ഭീകരരെ സഹായിച്ച മലയാളി ഡോക്‌ടര്‍ പിടിയില്‍
ഇന്ത്യന്‍ മുജാഹിദ്ദീന്‍ തലവന്‍ തെഹ്‌സിന്‍ അക്തര്‍ , ബോംബ്‌ നിര്‍മ്മാണ വിദഗ്‌ധനായ പാക്‌ ഭീകരന്‍ വഖാസ്‌ അഹമ്മദ്‌ എന്നിവര്‍ക്ക്‌ സഹായം നല്‍കിയ തൃശൂരിലെ ഡോക്‌ടര്‍ കസ്റ്റഡിയില്‍. തൃശൂര്‍ മെഡിക്കല്‍ കോളേജില്‍ പി.ജി പ്രവേശനത്തിനുളള പരിശീലനം നടത്തുന്ന തെക്കന്‍ജില്ലയില്‍ നിന്നുളള ഡോക്‌ടറാണ്‌ പിടിയിലായത്‌. ഇന്നലെ ഉച്ചയ്‌ക്ക്‌ രണ്ടു മണിയോടെ മെഡിക്കല്‍കോളേജിലെ അലക്കുപുരയ്‌ക്ക്‌ അടുത്തുളള ഇയാളുടെ ഫ്‌ളാറ്റില്‍ നിന്നാണ്‌ ഡല്‍ഹിയില്‍ നിന്നെത്തിയ പ്രത്യേക സംഘം കസ്റ്റഡിയിലെടുത്തത്‌. ഡല്‍ഹിപോലീസ്‌, കേന്ദ്ര ഇന്റലിജന്‍സ്‌ ഏജന്‍സി എന്നിവയിലെ ഉദ്ദ്യോഗസ്ഥരാണ്‌ സമസ്ഥാന രഹസ്യാന്വേഷണ വിഭാഗത്തിന്റെ സഹായത്തോടെ ഡോക്‌ടറെ പിടികൂടിയത്‌.
തിരഞ്ഞടുപ്പിനിടെ രാജ്യത്തുടനീളം സ്‌പോടനങ്ങള്‍ നടത്താന്‍ പദ്ധതിയിടുന്നതിനിടെ രാജസ്ഥാനില്‍ പിടിയിലായ വഖാസിനെയും അക്തറിനെയും ചോദ്യം ചെയ്‌തപ്പോഴാണ്‌ കേരളത്തിലെ ഒരു മെഡിക്കല്‍ കോളേജിലുളള ഡോക്‌ടറുടെ സഹായം ലഭിച്ചതായി പോലീസിന്‌ വിവരം കിട്ടിയത്‌.
പൂനെയിലെ സ്‌ഫോടനത്തില്‍ പരിക്കേറ്റ്‌ വഖാസിനെ ഈ ഡോക്‌ടര്‍ മംഗലാപുരത്തെത്തി ചികിത്സ നല്‍കിയതായി ഡല്‍ഹി പോലീസിന്‌ വിവരം ലഭിച്ചിരുന്നു. അങ്ങനെയാണ്‌ ഡല്‍ഹി പോലീസ്‌ ഡോക്‌ടര്‍ക്കായി വലവിരിച്ചത്‌. മലപ്പുറം പെരുന്തല്‍മണ്ണയിലെ രാജേഷ്‌ എന്നയാളുടെ വിലാസത്തിലെടുത്ത സിംകാര്‍ഡാണ്‌ ഡോക്‌ടര്‍ ഉപയോഗിച്ചിരുന്നത്‌.
തൃശൂര്‍ മെഡിക്കല്‍ കോളേജിലെ ഫോറന്‍സിക്‌ വിഭാഗത്തിലെ ഡോക്‌ടര്‍ എന്നാണ്‌ അന്വേഷണ ഏജന്‍സികള്‍ക്ക്‌ ആദ്യം വിവരം ലഭിച്ചത്‌. പിന്നീട്‌ നടത്തിയ വിശദ അന്വേഷണത്തിലാണ്‌ തൃശൂര്‍ മെഡിക്കല്‍ കോളേജിലെ പൂര്‍വ്വ വിദ്യാര്‍ത്ഥി സംഘടനയുടെ പി.ജി. പ്രവേശനപരീക്ഷ പരിശീലനത്തില്‍ പങ്കെടുക്കുന്നയാളാണ്‌ വഖാസിന്‌ സഹായം ചെയ്‌തതെന്ന്‌ വ്യക്തമായത്‌. കോട്ടയം, തിരുവനന്തപുരം, കോഴിക്കോട് മെഡിക്കല്‍ കോളേജുകളില്‍ നിന്നുമുളള മുതിര്‍ന്ന ഡോക്‌ടറന്മാരാണ്‌ പരിശീലനം നടത്തുന്നത്‌. പരിശീലനം നടത്തുന്ന എല്ലാവരുടെയും വിവരങ്ങള്‍ പരിശോധിച്ചാണ്‌ വഖാസിന്റെ സഹായിയെ കണ്ടെത്തിയത്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
