പാര്ട്ടി തല മറന്ന് എണ്ണ തേയ്ക്കുന്നു! ലക്ഷ്മി നായര് വിഷയം തിരിഞ്ഞ് കുത്തുന്നു; ബഹുജന യുവജന സംഘടനകള് സിപിഎമ്മില് നിന്ന് അകലുന്നു
സി പി എമ്മിലെ യുവജന വിദ്യാര്ത്ഥി വിഭാഗങ്ങള്ക്കിടയില് പാര്ട്ടിക്കെതിരെ അസംതൃപ്തി പുകയുന്നു. സി പി എമ്മിലെ ഉന്നതര്ക്കു വേണ്ടി പ്രവര്ത്തകരെ ബലി കൊടുക്കുന്നു എന്നാണ് ആക്ഷേപം.
ലോ അക്കാദമി സമരമാണ് പ്രവര്ത്തകര്ക്കിടയിലുള്ള പ്രകോപനത്തിനു കാരണം. പാര്ട്ടി നേതാക്കളെക്കാള് കൂടുതല് ബിനാമിമാരാണ് യുവജന സംഘടനയെ നിരാശയിലാഴ്ത്തുന്നത്. പാര്ട്ടി ഘടകങ്ങളില് ഇക്കാര്യം ഉന്നയിക്കാന് തയ്യാറെടുക്കുകയാണ് പ്രവര്ത്തകര്. വെള്ളിയാഴ്ച തിരുവനന്തപുരത്ത് ചേര്ന്ന സി പി എം ജില്ലാ കമ്മിറ്റി ലോ അക്കാദമി വിഷയത്തില് തണുപ്പന് നിലപാടാണ് സ്വീകരിച്ചത്. സമരം ഒത്തുതീര്ക്കണമെന്നു മാത്രമാണ് ജില്ലാ കമ്മിറ്റി ആവശ്യപ്പെട്ടത്. കോലിയക്കോട് കൃഷ്ണന് നായര്ക്കുള്ള സ്വാധീനമാണ് കാരണമെന്ന് യുവജനങ്ങള് ആരോപിക്കുന്നു.
കോടിയേരിയോടും പ്രവര്ത്തകര്ക്ക് അമര്ഷമുണ്ട്. അക്കാദമി പ്രിന്സിപ്പല് രാജിവയ്ക്കേണ്ടെന്നണ് കോടിയേരി പറഞ്ഞത്. എസ് എഫ് ഐയും ഡിവൈ എഫ് ഐ യും ജീവന്മരണ പോരാട്ടം നടത്തുമ്പോള് ലക്ഷ്മി നായരെ സഹായിക്കാനാണ് കോടിയേരി ശ്രമിക്കുന്നതെന്ന് പ്രവര്ത്തകര് പറയുന്നു. പിണറായിയുടെ നിശബ്ദതയും പ്രവര്ത്തകരെ നന്നേ വേദനിപ്പിക്കുന്നുണ്ട്.
സി പി എമ്മിനെക്കാള് ഭേദം സി പി ഐയാണെന്ന അഭിപ്രായത്തിലാണ് പ്രവര്ത്തകര് എത്തിച്ചേര്ന്നിരിക്കുന്നത്. ലക്ഷ്മി നായരെ പറഞ്ഞു വിടുന്നത് വരെ സമരം തുടരാനാണ് സി പി ഐ യുടെ തീരുമാനം. നേതാക്കളുടെ അവിഹിതമായ ബന്ധങ്ങള് കാരണം പാര്ട്ടിയുടെ യുവജന സംഘടനകള് വന് പ്രതിസന്ധിയാണ് അനുഭവിക്കുന്നതെന്ന് എസ് എഫ് ഐ യും ഡിഫിയും വിശ്വസിക്കുന്നു.
കേരള അഡ്മിനിസ്ട്രേറ്റീവ് ട്രൈബ്യൂണല് നടപ്പിലാക്കുമെന്ന തീരുമാനത്തില് മുഖ്യമന്ത്രി ഉറച്ചു നില്ക്കുന്നതിന്റെ ഫലമായി സെക്രട്ടേറിയറ്റിലെയും പുറത്തെയും ജീവനക്കാര് പാര്ട്ടിയുമായി അകന്നു കഴിഞ്ഞതായി ജീവനക്കാരുടെ സംഘടനകള് വിശ്വസിക്കുന്നു. അധികാരം കിട്ടിയതോടെ പാര്ട്ടി നേതാക്കള് ഏകാധിപതികളെ പോലെ പെരുമാറുകയാണെന്നും വിഎസ് മാത്രമാണ് ഭേദമെന്നും പ്രവര്ത്തകര് പറയുന്നു.
https://www.facebook.com/Malayalivartha
