മംഗളം ചാനലിന്റെ ഹണിഡ്രാപ് വിവാദത്തില്‍ ചാനലില്‍ നിന്നും രാജി തുടരുന്നു. മംഗളം ചാനലിലെ കോഴിക്കോട് ബ്യൂറോയില്‍ ഡ്രൈവറായി ജോലി ചെയ്യുന്ന സാജന്‍ എകെയാണ് ഫേസ്ബുക്കിലൂടെ അധാര്‍മ്മികതയ്ക്കു വളയം പിടിക്കാനാവില്ലെന്ന് പ്രഖ്യാപിച്ച് രാജിവച്ചത്.

ഞാന്‍ മാധ്യമപ്രവര്‍ത്തകനല്ലെങ്കിലും അവരോടൊപ്പം യാത്ര ചെയ്യാന്‍ തുടങ്ങിയിട്ട് പതിമൂന്ന് വര്‍ഷത്തോളമായി. ഇതല്ല മാധ്യമ ധര്‍മ്മമെന്ന് എനിക്ക് നന്നായി അറിയാം. മാധ്യമ പ്രവര്‍ത്തകര്‍ക്കപ്പുറം എല്ലാ മേഖലയിലെയും തൊഴിലാളികള്‍ക്ക് ഈ പ്രതിച്ഛായയില്‍ ജോലി ചെയ്യുന്നത് അസഹനീയമാണ്. അങ്ങനെയുളള ഒരാളായി ഞാന്‍ ഈ പടിയിറങ്ങുകയാണ്. ഇത്രയും ദിവസം നിങ്ങളുടെ പക്ഷത്ത് അല്‍പ്പമെങ്കിലും ശരി ഉണ്ടെന്ന് കരുതിയിരുന്നു.

ഇന്ത്യാവിഷനില്‍ തുടങ്ങിയ ജോലി മംഗളത്തിലെത്തിയത് നാല് മാസം മുമ്ബാണ്. ഇനി എന്താണെന്നറിയില്ല. പക്ഷെ ഈ പ്രതിച്ഛായയുടെ തണലില്‍ നിന്നുകൊണ്ടുള്ള ശന്പളം വാങ്ങാന്‍ എനിക്കാവില്ല. പണി ഇല്ലാതെ അലഞ്ഞിട്ടുണ്ട്. പട്ടിണി കിടന്നിട്ടുണ്ട്. ആത്മാഭിമാനമായിരുന്നു കൈമുതല്‍. അത് ഇന്നും ഉണ്ട്. അതുകൊണ്ട് മംഗളം ഗുഡ്‌ബൈ. സാജന്‍ തന്റെ ഫേസ്ബുക്ക് പോസ്റ്റില്‍ എഴുതുന്നു. മംഗളത്തിലെ നല്ലവരായ തൊഴിലാളികളോട് നന്ദി മാത്രം എന്ന് പറഞ്ഞുകൊണ്ടാണ് പോസ്റ്റ് അവസാനിപ്പിക്കുന്നത്.

നേരത്തെ ഇന്ത്യാ വിഷനില്‍ ജോലി ചെയ്തിരുന്ന സാജന്‍ കഴിഞ്ഞ നാല് മാസമായി മംഗളത്തിന്റെ കോഴിക്കോട് ബ്യൂറോയിലാണ് ജോലി ചെയ്യുന്നത്. ഇന്ത്യാവിഷനിലെ ജീവനക്കാര്‍ക്ക് ഏറെ മാസം ശമ്ബളം കൊടുക്കാതെ തിരഞ്ഞെടുപ്പില്‍ മത്സരിക്കാനെത്തിയ ഡോ എംകെ മുനീറിനെതിരെ കോഴിക്കോട് നിയമസഭാ തിരഞ്ഞെടുപ്പില്‍ സാജന്‍ സ്വതന്ത്രസ്ഥാനാര്‍ത്ഥിയായി മത്സരിച്ചിരുന്നു.

ജയിക്കാനല്ല മത്സരം, ജോലിക്ക് കൂലി അതല്ലേ നന്മ, നല്ല തൊഴിലാളിക്ക് ഒരു വോട്ട് എന്നീ മുദ്രാവാക്യങ്ങളുയര്‍ത്തിയാണ് സാജന്‍ മുനീറിനെതിരായി മത്സരിച്ചത്. അന്ന് സാജന്‍ ഉന്നയിച്ച വിഷയങ്ങള്‍ കോഴിക്കോട് ചര്‍ച്ചയായിരുന്നു പ്രത്യേകിച്ച് തൊഴില്‍ സംഘടനകളുമായി ബന്ധപ്പെട്ട് പ്രവര്‍ത്തിച്ചവര്‍ക്കിടയാണ് ഈ വിഷയം ചര്‍ച്ചയായിരുന്നത്.