നജ്മ ഹെപ്തുള്ള അടുത്ത പദവി ലക്ഷ്യമിട്ട് കരുക്കള്‍ നീക്കുന്നു. ന്യൂനപക്ഷ കാര്യ മന്ത്രിയായിരുന്ന നജ്മയുടെ അടുത്ത ഉന്നം ഉപരാഷ്ട്രപതി കസേരയാണ്. ഇപ്പോള്‍ ഗവര്‍ണര്‍ പദവി ലഭിച്ചാലും ഉപരാഷ്ട്രപതി മോഹം കൈവിടില്ലെന്നാണ് നജ്മയുമായി അടുപ്പമുള്ളവര്‍ സൂചിപ്പിക്കുന്നത്.
ഒരുവട്ടം ഉപരാഷ്ട്രപതി തിരഞ്ഞെടുപ്പില്‍ മത്സരിച്ച് പരാജയപ്പെട്ടു എന്ന ഘടകവും തന്നെ തുണയ്ക്കുമെന്ന് നജ്മ കരുതുന്നു. 2007ലാണ് എന്‍.ഡി.എ സ്ഥാനാര്‍ത്ഥിയായി നജ്മ മത്സരിച്ചത്. എന്നാല്‍ ഹമീദ് അന്‍സാരിയോട് പരാജയപ്പെടുകയായിരുന്നു. രണ്ടുതവണയായി ഉപരാഷ്ട്രപതിയായി തുടരുന്ന അന്‍സാരി 2017ല്‍ സ്ഥാനമൊഴിയും.
ഇപ്പോള്‍ ഗവര്‍ണര്‍ പദവി വാഗ്ദാനമുണ്ടായാല്‍ താനത് സ്വീകരിക്കുമെന്ന് നജ്മ പറയുന്നു. എന്നാല്‍, 2017ല്‍ ഹമീദ് അന്‍സാരി ഒഴിയുമ്‌ബോള്‍ ഉപരാഷ്ട്രപതി സ്ഥാനത്തേയ്ക്ക് താന്‍ പരിഗണിക്കപ്പെടണമെന്ന് മുതിര്‍ന്ന ബിജെപി നേതാക്കളോട് നജ്മ ആവശ്യപ്പെട്ടതായാണ് സൂചന.
2007ല്‍ പരാജയമുറപ്പായ സാഹചര്യത്തില്‍ മത്സരിക്കാനിറങ്ങുമ്‌ബോള്‍ അടല്‍ ബിഹാരി വാജ്‌പേയ് തനിക്ക് വാക്കു നല്‍കിയിട്ടുണ്ടെന്നും നജ്മ പറയുന്നു. ഉപരാഷ്ട്രപതി സ്ഥാനാര്‍ത്ഥിയെ വിജയിപ്പിക്കാനാവശ്യമായ ഭൂരിപക്ഷം ബിജെപിക്ക് എപ്പോള്‍ കിട്ടുന്നുവോ അപ്പോള്‍ നജ്മയെ പരിഗണിക്കും എന്നായിരുന്നു വാജ്‌പേയിയുടെ വാക്കെന്നും അവര്‍ മുതിര്‍ന്ന നേതാക്കളെ അറിയിച്ചിട്ടുണ്ട്.
അമേരിക്കയില്‍ ബന്ധുക്കളെ സന്ദര്‍ശിച്ച് മടങ്ങിവന്നശേഷം ജൂലൈ 12നാണ് നജ്മ മന്ത്രിപദവി രാജിവച്ചത്. ഏതാനും മാസങ്ങളായി നജ്മ മന്ത്രിസഭയില്‍നിന്ന് പോകുമെന്ന ശ്രുതിയുണ്ടായിരുന്നു. എന്നാല്‍, വ്യക്തിപരമായ കാരണങ്ങളാല്‍ രാജിവെക്കുന്നുവെന്നാണ് നജ്മ അവകാശപ്പെടുന്നത്.