മന്ത്രി എം.എം. മണി രാജി വയ്ക്കണമെന്നത് പ്രതിപക്ഷത്തിന്റെ രാഷ്ട്രീയ മുദ്രാവാക്യം മാത്രമാണെന്നും അത് അംഗീകരിക്കാന്‍ തയാറല്ലെന്നും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ വ്യക്തമാക്കി. മന്ത്രിസ്ഥാനത്ത് നിന്ന് മാറ്റേണ്ട സാഹചര്യമില്ല. പാര്‍ട്ടിയുടെ യശസ്സിന് യോജിക്കുന്ന പ്രസ്താവനയല്ല സംസ്ഥാനസെക്രട്ടേറിയറ്റംഗമായ മണി നടത്തിയത് എന്നത് കൊണ്ടാണ് പരസ്യ ശാസനയ്ക്ക് തീരുമാനിച്ചത്. അതെല്ലാവര്‍ക്കും ബാധകമാണ്. മുഖ്യമന്ത്രി നിയമസഭയില്‍ പറഞ്ഞത് അദ്ദേഹത്തിന്റെ ശൈലിയെപ്പറ്റിയാണ്.

നിയമസഭയില്‍ തന്നെ ഒരു കോണ്‍ഗ്രസ് നേതാവ് പെമ്പിളൈ എരുമ എന്ന് പറഞ്ഞില്ലേ. അദ്ദേഹത്തിന് കൊടുത്ത ആനുകൂല്യം എന്തുകൊണ്ട് നിങ്ങള്‍ മണിക്ക് കൊടുക്കുന്നില്ല. പ്രസംഗത്തില്‍ ഒരിടത്തും ഒരു സ്ത്രീയെയും ആക്ഷേപിച്ചില്ല എന്ന് അദ്ദേഹം പറഞ്ഞിട്ടുണ്ട്. എന്നാല്‍ അദ്ദേഹത്തിന്റെ മൊത്തം പ്രസംഗം എടുത്തുനോക്കിയാല്‍ ചില പരാമര്‍ശങ്ങള്‍ യശസ്സിന് നിരക്കുന്നതല്ല എന്ന് കണ്ടെത്തിയതിനാണ് നടപടി. പാര്‍ട്ടി നേതാക്കള്‍ പലരും അച്ചടക്കനടപടിക്ക് വിധേയരായിട്ടുണ്ട്. അതൊക്കെ പാര്‍ട്ടി വിദ്യാഭ്യാസത്തിന്റെ ഭാഗമാണ്. ഇ.എം.എസും നായനാരും വി.എസുമെല്ലാം ശാസനയ്ക്ക് വിധേയരായി. വി.എസിനെയും പിണറായിയെയും പി.ബിയില്‍ നിന്ന് മാറ്റി നിറുത്തിയില്ലേ. ഇതൊന്നും കോണ്‍ഗ്രസിന് സ്വീകരിക്കാനാവില്ല.

മൂന്നാറില്‍ കുരിശ് തകര്‍ത്തതുമായി ബന്ധപ്പെട്ട് മാത്രമാണ് വ്യത്യസ്തമായ അഭിപ്രായമുണ്ടായത്. ഒഴിപ്പിക്കലിന് അതിന്റേതായ രീതിയുണ്ട്. ടി.വി ചാനലുകളെ കൊണ്ടുപോയി ലോകവ്യാപകമായി പ്രചരണം നടത്തുന്ന രീതിയില്‍ കൈകാര്യം ചെയ്യേണ്ടിയിരുന്നില്ല എന്നാണ് മുഖ്യമന്ത്രി പറഞ്ഞത്. സി.പി.എം കൈയേറ്റക്കാരുടെ പാര്‍ട്ടിയാണ് എന്ന് സി.പി.ഐ പറഞ്ഞിട്ടില്ല. അങ്ങനെ വരുത്താന്‍ നിങ്ങള്‍ (മാദ്ധ്യമങ്ങള്‍) ശ്രമിക്കുന്നുണ്ട്. സി.പി.എമ്മും സി.പി.ഐയും കൈയേറ്റക്കാരുടെ പാര്‍ട്ടിയല്ല. കൈയേറ്റമൊഴിപ്പിക്കലില്‍ ഒരിടത്തും തെറ്റായ നിലപാട് എടുത്തിട്ടില്ല. വന്‍കിട കൈയേറ്റമൊഴിപ്പിക്കലിനാണ് വി.എസ് സര്‍ക്കാരും മുന്‍ഗണന കൊടുക്കുന്നത്. യു.ഡി.എഫ് സര്‍ക്കാര്‍ യഥേഷ്ടം കൈയേറ്റത്തെ പ്രോത്സാഹിപ്പിച്ചു. 

എല്‍.ഡി.എഫ് സര്‍ക്കാര്‍ വന്ന ശേഷമുള്ള 11 മാസമായി പുതിയ കൈയേറ്റമില്ല. മുന്‍കാലത്ത് നടന്ന കൈയേറ്റങ്ങളാണിപ്പോള്‍ ഒഴിപ്പിക്കേണ്ടി വരുന്നത്. കൈയേറ്റഭൂമി ഏതൊക്കെയെന്ന് വ്യവസ്ഥപ്പെടുത്തി ഓരോന്നിലും ജനങ്ങളെയും മാദ്ധ്യമങ്ങളെയും സഹകരിപ്പിച്ച്, ഉദ്യോഗസ്ഥരെ യോജിപ്പിച്ച് കൊണ്ടുപോകാനാണ് മുഖ്യമന്ത്രി വിളിച്ച ഉദ്യോഗസ്ഥരുടെ യോഗ തീരുമാനം. പട്ടയവിതരണത്തില്‍ കാലതാമസമുണ്ടാകുന്നുണ്ട്. ഏതെങ്കിലും വകുപ്പിന്റെ കുഴപ്പമായല്ല ഇതിനെ കാണുന്നത്. ഉമ്മന്‍ ചാണ്ടി ഭരണകാലത്ത് ഇടുക്കിയില്‍ ഒരു വര്‍ഷത്തിനകം പട്ടയവിതരണം പൂര്‍ത്തിയാക്കുമെന്നും അത് സാധിച്ചാല്‍ റവന്യുമന്ത്രിയായിരുന്ന തിരുവഞ്ചൂരിന് മോതിരം സമ്മാനിക്കുമെന്നും പറഞ്ഞു. ഒരു വര്‍ഷം കഴിഞ്ഞിട്ടും നടന്നില്ലെന്ന് മാത്രമല്ല, തിരുവഞ്ചൂരിന് റവന്യുവകുപ്പ് തന്നെ ഇല്ലാതായി. പട്ടയവിതരണം താമസിപ്പിക്കാനുള്ള പണി എപ്പോഴും നടക്കും. ആ കെണിയില്‍ വീഴരുത്- കോടിയേരി പറഞ്ഞു.