമുസ് കടലിടുക്കിലൂടെയുള്ള കപ്പൽ ഗതാഗതം സാധാരണ നിലയിലാക്കുന്നതിന് ഇറാന്റെ നിബന്ധനകൾ അംഗീകരിക്കണമെന്ന സമ്മർദം ശക്തമാണ്. ലോകത്തെ എണ്ണവിതരണത്തിന് അതീവ നിർണായകമായ ഈ കടൽപാതയിലെ പ്രതിസന്ധി നീണ്ടുപോയാൽ അതിന്റെ പ്രത്യാഘാതം ലോകത്തെ എല്ലാ രാജ്യങ്ങളെയും ബാധിക്കും.

ട്രംപിന്റെ രാഷ്ട്രീയ തിരിച്ചടിയെ ഇറാൻ നയതന്ത്രപരമായും സാമ്പത്തികമായും മുതലെടുക്കാൻ ശ്രമിക്കുമ്പോൾ അമേരിക്കയ്ക്ക് മുന്നിലുള്ളത് വലിയ വെല്ലുവിളിയാണ്. ഇറാന്റെ ഏഴ് ആവശ്യങ്ങളും അംഗീകരിക്കുമോ? അതോ പശ്ചിമേഷ്യയിൽ വീണ്ടും യുദ്ധം ശക്തമാകുമോ? ലോകവിപണിയും ഉറ്റുനോക്കുന്നത് ഈ നിർണായക തീരുമാനങ്ങളിലേക്കാണ്.