വൈവാഹിക സൈറ്റിലൂടെ വിവാഹ തട്ടിപ്പ് നടത്തിയ ഒരാളുടെ ജാമ്യാപേക്ഷ പരിഗണിക്കുന്നതിനിടെ വിവാഹം തീരുമാനിച്ചു എന്ന പേരില്‍ ലൈംഗിക ബന്ധത്തില്‍ ഏര്‍പ്പെടുന്നത് സൂക്ഷിച്ചു വേണമെന്ന ഉപദേശവുമായി സുപ്രീംകോടതി. ഉഭയസമ്മത പ്രകാരമുള്ള ബന്ധങ്ങള്‍ പിന്നീട് വഷളാകുമ്പോള്‍ ശിക്ഷിക്കുന്നത് ശരിയല്ലെന്ന് കോടതി ജസ്റ്റിസ് നാഗരത്‌ന അധ്യക്ഷയായ ബെഞ്ചിന്റേതാണ് പരാമര്‍ശം. തങ്ങള്‍ പഴഞ്ചന്മാരായിരിക്കും എന്നും എന്നാല്‍ വിവാഹത്തിന് മുമ്പ് ഇത്തരം ബന്ധങ്ങള്‍ സൂക്ഷിച്ചുവേണമെന്നുമാണ് കോടതിയുടെ ഉപദേശം.

വൈവാഹിക സൈറ്റിലൂടെ വിവാഹ തട്ടിപ്പ് നടത്തിയ ഒരാളുടെ ജാമ്യാപേക്ഷ പരിഗണിക്കുന്നതിനിടെയാണ് കോടതി പരാമര്‍ശം. തന്നെ വിവാഹം ചെയ്യാമെന്ന വാഗ്ദാനം നല്‍കി ലൈംഗികബന്ധത്തിന് പ്രേരിപ്പിക്കുകയായിരുന്നു എന്നാണ് യുവതിയുടെ പരാതി. ഇയാളെ പരിചയപ്പെട്ട ശേഷം കാണാന്‍ യുവതി ദുബൈയില്‍ അടക്കം പോയിരുന്നു. എന്തിനാണ് വിവാഹത്തിന് മുമ്പ് ഇത്തരം യാത്രകള്‍ എന്നും കോടതി യുവതിയോട് ചോദിച്ചു.

'ഞങ്ങള്‍ പഴയ ചിന്താഗതിക്കാരായിരിക്കാം' എന്നു പറഞ്ഞ കോടതി, വിവാഹത്തിന് മുന്‍പ് ഒരു സ്ത്രീയും പുരുഷനും അപരിചിതരാണെന്നും ഇത്തരം സാഹചര്യങ്ങളില്‍ ജാഗ്രത പാലിക്കണമെന്നും ഓര്‍മ്മിപ്പിച്ചു. ബന്ധം എത്രത്തോളം ദൃഢമാണെങ്കിലും വിവാഹത്തിന് മുന്‍പ് ശാരീരിക ബന്ധത്തില്‍ ഏര്‍പ്പെടുന്നത് മനസ്സിലാക്കാന്‍ കഴിയുന്നില്ല. ജാഗ്രത വേണം. വിവാഹത്തിന് മുന്‍പ് ആരെയും അന്ധമായി വിശ്വസിക്കരുത്. പ്രത്യേകിച്ച് ശാരീരിക ബന്ധങ്ങളുടെ കാര്യത്തില്‍ അതീവ ജാഗ്രത പാലിക്കണമെന്ന് കോടതി സ്ത്രീകളോട് നിര്‍ദേശിച്ചു. ജസ്റ്റിസുമാരായ ബി വി നാഗരത്‌ന, ഉജ്ജ്വല്‍ ഭുയാന്‍ എന്നിവരടങ്ങിയ ബെഞ്ചാണ് പരാമര്‍ശം നടത്തിയത്.

2022ല്‍ മാട്രിമോണിയല്‍ സൈറ്റിലൂടെയാണ് പരാതിക്കാരിയും യുവാവും പരിചയപ്പെട്ടത്. വിവാഹ വാഗ്ദാനം നല്‍കി യുവാവ് ഡല്‍ഹിയിലും ദുബൈയിലും വെച്ച് പീഡിപ്പിച്ചുവെന്നാണ് 30 വയസ്സുകാരിയായ യുവതിയുടെ പരാതി. സമ്മതമില്ലാതെ ദൃശ്യങ്ങള്‍ പകര്‍ത്തി ഭീഷണിപ്പെടുത്തിയെന്നും യുവതി ആരോപിച്ചു.

യുവാവ് നേരത്തെ വിവാഹിതനാണെന്ന വിവരം മറച്ചുവെച്ചുവെന്നും 2024 ജനുവരിയില്‍ മറ്റൊരു വിവാഹം കഴിച്ചിരുന്നുവെന്നും യുവതി കണ്ടെത്തി. അതേസമയം ഉഭയസമ്മത പ്രകാരമുള്ള ബന്ധങ്ങള്‍ പിന്നീട് വഷളാകുമ്പോള്‍ ശിക്ഷിക്കുന്നത് ശരിയല്ലെന്ന് കോടതി വ്യക്തമാക്കി. ഈ കേസില്‍ മധ്യസ്ഥ ചര്‍ച്ചയ്ക്കുള്ള സാധ്യതകള്‍ പരിശോധിക്കാന്‍ കോടതി നിര്‍ദ്ദേശിച്ചു. കേസ് കൂടുതല്‍ വാദം കേള്‍ക്കുന്നതിനായി ബുധനാഴ്ചത്തേക്ക് മാറ്റി.