വിദ്യാര്ത്ഥികള് പറഞ്ഞതാണ് ശരി... ഭാവി മരുമകള്ക്ക് മാര്ക്ക് വാരിക്കോരി നല്കിയെന്ന് കണ്ടെത്തല്; ലക്ഷ്മി നായര്ക്കെതിരെ ഉപസമിതിയുടെ ഗുരുതര കണ്ടെത്തല്
ലോ അക്കാദമി ലോ കോളജ് പ്രിന്സിപ്പല് ലക്ഷ്മിനായരുടെ കള്ളക്കളികള് പുറത്താകുന്നു. സിന്ഡിക്കേറ്റ് ഉപസമിതി നടത്തിയ അന്വേഷണത്തില് ഗുരുതരമായ ചട്ടലംഘനം കണ്ടെത്തി. ഭാവി മരുമകളായ അപര്ണ പി.നായര് എന്ന വിദ്യാര്ത്ഥിക്ക് ഇന്റേണല് മാര്ക്ക് വാരിക്കോരി നല്കിയെന്ന് റിപ്പോര്ട്ടില് വ്യക്തമാക്കുന്നു.
വിദ്യാര്ത്ഥികളോട് പ്രിന്സിപ്പല് ലക്ഷ്മിനായര് കാണിച്ച സ്വജപക്ഷപാതത്തിന് വ്യക്തമായ തെളിവുകളുണ്ടെന്ന് ഒരു കുറ്റപത്രം പോലെ ഉപസമിതി തയ്യാറാക്കിയ റിപ്പോര്ട്ടില് പറയുന്നു. ഭാവി മരുമകള്ക്ക് നല്കിയ ഇന്റേണല് മാര്ക്ക് 20ല് 19 ആണ്. 50% പോലും ഹാജരില്ലാത്ത വിദ്യാര്ത്ഥിനിക്കാണ് ഇത്തരത്തില് ഔദാര്യം നല്കിയത്. ഇതില് അസ്വഭാവികതയുണ്ട്. ഉപസമിതി ആവശ്യപ്പെട്ട രേഖകള് പ്രിന്സിപ്പല് കൈമാറിയില്ല. സപ്ലിമെന്ററി പരീക്ഷ എഴുതി കുട്ടികള്ക്കു പോലും ഉയര്ന്ന ഇന്റേണല് മാര്ക്ക് നല്കിയിട്ടുണ്ട്. എന്നാല് 75% വരെ മാര്ക്ക് വാങ്ങിയ കുട്ടികളെ തഴഞ്ഞതായും റിപ്പോര്ട്ടില് പറയുന്നു.
പ്രിന്സിപ്പലിന് താല്പര്യമുള്ള വിദ്യാര്ത്ഥികള്ക്ക് കോളജില് കൂടുതല് പരിഗണന ലഭിച്ചിരുന്നു. ഹാജര് രേഖകളിലും പ്രിന്സിപ്പല് ഇടപെട്ടു. മെരിറ്റ് സംവിധാനം പ്രിന്സിപ്പല് അട്ടിമറിച്ചു തുടങ്ങിയ ഗുരുതരമായ ചട്ടലംഘനങ്ങളാണ് പ്രിന്സിപ്പിനെതിരെ ഉപസമിതി ചുമത്തിയിരിക്കുന്നത്. സ്വകാര്യത ഹനിക്കുന്ന രീതിയില് ഹോസ്റ്റലില് ഒളികാമറകള് വച്ചുവെന്നും റിപ്പോര്ട്ടില് ചൂണ്ടിക്കാട്ടുന്നു.
ഉപസമിതി റിപ്പോര്ട്ട് സിന്ഡിക്കേറ്റിന് കൈമാറി. റിപ്പോര്ട്ടില് വൈസ് ചാന്സലര് വൈകാതെ നടപടി സ്വീകരിക്കുമെന്നാണ് കരുതുന്നത്. അതിനിടെ, ഒത്തുതീര്പ്പ് നിര്ദേശവുമായി കോളജ് ചെയര്മാന് അയ്യപ്പന്പിള്ള രംഗത്തെത്തി. പ്രിന്സിപ്പലിന്റെ അധികാരങ്ങള് വെട്ടിക്കുറയ്ക്കാമെന്നും ഹാജര്, ഇന്റേണല് മാര്ക്ക് തുടങ്ങിയവയില് പ്രിന്സിപ്പലിനെ ഇടപെടുവിക്കില്ലെന്നും ചെയര്മാന് പറയുന്നു. എന്നാല് പ്രിന്സിപ്പിന്റെ രാജിയില് കുറഞ്ഞതായി ഒന്നും സ്വീകാര്യമല്ലെന്ന നിലപാടിലാണ് വിദ്യാര്ത്ഥികള്.
https://www.facebook.com/Malayalivartha
