ഡി.ജി.പി ഓഫീസിനു മുന്നില്‍ സമരം നടത്താനെത്തിയ ജിഷ്ണു പ്രണോയിയുടെ അമ്മയ്ക്കും കുടുംബത്തിനും നേരെ പൊലീസ് നടത്തിയ അതിക്രമത്തെ തുടര്‍ന്ന് ഭരണപരിഷ്‌കാര കമ്മിഷന്‍ ചെയര്‍മാന്‍ വി.എസ്.അച്യുതാനന്ദന്‍ ഡി.ജി.പി ലോക്‌നാഥ് ബെഹ്‌റയെ ശക്തമായ ഭാഷയില്‍ ശാസിച്ചു. പരാതി പറയാനെത്തിയ കുടുംബത്തോട് ഇങ്ങനെയാണോ പൊലീസ് പെരുമാറേണ്ടതെന്ന് ക്ഷുഭിതനായി വി.എസ് ചോദിച്ചു. സമാധാനപരമായി സമരം ചെയ്യുമെന്നാണ് ജിഷ്ണുവിന്റെ മാതാപിതാക്കള്‍ അറിയിച്ചത്. എന്നിട്ടും അവര്‍ക്കു നേരെ ബലപ്രയോഗം നടത്താനും അറസ്റ്റ് ചെയ്യാനും പൊലീസ് തയ്യാറായതെന്തിന് എന്തിനാണെന്നും അദ്ദേഹം ചോദിച്ചു

പൊലീസിനെ കുറിച്ച് ഇപ്പോള്‍ തന്നെ പരാതികളുണ്ട്. ഉപതിരഞ്ഞെടുപ്പ് അടുത്തിരിക്കുന്ന സമയത്ത് സര്‍ക്കാരിന് കളങ്കം വരുത്തുന്ന നടപടികള്‍ പൊലീസ് തുടരുകയാണ്. പൊലീസിനെ നിയന്ത്രിക്കാന്‍ ആരും ഇല്ല എന്നാണോ കരുതന്നതെന്നും വി.എസ് ചോദിച്ചു.

അതേസമയം, ജിഷ്ണുവിന്റെ മാതാപിതാക്കളെ തടഞ്ഞ സംഭവത്തില്‍ പൊലീസിനു വീഴ്ച പറ്റിയെന്നു പ്രതിപക്ഷ നേതാവ് രമേശ് ചെന്നിത്തല പറഞ്ഞു. പൊലീസ് ആസ്ഥാനത്തു നടന്ന സംഭവം ഞെട്ടിക്കുന്നതാണെന്നും അദ്ദേഹം മാദ്ധ്യമ പ്രവര്‍ത്തകരോട് പറഞ്ഞു. സര്‍ക്കാര്‍ ഈ വിഷയത്തില്‍ വേണ്ടവിധം ഇടപെടേണ്ടതായിരുന്നു. സര്‍ക്കാരിന്റെ ഇടപെടല്‍ ആവശ്യപ്പെട്ട് മുഖ്യമന്ത്രിക്കും ഡി.ജി.പിക്കും കത്ത് നല്‍കുമെന്നും ചെന്നിത്തല പറഞ്ഞു.