സര്ക്കാര് ആശുപത്രികളെ രോഗീ സൗഹൃദമാക്കും: മന്ത്രി കെ.കെ. ശൈലജ ടീച്ചര്
സര്ക്കാര് ആശുപത്രികളെ രോഗീ സൗഹൃദമാക്കി മാറ്റുകയാണ് ആര്ദ്രം ദൗത്യത്തിലൂടെ പ്രധാനമായി ലക്ഷ്യമിടുന്നതെന്ന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്. ആര്ദ്രം പദ്ധതിയുടെ ഉദ്ഘാടനത്തോടനുബന്ധിച്ച് വിളിച്ചു ചേര്ത്ത പത്രസമ്മേളനത്തില് സംസാരിക്കുകയായിരുന്നു മന്ത്രി. സര്ക്കാര് മേഖലയില് വളരെ വിപുലമായ ആശുപത്രി സംവിധാനമുണ്ടായിട്ടും ജനങ്ങളില് 63 ശതമാനം പേരും സ്വകാര്യ മേഖലയില് ചികിത്സയ്ക്ക് വേണ്ടി വലിയ തുകയാണ് ചെലവഴിക്കുന്നത്. അത് മാറ്റിയെടുക്കാന് ആര്ദ്രം ദൗത്യത്തിലൂടെ സാധിക്കും. സാധാരണക്കാരന് പെട്ടെന്ന് കടന്നു ചെല്ലാനും മതിയായ ചികിത്സ ലഭ്യമാക്കാനും വേണ്ടി സര്ക്കാര് ആശുപത്രികളെ രോഗീ സൗഹൃദമാക്കുമെന്നും മന്ത്രി പറഞ്ഞു.
ആര്ദ്രം ദൗത്യം വ്യാഴാഴ്ച മുഖ്യമന്ത്രി ഉദ്ഘാടനം ചെയ്യും...
കേരളത്തിലെ ആരോഗ്യ രംഗത്തെ എല്ലാ തലത്തിലും രോഗീ സൗഹൃദമാക്കുന്നതിനും ഗുണമേന്മയുള്ള ആരോഗ്യ സേവനങ്ങള് ഉറപ്പാക്കുന്നതിനും വേണ്ടി നടപ്പിലാക്കുന്ന ആര്ദ്രം ദൗത്യത്തിന്റെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയന് ഫെബ്രുവരി 16-ാം തീയതി രാവിലെ 11 മണിക്ക് മെഡിക്കല് കോളേജ് അങ്കണത്തില് വച്ച് നിര്വഹിക്കും. ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്, ദേവസ്വം, സഹകരണ വകുപ്പ് മന്ത്രി കടകംപള്ളി സുരേന്ദ്രന് എന്നിവര് ചടങ്ങില് പങ്കെടുക്കും.
എന്താണ് ആര്ദ്രം ദൗത്യം..?
കേരളത്തിന്റെ ആരോഗ്യ മേഖലയുടെ സമഗ്ര പുരോഗതിക്കായുള്ള കേരള സര്ക്കാരിന്റെ രോഗീ സൗഹൃദ ആശുപത്രി സംരംഭമാണ് ആര്ദ്രം ദൗത്യം. സര്ക്കാര് ആശുപത്രികളിലെ ചികിത്സാ സൗകര്യം വര്ധിപ്പിക്കുക, പൊതുജനങ്ങള്ക്ക് പരമാവധി സൗജന്യ ചികിത്സ ഉറപ്പുവരുത്തുക എന്നിവയാണ് ആര്ദ്രത്തിലൂടെ ലക്ഷ്യമിടുന്നത്. പ്രാഥമികാരോഗ്യ കേന്ദ്രം മുതല് മെഡിക്കല് കോളേജുകള് വരെയുള്ള ആശുപത്രികളെ രോഗീ സൗഹൃദമാക്കി ഗുണമേന്മയുള്ള ആരോഗ്യ സേവനം ഉറപ്പാക്കും.
ഒ.പി. സംവിധാനങ്ങളുടെ നവീകരണം, ജില്ലാതാലൂക്കുതല ആശുപത്രികളുടെ നിലവാരം ഏകീകരണം, പ്രാഥമികാരോഗ്യ കേന്ദ്രങ്ങളെ കുടുംബാരോഗ്യ കേന്ദ്രങ്ങളാക്കി ഉയര്ത്തല്, വികേന്ദ്രീകൃത ആസൂത്രണത്തിന്റെ ഭാഗമായി ആരോഗ്യ നിര്ണയ ഘടകങ്ങളുടെ പരിഹാരത്തിനും ആരോഗ്യ രംഗത്തെ ഫലപ്രദമായ ഇടപെടലിനുമായി തദ്ദേശ സ്വയംഭരണ സ്ഥാപനങ്ങളെ സജ്ജമാക്കാനുള്ള കൂട്ടായ പ്രവര്ത്തനങ്ങള് എന്നീ നാല് പ്രധാന ഘടകങ്ങള് ഉള്ക്കൊള്ളുന്നതാണ് ആര്ദ്രം പദ്ധതി.
ലക്ഷ്യങ്ങള്...
ആശുപത്രിയില് വരുന്ന രോഗികള്ക്ക് ഗുണമേന്മയും സൗഹാര്ദ്ദപരവുമായ സേവനം ഉറപ്പാക്കുക, ജില്ലാ താലൂക്ക് ആശുപത്രികളില് സൂപ്പര് സ്പെഷ്യാലിറ്റി/സ്പെഷ്യാലിറ്റി സേവനങ്ങള് ലഭ്യമാക്കുക, പ്രാഥമിക ആരോഗ്യ കേന്ദ്രങ്ങളെ കുടുംബാരോഗ്യ കേന്ദ്രങ്ങളാക്കി പ്രവര്ത്തന മേഖല വിപുലപ്പെടുത്തുക, രോഗികള്ക്ക് ചികിത്സാമാര്ഗ്ഗരേഖ (പ്രോട്ടോകോള്) പ്രകാരം ഗുണമേന്മയുള്ള ചികിത്സയും പരിചരണവും ലഭ്യമാക്കുക എന്നിവയാണ് ആര്ദ്രം പദ്ധതിയുടെ പ്രധാന ലക്ഷ്യങ്ങള്. കുടുംബാരോഗ്യ കേന്ദ്രങ്ങള് വഴി ഒരു കുടുംബത്തിലെ എല്ലാ അംഗങ്ങളുടെയും ആരോഗ്യസംബന്ധമായ ആവശ്യങ്ങള് നിറവേറ്റും. ആവശ്യമെങ്കില് ഉയര്ന്ന തലത്തിലേക്ക് രോഗികളെ റഫര് ചെയ്യുകയും രോഗപ്രതിരോധ പ്രവര്ത്തങ്ങള്, പുനരധിവാസ പ്രവര്ത്തനങ്ങള് എന്നിയില് കാര്യക്ഷമമായി ഇടപെടുകയും ചെയ്യും.
ഒ.പി. വിഭാഗവും ആശുപത്രികളും രോഗി സൗഹൃദമാക്കല്...
ഒ.പി. വിഭാഗത്തിലെ തിരക്ക് കുറക്കുന്നതിനായി ആധുനികവത്കരിച്ച രജിസ്ട്രേഷന്, ടോക്കണ് സംവിധാനങ്ങള്, രോഗികളുടെ സ്വകാര്യത ഉറപ്പുവരുത്തുന്ന കണ്സള്ട്ടേഷന് റൂമുകള് എന്നിവ സജ്ജമാക്കും. അത്യാഹിതവിഭാഗം, ഐ.പി.വിഭാഗം, ലബോറട്ടറി ഉള്പ്പെടെ മറ്റ് പരിശോധന സംവിധാനങ്ങള് ഫാര്മസി, പ്രസവമുറി, ഓപ്പറേഷന് തീയറ്ററുകള് എന്നിവയിലെ സൗകര്യങ്ങള് മാനദണ്ഡങ്ങള്ക്കനുസരിച്ച് ക്രമീകരിക്കുകയും ചെയ്യും.
ആരോഗ്യ സ്ഥാപനങ്ങളുടെ ഗുണനിലവാരമുയര്ത്തുക...
വിവിധ വിഭാഗം ആശുപത്രികളിലേയും പി.എച്ച്.സി, സി.എച്ച്.സികളിലേയും ആരോഗ്യസേവനങ്ങള് വിപുലപ്പെടുത്തുന്നതിന് ഡോക്ടര്മാര് അടക്കമുള്ളവരുടെ തസ്തികള് സൃഷ്ടിച്ച് നിയമനം നടത്തും. വ്യത്യസ്ഥ സൗകര്യങ്ങളോടെ പ്രവര്ത്തിക്കുന്ന ജില്ലാ/താലൂക്ക്/ബ്ലോക്ക്/ഗ്രാമപഞ്ചായത്തുതല ആരോഗ്യസ്ഥാപനങ്ങളില് നിശ്ചിത മാനദണ്ഡങ്ങളുടെ അടിസ്ഥാനത്തില് ചികില്സാസൗകര്യങ്ങള് (സ്ഥാപനങ്ങളുടെ സ്റ്റാന്റേഡൈസേഷന്) പുന:ക്രമീകരിക്കാനും ആര്ദ്രം ലക്ഷ്യമിടുന്നു.
ഓരോ ആശുപത്രികളിലും മാസ്റ്റര്പ്ലാനിന്റെ അടിസ്ഥാനത്തില് ആധുനിക സൗകര്യങ്ങള് സജ്ജമാക്കാന് ഉദ്ദേശിക്കുന്ന ദൗത്യത്തില് ജില്ലാതല ആശുപത്രികളില് കാത്ത് ലാബ് സൗകര്യത്തോടെയുള്ള കാര്ഡിയോളജി യൂണിറ്റുകളും മറ്റു ചില സൂപ്പര്സ്പെഷ്യാലിറ്റിവകുപ്പുകളും ഘട്ടം ഘട്ടമായി ആരംഭിക്കുന്നതാണ്. കൂടാതെ താലൂക്ക്തല ആശുപത്രികളില് ഡയാലിസിസ് ഉള്പ്പെടെ സ്പ്പെഷ്യാലിറ്റി സൗകര്യങ്ങള് സജ്ജമാക്കി ആധുനികവത്കരണവും ലക്ഷ്യമിടുന്നു.
കുടുംബരോഗ്യകേന്ദ്രങ്ങള്...
പ്രാഥമികാരോഗ്യകേന്ദ്രങ്ങളെ കുടുംബ ആരോഗ്യകേന്ദ്രങ്ങളാക്കി മാറ്റുന്നതിനും ആര്ദ്രം ലക്ഷ്യമിടുന്നു. പ്രാഥമികാരോഗ്യ പരിചരണത്തിന്റെ നെടുംതൂണായ പി.എച്ച്.സിയും ഉപകേന്ദ്രങ്ങളും രോഗാതുരതയിലുണ്ടായ മാറ്റത്തിനും ജനങ്ങളുടെ പ്രതീക്ഷകള്ക്കൊപ്പം വിപുലപ്പെടുത്തും. മാത്യ-ശിശു ആരോഗ്യകാര്യങ്ങള്ക്കും പകര്ച്ചവ്യാധി പ്രതിരോധത്തിനുമൊപ്പം രക്തസമ്മര്ദ്ദം, പ്രമേഹം ഉള്പ്പെടെ ജീവിതശൈലി രോഗപ്രതിരോധത്തിനും നിയന്ത്രണത്തിനും ഊന്നല് നല്കുന്നവയായും അവയെ മാറ്റും.
കുടുംബ ഡോക്ടര് (ഫാമിലി ഫിസിഷ്യന്) തലത്തിലേക്ക് ഈ മേഖലയിലെ ഡോക്ടര്മാരെ മാറ്റുന്നതിനും അവരുടെ അറിവും കഴിവും വര്ദ്ധിപ്പിക്കുന്നതിനായി പരിശീലനങ്ങളും കോഴ്സുകളും നടത്തും. ഈ സെന്ററുകളില് ലാബ് സൗകര്യങ്ങളും സജ്ജമാക്കും. ആരോഗ്യപരിചരണം, കൗണ്സലിംഗ് എന്നിവയില് കുറെകൂടി ഉയര്ന്ന തോതിലുള്ള പങ്കാളിത്തവും ഇടപെടലും നഴ്സിംഗ് വിഭാഗത്തിലൂടെയും ലക്ഷ്യമിടുന്നു.
കേരള മെഡിക്കല് സര്വീസസ് കോര്പറേഷനിലൂടെ മരുന്ന് ലഭ്യത ഉറപ്പുവരുത്തും. ഫീല്ഡ് സ്റ്റാഫ്, സൂപ്പര്വൈസര്മാര് എന്നിവരെ പുതിയ ചുമതലകളാല് പ്രാപ്തരാക്കുന്നതിനായി പരിശീലനപരിപാടികളും നടപ്പാക്കും. ആശമാരുടെ സേവനവും കൂറെകൂടി വ്യക്തമായ രീതിയില് പ്രയോജനപ്പെടുത്താന് ലക്ഷ്യമിടുന്നു. വാര്ഡ്തല ആരോഗ്യശുചിത്വസമിതി, തദ്ദേശസ്വയംഭരണ സ്ഥാപനങ്ങള് എന്നിവയുടെ ഉയര്ന്ന തലത്തിലുള്ള പങ്കാളിത്തം ആര്ദ്രം ദൗത്യം ഉറപ്പാക്കുന്നു. ആരോഗ്യസ്ഥാപനങ്ങളെ രോഗി സൗഹ്യദമാക്കാനും അവയുടെ പ്രവര്ത്തനങ്ങള് കാര്യക്ഷമമാക്കാനുമുള്ള ഈ ദൗത്യ ത്തില് ആശുപത്രി മാനേജ്മെന്റ് കമ്മിറ്റികളുടെ പങ്കാളിത്തത്തിന് വലിയ പ്രാധാന്യമാണുള്ളത്.
സംസ്ഥാന മുഖ്യമന്ത്രിയുടെയും ആരോഗ്യ, കുടുംബക്ഷേമ, സാമൂഹ്യനീതി വകുപ്പ് മന്ത്രിയുടെയും നേത്യത്വത്തില് അഡീഷനല് ചീഫ് സെക്രട്ടറി (ഹെല്ത്ത്) ചീഫ് എക്സിക്യൂട്ടീവ് ഓഫീസറായ സംസ്ഥാനതല സമിതി സംസ്ഥാനതലത്തിലും ജില്ലാ പഞ്ചായത്ത് പ്രസിഡന്റ്, ജില്ലാകളക്ടര്, ഡി.എം.ഒ. എന്നിവരുടെ നേതൃത്വത്തിലുള്ള സമിതി ജില്ലാതലത്തിലും ആര്ദ്രം ദൗത്യത്തിന്റെ മേല്നോട്ടവും ഏകോപനവും നിര്വഹിക്കും.
https://www.facebook.com/Malayalivartha
