പൊതുപ്രവര്‍ത്തകര്‍ക്കിടയിലെ അഴിമതി അക്ഷന്തവ്യമായ അപരാധമാണെന്ന സുപ്രീം കോടതി വിധി പുറത്തുവന്നതിന്റെ പിറ്റേന്ന് ലോകമെമ്പാടുമുള്ള മലയാളികളുടെ തല കുനിപ്പിച്ച ഒരു സംഭവം സുപ്രീം കോടതിയില്‍ നടന്നത് അധികാരം അറിഞ്ഞില്ല.

മലയാളിയായ മുന്‍ ചീഫ് ജസ്റ്റിസ്, കെ.ജി.ബാലകൃഷ്ണന്റെ ബന്ധുക്കള്‍ തങ്ങളുടെ യഥാര്‍ത്ഥ സ്വത്തുവിവരം മറച്ചു വച്ചതായുള്ള ആദായ നികുതി വകുപ്പിന്റെ കണ്ടെത്തലാണ് സുപ്രീം കോടതിയില്‍ സമര്‍പ്പിച്ചത്.

കെ.ജി.ബിയുടെ മരുമകന്‍ ശ്രീനിജന്റ 2009-10 ലെ സ്വത്ത് 1.64 കോടിയായിരുന്നു. എന്നാല്‍ ആദായ നികുതി വകുപ്പിന് അദ്ദേഹം നല്‍കിയ കണക്ക് 26.61 ലക്ഷം എന്നായിരുന്നു. 2010-11ല്‍ സ്വത്ത് 2.11 കോടി. വെളിപ്പെടുത്തിയ കണക്ക് 47.47 ലക്ഷം. യഥാര്‍ത്ഥ കണക്ക് കണ്ടെത്തിയപ്പോള്‍ നികുതി അടച്ച് രക്ഷപ്പെട്ടു.

കെ.ജി.ബിയുടെ മരുമകന്‍ എം.ജെ. ബെന്നിയുടെ 2010-11 ലെ യഥാര്‍ത്ഥ വരുമാനം 1.79 കോടിയാണ്. വെളിപ്പെടുത്തിയത് 28.94 ലക്ഷം.ശ്രീനിജന്‍ ഹൈക്കോടതിയില്‍ അഭിഭാഷകന്‍ മാത്രമാണ്. ശ്രീനിജനും ബെന്നിക്കും ഇത്രയധികം സമ്പത്തുണ്ടാകാനുള്ള കുടുംബ സ്വത്ത് ഇല്ല.

സുപ്രീം കോടതിയിലുള്ള വിവിധ കേസുകളില്‍ ചീഫ് ജസ്റ്റിസിനെ സ്വാധീനിക്കാന്‍ തത്പരകക്ഷികള്‍ ശ്രീനിജനെയും ബെന്നിയെയും സമീപിച്ചിരുന്നതായി റിപ്പോര്‍ട്ടുകളുണ്ട്. ഏതായാലും ആവശ്യം നേടാനുള്ളവര്‍ വെറുംകൈയോടെ ഉന്നതരുടെ ബന്ധുക്കളെ സമീപിക്കുകയില്ലെന്ന കാര്യം ഉറപ്പാണ്. ഇനി വസ്തുത തിരിച്ചാണെങ്കില്‍ ഇവര്‍ എന്തു കൊണ്ട് യഥാര്‍ത്ഥ കണക്ക് മറച്ചു വച്ചു..?ബന്ധുക്കളുടെ പേരില്‍ കെ.ജി.ബി അനധികൃത സ്വത്തു സമ്പാദിച്ചെന്നാണ് പ്രശസ്ത നിയമജ്ഞന്‍ പ്രശാന്ത് ഭൂഷന്റെ ആരോപണം. കെ.ജി.ബി, ചീഫ് ജസ്റ്റിസായിരിക്കെ ഇത്തരമൊരു ആരോപണം ഉണ്ടായെങ്കിലും അന്ന് അധികാരത്തിലുണ്ടായിരുന്ന യു.പി.എ സര്‍ക്കാര്‍ ഇടപെട്ട് കെ.ജി.ബിയെ രക്ഷിച്ചിരുന്നു. തുടര്‍ന്ന് അദ്ദേഹത്തിന് അംഗീകാരമെന്നോണം ദേശീയ മനുഷ്യാവകാശ കമ്മീഷന്റെ അധ്യക്ഷ പദവി നല്‍കുകയും ചെയ്തു.

ആദായ നികുതി വകുപ്പ് റിപ്പോര്‍ട്ട് സമര്‍പ്പിച്ചിരിക്കുന്നത് സുപ്രീം കോടതിയിലാണ്. ജയലളിതക്കൊപ്പം നിന്ന് ശതകോടികള്‍ സമ്പാദിച്ച ശശികലയുടെ വിധി തീരുമാനിച്ച സുപ്രീം കോടതി ഇക്കാര്യത്തില്‍ എന്തു തീരുമാനിക്കുമെന്ന് കണ്ടറിയാം.