ചരിത്രത്തിലാദ്യമായി ആകാശവാണി തിരുവനന്തപുരം നിലയത്തില്‍ നിന്നുള്ള പ്രക്ഷേപണം മുടങ്ങി. ഇന്നലെ സംസ്ഥാനത്തുണ്ടായ ശക്തമായ കാറ്റില്‍ ആകാശവാണി നിലയത്തിന്റെ പ്രക്ഷേപണ ടവര്‍ നിലംപൊത്തി. അതേ തുടര്‍ന്ന് തിരുവനന്തപുരം നിലയത്തിന്റെ പ്രവര്‍ത്തനം നിലച്ചു.

നിലംപൊത്തിയ ടവര്‍ പൂര്‍ണതോതില്‍ പുനഃസ്ഥാപിക്കാന്‍ മൂന്ന് മാസത്തിലേറെ സമയമെടുക്കും. തിരുവനന്തപുരം, കൊല്ലം, കന്യാകുമാരി ജില്ലകളിലെ ആകാശവാണിയുടെ പ്രക്ഷേപണം താത്കാലികമായി എഫ്.എം. സ്‌റ്റേഷന്‍ വഴി നടത്താനാണ് അധികൃതര്‍ തീരുമാനിച്ചിരിക്കുന്നത്.
വെള്ളിയാഴ്ചയുണ്ടായ ശക്തമായ കാറ്റില്‍ ശ്രീകാര്യം മണ്‍വിളയിലെ ട്രാന്‍സ്മിറ്റിങ് ടവര്‍ തകരുകയായിരുന്നു. മീഡിയം വേവ് ട്രാന്‍സ്മിറ്ററിന്റെ ആന്റിനയാണ് തകര്‍ന്നത്. പ്രാദേശികവാര്‍ത്തകള്‍ താത്കാലികമായി അനന്തപുരി എഫ്.എമ്മിലൂടെയാകും ഇനി പ്രക്ഷേപണം ചെയ്യുക.
തകര്‍ന്ന പ്രധാന ട്രാന്‍സ്മിഷന്‍ ടവറിന് 122 മീറ്റര്‍ ഉയരമുണ്ട്. തിരുവനന്തപുരം നിലയത്തിന്റെ പ്രോഗ്രാമുകള്‍ ഇതുവഴിയാണ്. 20 കിലോ വാട്ട്‌സ് ശേഷിയാണ് ഈ പ്രസരണിക്കുള്ളത്. കൂടുതലും വാര്‍ത്തകളും തദ്ദേശീയമായ പരിപാടികളുമാണ് ഇതിലൂടെ പ്രക്ഷേപണം ചെയ്യുന്നത്.

അസാധാരണമായ ചുഴലിക്കാറ്റാണ് വെള്ളിയാഴ്ച വൈകിട്ടുണ്ടായത്. പ്രകൃതി ക്ഷോഭത്തെ നേരിടാനുള്ള കരുത്തോടെയാണ് ഇത് നിര്‍മിച്ചതെങ്കിലും കനത്ത കാറ്റിനെ അതിജീവിക്കാനായില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha