തെരഞ്ഞെടുപ്പ് കൊഴുപ്പിക്കാന് കോടികള് , മദ്യവും യഥേഷ്ടം, അതിര്ത്തി ചെക്ക് പോസ്റ്റുകള് അടച്ചു
തെരഞ്ഞെടുപ്പ് കൊഴുപ്പിക്കാന് കേരളത്തിലേക്ക് കൊണ്ടുവന്ന പത്ത് കോടിയിലധികം രൂപ ഐ.ജി.ഷേഖ് ദര്വേഷ് സാഹിബന്റെ നേതൃത്വത്തിലുളള പ്രത്യേക സംഘം പിടിച്ചെടുത്തു. കേരളത്തിലെ വിവിധ അതിര്ത്തി ചെക്ക് പോസ്റ്റുകളില് സ്ഥാനാര്ത്ഥികളുടെ പരസ്യ സാമഗ്രികളും പിടിച്ചിട്ടുണ്ട്. മുത്തങ്ങയില് നിന്നും മാത്രം പോലീസ് പിടികൂടിയത് രണ്ടു കോടിയോളം രൂപയാണ്. തെരഞ്ഞെടുപ്പിന് ഒരു നാള് മാത്രം ബാക്കി നില്ക്കെ അതിര്ത്തി ചെക്ക് പോസ്റ്റുകളില് എക്സൈസ് സംഘം ജാഗ്രത കര്ശനമാക്കി. കര്ണാടകത്തില് നിന്നും കോടി കണക്കിന് രൂപയുടെ വ്യാജമദ്യമാണ് ഒഴുകുന്നത്. കേരളത്തില് നിലവാരമില്ലാത്ത ബാറുകള് അടച്ചതിനാല് വിലകുറഞ്ഞ മദ്യം കിട്ടുന്നില്ല.
ഇന്നലെ വൈകിട്ടോടെ അതിര്ത്തി ചെക്ക് പോസ്റ്റുകള് അടച്ചതായി ഡി.ജി.പി. അറിയിച്ചു. എല്ലാ ജില്ലകളിലും എസ്.പി.മാര്ക്ക് ഡി.ജി.പി. ജാഗ്രത നിര്ദേശം നല്കിയിട്ടുണ്ട്. കേരളത്തില് വ്യാജ മദ്യ ദുരന്തം ഉണ്ടാകാനുളള സാധ്യതയും ഇന്റലിജന്സ് തളളിക്കളയുന്നില്ല. വ്യാജമദ്യ ദുരന്തം ഉണ്ടാകാനിടയുണ്ടെന്ന് കെ.പി.സി.സി അധ്യക്ഷന് വി.എം.സുധീരനും സമ്മതിച്ചു.
മലപ്പുറത്ത് നിന്നാണ് ഏറ്റവുമധികം കളളപ്പണം പിടിച്ചെടുത്തത്. കേന്ദ്ര സര്ക്കാരില് സ്വാധീനമുളള ഒരു സ്ഥാനാര്ത്ഥിക്ക് വേണ്ടിയാണ് ഒരു കോടി 30 ലക്ഷം വന്നത്. തടവൂര് റൂറല്, എറണാകുളം റൂറല് എന്നിവിടങ്ങളില് നിന്നും കോടികള് പിടിച്ചെടുത്തു. മലപ്പുറത്തു നിന്നും രണ്ട് കിലോ സ്വര്ണവും പിടിച്ചെടുത്തു. 15 കേസുകള് പണമൊഴുക്കിനെക്കുറിച്ച് മാത്രം പോലീസ് രജിസ്റ്റര് ചെയ്തിട്ടുണ്ട്. കര്ണാടകത്തില് നിന്നും കൊണ്ടുവന്ന 92 ലക്ഷം രൂപ കഴിഞ്ഞ ദിവസം മുത്തങ്ങയില് പിടികൂടി. പിടിച്ചെടുത്ത പണം ആദായനികുതി വകുപ്പിന് കൈമാറിക്കഴിഞ്ഞു. സംസ്ഥാനത്തെ വിമാനത്താവളങ്ങളിലും സുരക്ഷ കര്ശനമാക്കി. മംഗലാപുരം, കോയമ്പത്തൂര് വിമാനത്താവളങ്ങളില് നിന്നും കളളപ്പണം കേരളത്തിലെത്തുമെന്ന മുന്നറിയിപ്പിനെ തുടര്ന്ന് ഇവിടങ്ങളിലും സുരക്ഷ കര്ശനമാക്കി. എല്ലാ നിയമസഭാ മണ്ഡലങ്ങളിലും ഫ്ളൈയിംഗ് സ്ക്വാഡുകള് സജീവമാണ്. എസ്.പിമാര്ക്കാണ് ചുമതല.
കര്ണാടകത്തില് നിന്ന് കൊണ്ടുവന്ന 30,000 പാക്കറ്റ് മദ്യം കണ്ണൂര് കാസര്കോട് അതിര്ത്തിയില് എക്സൈസ് പിടികൂടിയിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
