വിമാനത്താവളത്തില്‍ നിന്നും പറന്നുയര്‍ന്ന യാത്രാവിമാനം യന്ത്ര തകരാറിനെ തുടര്‍ന്ന് അടിയന്തിരമായി തിരിച്ചിറക്കിയതിനാല്‍ വന്‍ ദുരന്തം ഒഴിവായി. തിരുവനന്തപുരം വിമാനത്താവളത്തില്‍ നിന്നും പുറപ്പെട്ട കുവൈറ്റ് എയര്‍വെയ്‌സ് യാത്രാവിമാനമാണ് യന്ത്രതകരാറിനെ തുടര്‍ന്ന് അടിയന്തിരമായി തിരിച്ചിറക്കിയത്.

പുലര്‍ച്ചെ രണ്ടോടെയാണ് തിരുവനന്തപുരത്ത് നിന്നും വിമാനം പുറപ്പെട്ടത്. മൂന്നരയോടെ വിമാനത്തിന് സാങ്കേതിക തകരാര്‍ കണ്ടെത്തിയതോടെ വിമാനം ആകാശത്ത് വട്ടമിട്ട് പറക്കുകയും പൈലറ്റ് വിമാനത്താവള അധികൃതരുമായി ബന്ധപ്പെട്ട് അടിയന്തര ലാന്‍ഡിംഗിന് അനുമതി തേടുകയായിരുന്നു. അടിയന്തര ലാന്റിംഗിന് സൗകര്യം ചെയ്ത് വിമാനം നിലത്തിറക്കുകയായിരുന്നു.

128 യാത്രക്കാര്‍ വിമാനത്തില്‍ ഉണ്ടായിരുന്നു. വിമാനത്തിന്റെ യന്ത്രത്തകരാര്‍ പരിഹരിച്ച ശേഷം പുലര്‍ച്ചെ ആറരയോടെ വിമാനം കുവൈറ്റിലേക്ക് പറന്നു.