ചലച്ചിത്രസീരിയല്‍ നടി ശ്രീലത മേനോന്‍ അന്തരിച്ചു. 47 വയസായിരുന്നു. അസ്ഥിരോഗത്തെത്തുടര്‍ന്ന് ചികിത്സയിലായിരുന്ന ശ്രീലത മെഡിക്കല്‍ കോളേജ് ആശുപത്രിയില്‍ വച്ചാണ് അന്തരിച്ചത്.
അസ്ഥിരോഗം കടുത്ത ശ്രീലതയുടെ രണ്ട് വൃക്കകളും തകരാറിലായിരുന്നു. തിരുവനന്തപുരം കുന്നുകുഴി വടയ്ക്കാട് മടവിളാകം തറവാട്ടില്‍ റിട്ടയേഡ് തഹസീല്‍ദാര്‍ നാരായണ മേനോന്റെയും ഖാദി ബോര്‍ഡ് റിട്ടയേഡ് സൂപ്രണ്ട് ഭവാനിയുടേയും മകളാണ് ശ്രീലത മേനോന്‍.

ബിരുദധാരിയായ ഇവര്‍ 1985ല്‍ മിസ് തിരുവനന്തപുരം പട്ടം നേടിയാണ് കലാരംഗത്തെത്തിയത്. ഇരുനൂറോളം സീരിയലുകളില്‍ അഭിനയിച്ചിട്ടുള്ള ശ്രീലത പെരുന്തച്ചന്‍, അര്‍ഹത, ദിനരാത്രങ്ങള്‍, കേളി തുടങ്ങിയ ചിത്രങ്ങളിലും അഭിനയിച്ചു. എല്ലുകള്‍ തനിയെ പൊട്ടുന്ന 'സിസ്റ്റമിക് ലൂപ്പസ് എറിത്രോമാറ്റിസ്' എന്ന മാരകരോഗത്തിന് ശ്രീലത 23 വര്‍ഷമായി ചികിത്സയിലായിരുന്നു ഏഴു വര്‍ഷം മുന്പ് ഭര്‍ത്താവ് കെ.എസ്. മധു രക്താര്‍ബുദം ബാധിച്ചു മരിച്ചു.

മധുവിന്റെ ചികിത്സയ്ക്കുവേണ്ടി കടക്കെണിയിലായ കുടുംബത്തിനുവേണ്ടി വേദന കടിച്ചമര്‍ത്തി ശ്രീലത സിനിമ സീരിയല്‍ അഭിനയം തുടരുകയായിരുന്നു. അര്‍ജുന്‍, ആദി, അരവിന്ദ് എന്നിവരാണ് ശ്രീലതയുടെ മക്കള്‍.