ആന്റോയുടെ കാര്യം സംശയമെന്ന് പി.സി.ജോര്ജ്; വോട്ട് മറിഞ്ഞതായി സംശയം
പത്തനംതിട്ടയില് യി.ഡി.എഫ് സ്ഥാനാര്ത്ഥി ആന്റോ ആന്റണി തോല്ക്കുമെന്ന് പരോക്ഷമായി പി.സി ജോര്ജ്. കോണ്ഗ്രസിന്റെ പ്രവര്ത്തനം പാളിയെന്നാണ് പി.സി.ജോര്ജ് പറയുന്നത്. ഒരു ചാനലിനു നല്കിയ അഭിമുഖത്തിലാണ് ജോര്ജിന്റെ വിവാദ പരാമര്ശം. ബൂത്തു കമ്മറ്റികള് യഥാസമയം വിളിച്ചുചേര്ത്തില്ലെന്നും ജോര്ജ് പറഞ്ഞു. ആറന്മുള വിമാനത്താവളത്തിന് വേണ്ടി ആന്റോ അവസാനനിമിഷം പോലും ശ്രമിച്ചതായും ജോര്ജ് പറഞ്ഞു.
ആറന്മുള വിമാനത്താവളത്തിനെതിരെ ആന്റോക്ക് നിലപാടെടുക്കാനാകില്ല. എ.ഐ.സി.സിയുമായി ബന്ധപ്പെട്ട കേന്ദ്രങ്ങളാണ് ആറന്മുളയില് കെ.ജി.എസ് ഗ്രൂപ്പിന് വേണ്ടി ചരടുവലിക്കുന്നത്.ഡല്ഹിയില് ഇടതു-വലതു ഭേദമന്യേ എല്ലാവരും ആറന്മുളയ്ക്ക് അനുകൂലമായ നിലപാടാണ് സ്വീകരിക്കുന്നത്. ജോര്ജിന്റെ പരാമര്ശം കോണ്ഗ്രസില് പൊട്ടിത്തെറിക്ക് കാരണമാകുമെന്ന് കരുതുന്നു. ജോര്ജ് പ്രതിനിധീകരിക്കുന്ന പൂഞ്ഞാര് മണ്ഡലം പത്തനംതിട്ട ലോക്സഭയിലാണുളളത്. ഇക്കുറി പത്തനംതിട്ട ലോക്സഭാ മണ്ഡലത്തിലെ പ്രചരണത്തിന്റെ ചുമതലയാണ് കേരള കോണ്ഗ്രസ്(എം),പി.സി.ജോര്ജിനെ ഏല്പ്പിച്ചത്. ജോര്ജിന്റെ പ്രചരണത്തെ ആന്റോ രഹസ്യമായി എതിര്ത്തതായി വാര്ത്തകളുണ്ടായിരുന്നു. ജോര്ജ് യു.ഡി.എഫിനുവേണ്ടി വോട്ടുപിടിക്കുന്നതില് പത്തനംതിട്ടയിലെ യു.ഡി.എഫ് പ്രവര്ത്തകര്ക്കും സമ്മതമുണ്ടായിരുന്നില്ല.
അതേസമയം പൂഞ്ഞാറില് കോണ്ഗ്രസ് ലീഡ് ചെയ്യാന് സാദ്ധ്യതയില്ലെന്ന് ആന്റോയുമായി അടുപ്പമുളളവര് പറയുന്നു. ചില മണ്ഡലങ്ങളിലെങ്കിലും കോണ്ഗ്രസുകാര് കാലുവാരിയതായി കോണ്ഗ്രസ് സംശയിക്കുന്നുണ്ട്. ജോര്ജ് പറഞ്ഞതുപോലെ പത്തനംതിട്ടയില് ബൂത്തിലെ പ്രവര്ത്തനം പോലും സജീവമായിരുന്നില്ല.
ഇടതു സ്ഥാനാര്ത്ഥിയുമായുളള കോണ്ഗ്രസ് നേതാക്കളുടെ അടുപ്പവും ആന്റോക്ക് വിനയായിട്ടുണ്ട്. ആന്റോയുടെ പക്ഷത്ത് നിന്നുകൊണ്ട് ചിലര് ഫിലിപ്പോസിനു വേണ്ടി പ്രവര്ത്തിച്ചതായി കോണ്ഗ്രസുകാര്ക്ക് വിവരം ലഭിച്ചിട്ടുണ്ട്. ആന്റോയുടെ നീക്കങ്ങള് ഇവര് സമര്ത്ഥമായി ചോര്ത്തി നല്കിയതായി സംശയിക്കുന്നു. ഇടതു നേതാക്കള് നേരത്തെ തന്നെ ഇത്തരമൊരു കളം ഒരുക്കിയിരുന്നു. ഫിലിപ്പോസിനെ സി.പി.എം രംഗത്തിറക്കിയതു തന്നെ കോണ്ഗ്രസ് വോട്ടുകളില് വിളളല് വരുത്തുന്നതിനുവേണ്ടിയാണ്. ഫിലിപ്പോസിന് യു.ഡി.എഫിലെ ഘടകകക്ഷി നേതാക്കളുമായും അടുത്ത ബന്ധമുണ്ട്. കോണ്ഗ്രസ് പ്രവര്ത്തകരുമായും അദ്ദേഹത്തിന് അടുപ്പമുണ്ട്.
https://www.facebook.com/Malayalivartha
