ആശയക്കുഴപ്പത്തില് കേരളം, തീര്ത്തും പരിതാപകരം
ആലപ്പുഴ ജില്ലയില് ദിവസങ്ങള്ക്കിടെ ക്വട്ടേഷന് സംഘത്തിന്റെ ആക്രമണത്തില് 30 വയസുകളിലുള്ള മൂന്നു പേര് കൊല്ലപ്പെട്ടു. അരിയുടെ വില 40 കടന്നു. പച്ചക്കറി വില റോക്കറ്റ് പോലെ കുതിക്കുന്നു. എന്നിട്ടും സര്ക്കാര് ഒന്നും അറിഞ്ഞമട്ടില്ല. മുഖ്യമന്ത്രി വിദേശ രാജ്യങ്ങളില് കോട്ടും സ്യൂട്ടും അണിഞ്ഞ് വിലസുന്നു. സഹമന്ത്രിമാരെ കുറിച്ചൊന്നും കേള്ക്കാനില്ല.
കേരളത്തിന്റെ അവസ്ഥ നാള്ക്കുനാള് ചെല്ലുന്തോറും കൂടുതല് പരിതാപാരമായി മുന്നോട്ടു പോവുകയാണ്. ആണും പെണ്ണ് അടുത്തടുത്ത് ഇരുന്നാല് കുട്ടി സഖാക്കള്ക്ക് ദഹിക്കില്ല. അവര് കരിങ്കല്ല് കൊണ്ട് തലക്കിടിക്കും. കുട്ടികളെ നേര്വഴിക്ക് നയിക്കാന് പ്രിന്സിപ്പല് ശ്രമിച്ചാല് അവരുടെ കസേര കത്തിക്കും.അതേസമയം മൂത്ത സഖാക്കളെ സാരി തുമ്പില് കെട്ടിയിടുന്ന പ്രിന്സിപ്പലുണ്ടെങ്കില് അവര്ക്ക് മുമ്പില് കുട്ടി സഖാക്കള് സാഷ്ടാംഗം നമസ്കരിക്കും.
അസഹിഷ്ണുതയാണ് സഖാക്കളുടെ മുഖമുദ്ര. മുഖ്യമന്ത്രി മുതലിങ്ങോട്ട് എല്ലാവരെയും പകര്ച്ചവ്യാധി പോലെ ബാധിച്ചിരിക്കുന്ന രോഗം. വി എസിനോട് വരെ സഖാക്കള്ക്ക് അസഹിഷ്ണതയാണ്. നേതാക്കളുടെ മനസ്സ് തെക്ക് വടക്ക് നടക്കുന്നു. ആരും തമ്മില് ഒരു ബന്ധവുമില്ല. സൗദി അറേബ്യയില് ചെന്ന് പിണറായി സര്ക്കാരിനെ പുകഴ്ത്തുമ്പോള് അബുദാബിയില് ചെന്ന് അച്യുതാനന്ദന് ഇകഴ്ത്തുന്നു.പരസ്പരം പോരടിക്കുന്ന വ്യത്യസ്ത ധ്രുവങ്ങളില് നില്ക്കുന്നുവരായി നേതാക്കള് മാറുന്നു.
തനിക്ക് വേണ്ടി ആരെയും വേണ്ടെന്നു വയ്ക്കാന് മുഖ്യമന്ത്രി മടിക്കുന്നില്ല. വിജിലന്സ് ഡയറക്ടര്ക്കു വേണ്ടി ചീഫ് സെക്രട്ടറി ഉള്പ്പെടെയുള്ളവരെ പിണക്കി. ഐ.എ.എസുകാര് സര്ക്കാരിനെ അട്ടിമറിക്കാന് പിന്നണി പ്രവര്ത്തനം സജീവമാക്കുകയാണ്. ഭരണസ്തംഭനം തുടര്ക്കഥയാകുന്നു.
റേഷന് സംവിധാനം പൂര്ണ പരാജയമായി.അരി വില കുതിക്കുന്നത് ഭക്ഷ്യമന്ത്രി അറിഞ്ഞ മട്ടില്ല. ഭക്ഷ്യവകുപ്പിനു ഒരു മന്ത്രിയുണ്ടോ എന്നും സംശയമാണ്. സിനിമാ സംവിധായകന് വിനയനെ ഹോര്ട്ടികോര്പ്പിന്റെ ചെയര്മാനാക്കിയതോടെ അദ്ദേഹത്തെ പേടിച്ച് വെള്ളരിയും കത്തിരിയുമൊക്കെ സ്ഥലം വിട്ടു. കൃഷിമന്ത്രിയെ കാണാനും കേള്ക്കാനുമില്ല.
ഇതിനെക്കാളൊക്കെ ഭേദം ഉമ്മന് ചാണ്ടിയായിരുന്നെന്ന് മാലോകര് പറഞ്ഞു തുടങ്ങി. ഒന്നുമില്ലെങ്കിലും അഹങ്കാരമെങ്കിലും ഇല്ലാതിരിക്കുമല്ലോ.
https://www.facebook.com/Malayalivartha
