നവഭൂമി നിയന്ത്രണത്തില് കര്ശന നിയന്ത്രണങ്ങളുമായി കേന്ദ്രം
വനഭൂമി, വനേതര ആവശ്യങ്ങള്ക്ക് ഉപയോഗിക്കുന്നത് കൂടിവരുന്ന പശ്ചാത്തലത്തില് കൂടുതല് പരിശോധന നടത്താനും നടപടി കൈക്കൊള്ളാനും കേന്ദ്ര വനം പരിസ്ഥിതി മന്ത്രാലയം റീജണല് ഓഫീസുകള്ക്ക് നിര്ദേശം നല്കി. ബാംഗഌര് ഓഫീസിന് കീഴിലാണ് കേരളം. രാജ്യത്തിന്റെ വിവിധ ഭാഗങ്ങളിലായി നാല് റീജ ണല് ഒഫീസുകള് തുറക്കാനും മന്ത്രാലയം തീരുമാനിച്ചു. വനഭൂമി സംരക്ഷിക്കാനും വനവത്കരണ പരിപാടികള്ക്ക് വേഗം കൂട്ടാനും ഇതുവഴി സാധിക്കുമെന്നാണ് മന്ത്രാലയത്തിന്റെ പ്രതീക്ഷ. വനഭൂമി മറ്റാവശ്യങ്ങള്ക്ക് വിനിയോഗിക്കേണ്ടി വരുന്ന സാഹചര്യമുണ്ടായാല് നിയമത്തിനുള്ളില് നിന്നുകൊണ്ട് അത് പരിശോധിക്കാന് സംസ്ഥാന സര്ക്കാരുകളെ സഹായിക്കണമെന്ന് കേന്ദ്രം റീജണല് ഓഫീസുകള്ക്ക് നിര്ദേശം നല്കിയിരിക്കുകയാണ്. വനഭൂമി, അതല്ലാതാക്കുന്നതിനുള്ള കാരണം ന്യായമാണോ, നിബന്ധനകള് പാലിച്ചാണോ അതിനുള്ള അപേക്ഷ നല്കിയിട്ടുള്ളത്, അതിനുപകരമായി വനവത്കരണം നടത്താന് ഭൂമി ലഭ്യമാക്കിയിട്ടുണ്ടോ എന്ന കാര്യങ്ങളെല്ലാം പരിശോധിക്കണം.
വനേതര ആവശ്യത്തിന് ഉപയോഗിക്കുന്ന വനഭൂമി നൂറ് ഹെക്ടറില് കൂടുതലാണെങ്കില് റീജണല് ഓഫീസിലെ ചുമതലപ്പെട്ടവര് സ്ഥലം നേരിട്ട് പരിശോധന നടത്തിയിരിക്കണം. അഞ്ചുമുതല് നാല്പത് ഹെക്ടര് വരെയുള്ള വനഭൂമിയാണ് ആവശ്യമെങ്കില് സംസ്ഥാന ഉപദേശക സമിതിയുമായി ചര്ച്ച ചെയ്തേ തീരുമാനമെടുക്കാവൂ. പ്രാഥമികവും അന്തിമവുമായ അംഗീകാരത്തിന്റെ രേഖകളും സ്ഥലപരിശോധനാ റിപ്പോര്ട്ടും ഉപദേശക സമിതി യോഗത്തിന്റെ മിനിറ്റ്സും വെബ്സൈറ്റില് ഉള്പ്പെടുത്തണം. കേന്ദ്രത്തിന്റെ മാര്ഗ നിര്ദേശങ്ങളനുസരിച്ച് വന സംരക്ഷണത്തിനായുള്ള കര്മപദ്ധതികള് നടപ്പാക്കാന് സംസ്ഥാന സര്ക്കാരുകളെ റീജണല് ഓഫീസ് സഹായിക്കുകയും വേണം. വന വികസന പദ്ധതികള് മാര്ഗനിര്ദേശങ്ങള്ക്കനുസരിച്ചാണോ നടക്കുന്നതെന്ന് വിലയിരുത്തുകയും വേണം. പരിസ്ഥിതി അനുമതി ലഭിച്ച പദ്ധതികള് വ്യവസ്ഥയനുസരിച്ചാണോ മുന്നോട്ടുപോകുന്നതെന്ന് പരിശോധിക്കണം. ഇത്തരം പദ്ധതികളുമായി ബന്ധപ്പെട്ട സ്ഥലങ്ങളില് മിന്നല് പരിശോധന നടത്തി പ്രവര്ത്തനങ്ങളുടെ യഥാര്ഥ നില മനസ്സിലാക്കണം. കേരളത്തിലെ വനത്തില് ഖനനത്തിനും നിര്മാണ പ്രവര്ത്തനങ്ങള്ക്കും കോപ്പുകൂട്ടിയിരിക്കുന്നവര്ക്ക് തിരിച്ചടിയാകും, കേന്ദ്രത്തിന്റെ ഇടപെടല്.
https://www.facebook.com/Malayalivartha
