പാമ്പാടി  നെഹ്‌റു കോളേജ് വിദ്യാര്‍ത്ഥി ജിഷ്ണു പ്രണോയിയുടെ മരണവുമായി ബന്ധപ്പെട്ട് നിര്‍ണായക തെളിവുകള്‍ പൊലീസിനു ലഭിച്ചു. സാങ്കേതിക സര്‍വ്വകലാശാലയുടെ പരീക്ഷ മാറ്റിവെക്കണമെന്നാവശ്യപ്പെട്ടുള്ള സമരത്തിന് ജിഷ്ണു നേതൃത്വം നല്‍കിയെന്ന് തെളിയിക്കുന്ന രേഖകളാണ് പൊലീസിന് കിട്ടിയത്.

ജിഷ്ണുവിന്റെ മൊബൈല്‍ ഫോണ്‍ പരിശോധിച്ചതില്‍ നിന്നാണ് ഇത് സംബന്ധിച്ച വാട്ട്‌സ് ആപ്പ് സന്ദേശങ്ങളും ഇമെയിലുകളും ലഭിച്ചത്. ജിഷ്ണു സമരത്തിന് നേതൃത്വം നല്‍കിയതാണ് മാനേജ്‌മെന്റിന്റെ ശത്രുതയ്ക്ക് കാരണമായതെന്ന നിഗമനത്തിലാണ് അന്വേഷണ സംഘം. ജിഷ്ണു സമരത്തില്‍ സജീവമായിരുന്നുവെന്ന് തെളിയിക്കുന്ന ഫോണ്‍ സംഭാഷണവും പുറത്തുവന്നിട്ടുണ്ട്.