തലസ്ഥാനത്ത് യോഗ്യനായ സ്ഥാനാര്‍ത്ഥിയെ കണ്ടെത്താന്‍ സി.പി.ഐ നേതൃത്വം നെട്ടോട്ടമോടുന്നു. പാര്‍ട്ടി നേതാക്കളില്‍ ആരെയെങ്കിലും പരിഗണിക്കണമെന്ന് ഒരു വിഭാഗവും പാര്‍ട്ടിക്ക് പുറത്തുനിന്ന് പൊതുസമ്മതനായ ഒരാളാകും ഉചിതമെന്ന് മറുഭാഗവും. അങ്ങനെ നേതൃത്വം രണ്ടുതട്ടിലായി. 

ജാതി സമവാക്യത്തിലൂടെ സീറ്റ് തിരിച്ചുപിടിക്കാമെന്ന മോഹവുമായി സി.എസ്.ഐ സഭാംഗമായ ഡോ. ബെന്നറ്റ് എബ്രഹാമിനെ സ്ഥാനാര്‍ത്ഥിയാക്കാനുള്ള നീക്കമാണ് ഉയര്‍ന്നു കേള്‍ക്കുന്നത്. എന്നാല്‍ ഇതിനെതിരെ പാര്‍ട്ടിയിലെ ഒരു വിഭാഗം രംഗത്തെത്തി. സി.പി.ഐ നേതൃനിരയില്‍ നിന്നുതന്നെ ഒരാളെ സ്ഥാനാര്‍ത്ഥിയാക്കണമെന്ന ആവശ്യമാണ് ഇവര്‍ മുന്നോട്ടുവെക്കുന്നത്. വിഷയം ചര്‍ച്ച ചെയ്യാന്‍ നാളെ ജില്ലാ കൗണ്‍സില്‍ യോഗം ചേരുന്നുണ്ട്. 

യു.ഡി.എഫ് സ്ഥാനാര്‍ത്ഥിയെ നിശ്ചയിച്ചിട്ടില്ലെങ്കിലും സിറ്റിംഗ് എം.പിയും കേന്ദ്രമന്ത്രിയുമായ ഡോ. ശശി തരൂര്‍ വീണ്ടും മത്സരിക്കാന്‍ സന്നദ്ധത പ്രകടിപ്പിച്ചിട്ടുണ്ട്. സി.പി.ഐ സ്ഥാനാര്‍ത്ഥിയായിരുന്ന അഡ്വ.പി രാമചന്ദ്രന്‍ നായരെ ഒരുലക്ഷത്തോളം വോട്ടുകള്‍ക്ക് പരാജയപ്പെടുത്തിയ തരൂരിന് ഇപ്പോഴും മണ്ഡലത്തില്‍ ശക്തമായ സ്വാധീനമുണ്ട്. അദ്ദേഹത്തെ നേരിടേണ്ടി വന്നാല്‍ ഇപ്പോഴത്തെ സാഹചര്യത്തില്‍ നല്ലൊരു മത്സരം കാഴ്ചവെക്കാന്‍ പ്രാപ്തിയുള്ള നേതാക്കള്‍ പോലും സി.പി.ഐക്ക് ഇല്ലെന്നാണ് വിലയിരുത്തല്‍. ഒ. രാജഗോപാലിനെ ബി.ജെ.പി സ്ഥാനാര്‍ത്ഥിയായി പ്രഖ്യാപിച്ചു കഴിഞ്ഞു. രണ്ട് വമ്പന്‍മാര്‍ക്കൊപ്പം പോരാടാന്‍ സി.പി.ഐ കഷ്ടപ്പെടും. സി.പി.എം ഇവിടെ സി.പി.ഐയെ പതിവായി കാലുവാരുന്നെന്ന പരാതിയും നിലനില്‍ക്കുന്നു. തിരുവനന്തപുരത്തെ സി.പി.എം പ്രവര്‍ത്തകര്‍ തെരഞ്ഞെടുപ്പ് കാലങ്ങളില്‍ ആറ്റിങ്ങല്‍ മണ്ഡലത്തിലാണെന്ന പരിഭവവും സി.പി.ഐക്കുണ്ട്.

ഡോ. ബെന്നറ്റ് എബ്രഹാം മുന്‍ പി.എസ്.സി അംഗമാണ്. ഇദ്ദേഹം സി.പി.എം അനുഭാവിയാണെന്നതു കൊണ്ടുതന്നെ സി.പി.ഐയിലെ ഒരു വിഭാഗത്തിന് അനഭിമതനാണ്. മാത്രമല്ല ഇദ്ദേഹം ദേശീയ ന്യൂനപക്ഷ കമ്മീഷനിലേക്ക് സ്ഥാനം ആവശ്യപ്പെട്ട് കോണ്‍ഗ്രസിനെ സമീപിച്ചിരുന്നു. ഇതൊക്കെ ആരോപിച്ചാണ് ഒരു ഇദ്ദേഹത്തെ എതിര്‍ക്കുന്നത്. ബെന്നറ്റ് എബ്രഹാം സ്ഥാനാര്‍ത്ഥിയായാല്‍ സഹകരിക്കാന്‍ ബുദ്ധിമുട്ടുണ്ടെന്നും ഇവര്‍ മുന്നറിയിപ്പുനല്‍കുന്നു. നാടാര്‍ വോട്ടുകള്‍ അനുകൂലമായി കേന്ദ്രീകരിക്കപ്പെടുമെന്ന നിഗമനത്തിന്റെ അടിസ്ഥാനത്തിലാണ് പാര്‍ട്ടി ഈ നീക്കം നടത്തുന്നത്. കഴിഞ്ഞ തെരഞ്ഞെടുപ്പില്‍ ബി.എസ്.പി സ്ഥാനാര്‍ത്ഥിയായി മത്സരിച്ച നീല ലോഹിതദാസന്‍ നാടാര്‍ നേടിയ 86,233 വോട്ടുകളാണ് അധികമായി ലക്ഷ്യമിടുന്നത്. എ.ഐ.എസ്.എഫ് മുന്‍ നേതാവായ ഡോ. ബെന്നറ്റ് ശെല്‍വത്തിന്റെ പേരും ഉയര്‍ന്നുകേള്‍ക്കുന്നുണ്ട്. രണ്ടിലൊരു ബന്നറ്റ് തന്നെയാകും സ്ഥാനാര്‍ത്ഥിയെന്നാണ് സൂചന. ആദ്യഘട്ടത്തില്‍ ഉയര്‍ന്നുകേട്ട പേരുകളൊന്നും ഇപ്പോള്‍ പരിഗണനയിലില്ല. 

അതേസമയം പാര്‍ട്ടി സംസ്ഥാന ആസ്ഥാനം ഉള്‍പ്പെടുന്ന തിരുവനന്തപുരത്ത് മത്സരിക്കാന്‍ സി.പി.ഐയില്‍ ഒരു സ്ഥാനാര്‍ത്ഥിയില്ലാത്ത സാഹചര്യം സി.പി.എം മുതലെടുക്കുമെന്ന് മുതിര്‍ന്ന നേതാക്കള്‍ പറയുന്നു. തിരുവനന്തപുരം മണ്ഡലം വേണമെന്ന ആവശ്യം സി.പി.എം ജില്ലാ കമ്മിറ്റി മുന്നോട്ടുവെച്ചിട്ടുണ്ട്. നാളെ നടക്കുന്ന ചര്‍ച്ച അത്തരത്തില്‍ കേന്ദ്രീകരിക്കപ്പെട്ടാല്‍ മുന്‍ മന്ത്രി ബിനോയ് വിശ്വത്തിനാകും സാധ്യത.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha