സംസ്ഥാന പോലീസ് മേധാവി സ്ഥാനത്തുനിന്ന് ടി.പി. സെന്‍കുമാറിനെ നീക്കിയ നടപടിക്കെതിരെ സുപ്രീംകോടതിയുടെ ഇടപെടല്‍. വ്യക്തിപരമായ വിലയിരുത്തലുകളുടെ അടിസ്ഥാനത്തിലായിരുന്നു സര്‍ക്കാര്‍ നടപടിയെന്നും ഇത് ഗൗരവകരമായ വിഷയമാണെന്നും കോടതി നിരീക്ഷിച്ചു.

പത്രവാര്‍ത്തകളുടെ അടിസ്ഥാനത്തില്‍ എങ്ങനെയാണ് സര്‍ക്കാര്‍ നടപടിയെടുക്കുക എന്ന് കോടതി ചോദിച്ചു. ഇത്തരത്തില്‍ നടപടിയെടുത്താല്‍ പോലീസില്‍ ആളുണ്ടാവുമോ? ഈ മാസം 27-ന് മുമ്പ് സര്‍ക്കാര്‍ വിശദീകരണം നല്‍കണമെന്നും കോടതി ഉത്തരവിട്ടു.

പോലീസ് മേധാവി സ്ഥാനത്തുനിന്ന് തന്നെ നീക്കിയ നടപടി ശരിവെച്ച ഹൈക്കോടതി വിധിക്കെതിരെ സെന്‍കുമാര്‍ നല്‍കിയ അപ്പീല്‍പരിഗണിക്കുകയായിരുന്നു കോടതി.

രാഷ്ട്രീയ പ്രതികാരത്തിന്റെ ഭാഗമായാണ് തന്നെ നീക്കിയതെന്നായിരുന്നു ഹര്‍ജിയില്‍ അദ്ദേഹം പറഞ്ഞിരുന്നത്. ചട്ടങ്ങള്‍ പാലിക്കാതെയാണ് സര്‍ക്കാരിന്റെ നടപടിയെന്നും അദ്ദേഹം ചൂണ്ടിക്കാണിച്ചിരുന്നു. എന്നാല്‍ ഇതൊരു സാധാരണ നടപടിക്രമം മാത്രമാണെന്നാണ് സര്‍ക്കാരിന്റെ പക്ഷം.

പോലീസ് മേധാവിയെന്ന നിലയില്‍ പുറ്റിങ്ങല്‍ വെടിക്കെട്ടപകടവും പെരുമ്പാവൂര്‍ ജിഷ വധക്കേസും ടി.പി. സെന്‍കുമാറിന് ഫലപ്രദമായി കൈകാര്യം ചെയ്യാനായില്ലെന്നാണ് സംസ്ഥാന സര്‍ക്കാറിന്റെ നിലപാട്. കഴിഞ്ഞ സര്‍ക്കാരിന്റെ നടപടികളുടെ തുടര്‍ച്ചയായാണ് സെന്‍കുമാറിനെ നീക്കിയതെന്നും സര്‍ക്കാര്‍ പറയുന്നു. ഈ മാസം 27-ന് കേസ് വീണ്ടും പരിഗണിക്കും. സര്‍വീസില്‍ ഇനി അധിക കാലമില്ലെന്നും അതിനാല്‍ വേഗം നടപടി വേണമെന്നുമുള്ള എന്ന സെന്‍കുമാറിന്റെ ആവശ്യം പരിഗണിച്ചാണ് കേസ് 27-ന് പരിഗണിക്കുന്നത്.

ഡി.ജി.പി ആയിരുന്നപ്പോള്‍ സി.പി.എം നേതാക്കള്‍ക്കെതിരെ നടപടിയെടുത്തത് കൊണ്ടാണ് തന്റെ ഔദ്യോഗികം ജീവിതം തകര്‍ന്നതെന്നും ഇത് സി.പി.എം പകപോക്കലിന്റെ ഭാഗമായിരുന്നുവെന്നും സെന്‍കുമാര്‍ അപ്പീലില്‍ ചൂണ്ടിക്കാട്ടിയിരുന്നു.

ടി.പി ചന്ദ്രശേഖരന്‍ വധക്കേസ്, ഷൂക്കൂര്‍ വധക്കേസ്, കതിരൂര്‍ മനോജ് വധക്കേസ് എന്നിവയില്‍ സി.പി.എം നേതാക്കളുടെ പങ്ക് താന്‍ അന്വേഷിച്ചിരുന്നു. കതിരൂര്‍ മനോജ് വധക്കേസില്‍ സി.പി.എം കണ്ണൂര്‍ ജില്ലാ സെക്രട്ടറിയായിരുന്ന പി.ജയരാജന്റെ പങ്ക് അന്വേഷിച്ചത് കൊണ്ടാണ് തന്നെ ഡി.ജി.പി സ്ഥാനത്ത് നിന്നു മാറ്റാന്‍ കാരണമായതെന്നും സെന്‍കുമാര്‍ അപ്പീലില്‍ ചൂണ്ടിക്കാട്ടി. തന്റെ നടപടി സി.പി.എം കേന്ദ്രങ്ങളെ വലിയ തോതില്‍ ഭയപ്പെടുത്തിയിരുന്നു. ഇത് തന്റെ ഔദ്യോഗിക ജീവിതം തന്നെ തകര്‍ത്തൂവെന്നും അദ്ദേഹം പറഞ്ഞു.

താന്‍ ഡി.ജി.പി ആയിരുന്നപ്പോള്‍ കണ്ണൂരില്‍ ഒരു കൊലപാതകം മാത്രമായിരുന്നു നടന്നത്. എന്നാല്‍ അതിന് ശേഷം കണ്ണൂരില്‍ ഒമ്പത് കൊലപാതകമാണ് നടന്നത്. ജൂലൈ 19 മുതലുള്ള കണക്കാണിത്. പിണറായി സര്‍ക്കാര്‍ അധികാരമേറ്റ ശേഷം നിരവധി പോലീസ് ഉദ്യോഗസ്ഥരെയാണ് രണ്ട് വര്‍ഷം പൂര്‍ത്തിയാക്കുന്നതിന് മുന്നെ സ്ഥലം മാറ്റിയത്. ഇത് എത്ര പരിതാപകരമായ അവസ്ഥയിലേക്കാണ് പോവുന്നത് എന്നതിന് തെളിവാണെന്നും സെന്‍കുമാര്‍ ചൂണ്ടിക്കാട്ടിയിരുന്നു.