ഞാനിന്നൊരമ്മ.. കുഞ്ഞിന് ഒരു വയസ്സ് പൂർത്തിയായപ്പോൾ ആ സർപ്രൈസ് പൊട്ടിച്ച് നടി പത്മപ്രിയ. കുഞ്ഞിന്റെ ഒന്നാം പിറന്നാൾ ദിനത്തിലാണ് തന്റെ പ്രിയ്യപ്പെട്ട നടി പ്രസവിച്ചു എന്ന് ആരാധകർ അറിയുന്നത്. പ്രെ​ഗ്നന്റ് ആണെന്ന അഭ്യൂഹങ്ങൾ പോലും സോഷ്യൽ മീഡിയയിൽ ഉണ്ടായിരുന്നില്ലെന്നത് കൊണ്ട് തന്നെ നടിയുടെ ഈ ഒരൊറ്റ പോസ്റ്റിൽ അമ്പരന്നിരിക്കുകയാണ് ആരാധകർ. സാമൂഹികമാധ്യമങ്ങളിൽ പങ്കുവെച്ചായിരുന്നു താനൊരമ്മയായി എന്ന സന്തോഷം ആരാധകരെ അറിയിച്ചത്.

'ജീവന്റെ 365 ദിവസങ്ങൾ' എന്ന അടിക്കുറിപ്പോടെയാണ് ചിത്രം. 'കടപ്പാട്, ഞങ്ങളുടെ കഥ, കുഞ്ഞുനിമിഷങ്ങൾ' എന്ന ഹാഷ്ടാഗുകളും നടി ചിത്രത്തിനൊപ്പം പങ്കുവെച്ചു.

രണ്ടുവലിയ കൈകളുടെ ഉള്ളത്തിൽ കുഞ്ഞിക്കൈയുള്ള ചിത്രമാണ് നടി പങ്കുവെച്ചതിൽ ഒന്ന്. മറ്റൊന്നിൽ അമ്മയുടെ വസ്ത്രത്തിൽ മുറുകെപ്പിടിച്ചിരിക്കുന്ന കുഞ്ഞിക്കൈയും കാണാം. കുഞ്ഞിന്റെ മുഖം വെളിപ്പെടുത്തിയിട്ടില്ല. കുഞ്ഞ് ആൺകുട്ടിയാണോ പെൺകുട്ടിയാണോ എന്നും വ്യക്തമാക്കിയിട്ടില്ല. പങ്കാളി ജാസ്മിൻ ഷായെ ടാഗ് ചെയ്താണ് പോസ്റ്റ്.

പോസ്റ്റിന് താഴെ നടിക്ക് ആശംസയുമായി നിരവധിപ്പേരെത്തി. 'നിന്നെയും കുഞ്ഞിനെയും ഞാൻ സ്‌നേഹിക്കുന്നുവെന്ന് അറിയാമല്ലോ', എന്നായിരുന്നു നടി അഭിരാമിയുടെ കമന്റ്. 'ഞങ്ങൾക്കിത് ലഭിക്കാൻ കാരണം നീയും ആറുമാണ്' എന്ന് പത്മപ്രിയ മറുപടി നൽകി.

2014-ലായിരുന്നു പത്മപ്രിയയുടെ വിവാഹം. ഗുജറാത്ത് സ്വദേശിയായ ജാസ്മിൻ ഷായാണ് പങ്കാളി. മുംബൈയിൽ നടന്ന ചടങ്ങിലായിരുന്നു വിവാഹം. മസാച്യുസെറ്റ്‌സ് ഇൻസ്റ്റിറ്റ്യൂട്ട് ഓഫ് ടെക്‌നോളജി ആസ്ഥാനമായി പ്രവർത്തിക്കുന്ന അബ്ദുൾ ലത്തീഫ് ജമീൽ പോവർട്ടി ആക്ഷൻ ലാബിൽ ദക്ഷിണേന്ത്യയുടെ പോളിസി ഹെഡാണ് ജാസ്മിൻ ഷാ.