വനിതകളെ ഭയപ്പെട്ട് രാഷ്ട്രീയ നേതൃത്വം. വനിതയെങ്കില്‍ ഫോണ്‍ അറ്റന്‍ഡ് ചെയ്യരുതെന്ന് പിഎമാര്‍ക്ക് നിര്‍ദ്ദേശം നല്‍കി മന്ത്രിമാര്‍. വനിതാ മാധ്യമപ്രവര്‍ത്തകരും പ്രതിസന്ധിയില്‍. എ കെ ശശീന്ദ്രന്റെ സ്വകാര്യസംഭാഷണം മംഗളം ചാനല്‍ സംപ്രേഷണം ചെയ്തതും മന്ത്രിസ്ഥാനത്ത് നിന്നുള്ള രാജിയും മാധ്യമധാര്‍മ്മികതയിലൂന്നിയുള്ള ചര്‍ച്ചകളെ സജീവമാക്കുമ്പോള്‍ വനിതാ മാധ്യമപ്രവര്‍ത്തകയായതിനാല്‍ നേരിട്ട ദുരനുഭവം വിവരിച്ച ന്യൂസ് 18 ചാനല്‍ റിപ്പോര്‍ട്ടര്‍ സുവി വിശ്വനാഥന്‍. മലപ്പുറം ഉപതെരഞ്ഞെടുപ്പിന് മുന്നോടിയായി ജില്ലയിലെ സിപിഐഎമ്മിന്റെ മുതിര്‍ന്ന നേതാവ് ടികെ ഹംസയെ അഭിമുഖത്തിനായി സമീപിച്ചപ്പോള്‍ പെണ്‍കുട്ടികള്‍ക്ക് അഭിമുഖം തരില്ല, ആണ്‍കുട്ടിയാണെങ്കില്‍ വന്നോളൂ എന്ന് അറിയിച്ചതായി സുവി വിശ്വനാഥന്‍. തന്നെ എകെ ശശീന്ദ്രനാക്കാനാണോ എന്നും ടി കെ ഹംസ മാധ്യമപ്രവര്‍ത്തകയോട് ചോദിച്ചു.
അഭിമുഖം ചെയ്യാന്‍ അനുവാദം ചോദിക്കാനാണ് വിളിച്ചത്. പെണ്‍കുട്ടിയാണെങ്കില്‍ വരേണ്ട ആണ്‍ കുട്ടികളെ ആരെയെങ്കിലൂം വിടൂ എന്നാണ് ടികെ ഹംസ പറഞ്ഞത്. സിപിഎമ്മിന്റെ മുതിര്‍ന്ന നേതാവല്ലെ എന്ന് ചോദിച്ചപ്പോള്‍ മുതിര്‍ന്ന നേതാവായത് കൊണ്ടാണ് മുന്‍കരുതലെന്നും പറഞ്ഞു. ക്യാമറാമാനും കൂടെയുണ്ടാകും എന്ന് പറഞ്ഞെങ്കിലും ആണ്‍കുട്ടികളെ ആരെയെങ്കിലും വിടൂ അപ്പോള്‍ അഭിമുഖം തരാമെന്നാണ് അദ്ദേഹം പറഞ്ഞത്. 
സിപിഐഎമ്മിന്റെ മുതിര്‍ന്ന നേതാക്കളിലൊരാളായ ടി കെ ഹംസ വനിതാ മാധ്യമപ്രവര്‍ത്തകയ്ക്ക് അഭിമുഖത്തിന് അനുമതി നിഷേധിച്ചത് സാമൂഹിക മാധ്യമങ്ങളിലും ചര്‍ച്ചയായിട്ടുണ്ട്. സദാചാര പ്രശ്‌നങ്ങള്‍ക്കെതിരെ ശക്തമായ നിലപാടെടുക്കുന്ന ഒരു സിപിഐഎം നേതാവ് ഇത്തരമൊരു നിലപാടെടുത്തതിലെ വൈരുദ്ധ്യവും സുവി വിശ്വനാഥന്‍ ചൂണ്ടിക്കാട്ടുന്നു.
ഗതാഗത മന്ത്രിയായിരിക്കേ എ കെ ശശീന്ദ്രനുമായുള്ള സ്വകാര്യസംഭാഷണം പകര്‍ത്തിയത് വനിതാ മാധ്യമപ്രവര്‍ത്തകയാണെന്നും ഇത് മന്ത്രിയെ കുരുക്കാന്‍ ആസൂത്രണം ചെയ്ത കെണിയാണെന്നും റിപ്പോര്‍ട്ടുകളുണ്ടായിരുന്നു. മാധ്യമപ്രവര്‍ത്തനത്തിന്റെ ധാര്‍മ്മികതയും വിശ്വാസ്യതയും തകര്‍ക്കുന്ന ഇത്തരം ആരോപണങ്ങള്‍ പ്രധാനമായും വനിതാ മാധ്യമപ്രവര്‍ത്തകരെയാണ് ബാധിക്കുന്നതെന്ന് അനുഭവങ്ങളെ മുന്‍നിര്‍ത്തി മറ്റ് ചില മാധ്യമപ്രവര്‍ത്തകരും ഫേസ്ബുക്കിലൂടെ വ്യക്തമാക്കുന്നു.