സത്യത്തെയും ജനങ്ങളെയും വിദ്യാർത്ഥികളെയും നന്മകളെയും എല്ലാം തല്ലിക്കൊഴിക്കാമെന്നും തച്ചുടക്കാമെന്നും വ്യാമോഹിച്ച ഒരു ഗവൺമെൻ്റ് മുട്ടുകുത്തിയിരിക്കുന്നുവെന്ന് സിപിഐഎം നേതാവ് ബിനോയ് വിശ്വം.

ബിജെപി ഗവൺമെൻ്റിന്റെ രണ്ടാമത്തെ കനത്ത പരാജയമാണിത്. ആദ്യം തോറ്റത് കർഷകൻ്റെ പോരാട്ടവീര്യത്തിന് മുന്നിലായിരുന്നുവെങ്കിൽ അതേ മോദി ഗവൺമെൻ്റ് ഇപ്പോൾ പരാജയപ്പെട്ടത് വിദ്യാർത്ഥികളുടെയും ജനങ്ങളുടെയും സമരൈക്യത്തിന് മുൻപിലാണെന്നും അദ്ദേഹം പറഞ്ഞു.

ഇത് പലതിന്റെയും ആരംഭമാണ്. അജയ്യനാണ് മോദി എന്നും ഒരിക്കലും ബിജെപി യെ തോൽപ്പിക്കാൻ ആർക്കുമാവില്ല എന്നും എല്ലായ്പ്‌പോഴും പറഞ്ഞുപോന്നവർക്കെല്ലാം ഉത്തരം കിട്ടിയിരിക്കുന്നു. രാജ്യം തീരുമാനിച്ചാൽ, വിദ്യാർത്ഥികളും ജനങ്ങളും തീരുമാനിച്ചാൽ എല്ലാവരും ചേർന്ന് ഒറ്റക്കെട്ടായി ഒന്നിനെയും കൂസാതെ മുന്നോട്ടുപോകുമെന്നു പ്രഖ്യാപിച്ചാൽ അതിനു മുമ്പിൽ ആർഎസ്എസിനും ബിജെപിക്കും മോദിക്കും മുട്ടുകുത്തിയേ തീരൂ എന്ന കാര്യം ഇന്ന് ഈ രാജ്യം കാണുകയാണെന്നും അദ്ദേഹം പറഞ്ഞു.