വന്കിട റിസോര്ട്ടുകള്ക്ക് ഇടതുപക്ഷത്തിന്റെ ഒത്താശ
മത്സ്യത്തൊഴിലാളികളെ ദോഷകരമായി ബാധിക്കുന്ന രീതിയില് സുപ്രീം കോടതിയില് സംസ്ഥാന സര്ക്കാര് സത്യവാങ്മൂലം നല്കിയെന്ന ആക്ഷേപം അടിസ്ഥാനരഹിതമാണെന്നു മുഖ്യമന്ത്രിയുടെ ഓഫീസ് . തീരദേശപരിപാലനനിയന്ത്രണനിയമം ലംഘിച്ച വേമ്പനാട് കായല് തുരുത്തിലെ രണ്ടു റിസോര്ട്ടുകള് പൊളിക്കുന്നതു സംബന്ധിച്ച കേസില് അവര് നടത്തിയ ലംഘനങ്ങളാണ് സത്യവാങ്മൂലത്തില് ചൂണ്ടിക്കാട്ടിയത്. റിസോര്ട്ടുകള്, വന്കിട ഹോട്ടലുകള് തുടങ്ങിയവയുടെ കാര്യത്തില് കര്ശന നിയന്ത്രണം ഏര്പ്പെടുത്തിയിട്ടുണ്ടെന്നും സത്യവാങ്മൂലത്തില് ചൂണ്ടിക്കാട്ടിയിട്ടുണ്ട്.
വേമ്പനാട് കായലിലെ മത്സ്യസമ്പത്ത് സംരക്ഷിക്കാനും മത്സ്യത്തൊഴിലാളികളുടെ തൊഴില് ഉറപ്പു വരുത്താനുമുള്ള നടപടികളാണ് സത്യവാങ്മൂലത്തിലുള്ളത്. വന്കിട റിസോര്ട്ടുകളെ സംരക്ഷിക്കാനാണ് ഇപ്പോള് ഇടതുപക്ഷം രംഗത്തുവന്നിരിക്കുന്നതെന്നും മുഖ്യമന്ത്രിയുടെ ഓഫീസ് ചൂണ്ടിക്കാട്ടി. തെരഞ്ഞെടുപ്പിനു മണിക്കൂറുകള് മാത്രം അവശേഷിക്കുമ്പോള്, കൈരളി ടി.വിയില് തികച്ചും തെറ്റായ വാര്ത്ത സംപ്രേഷണം ചെയ്ത പശ്ചാത്തലത്തിലാണ് ഈ വിശദീകരണക്കുറിപ്പ്. മത്സ്യത്തൊഴിലാളികള്ക്കും തദ്ദേശവാസികള്ക്കും വേണ്ടി തീരദേശ പരിപാലന അതോറിറ്റിയുടെ നിയന്ത്രണങ്ങളില് ഇളവുവരുത്തുമെന്നു മുഖ്യമന്ത്രി നിയമസഭയില് പ്രഖ്യാപിക്കുകയും തുടര്ന്ന് മന്ത്രിസഭ ഇതുസംബന്ധിച്ച് ഏഴു തീരുമാനങ്ങള് എടുത്ത് കേന്ദ്രപരിസ്ഥിതി വനം മന്ത്രാലയത്തെ അറിയിക്കുകയും ചെയ്തു. അവ കേരള തീരദേശ പരിപാലനഅതോറിറ്റിയുടെ ശുപാര്ശയ്ക്കായി കേന്ദ്രം അയച്ചുതന്നു. അതോറിറ്റിയുടെ യോഗം ചൊവ്വാഴ്ച ചേരുകയും ഏഴ് ഇളവുകള് സംബന്ധിച്ച് തീരുമാനം എടുക്കുകയും ചെയ്തു.
തീരദേശ പരിപാലന അതോറിറ്റിയുടെ നിയന്ത്രണങ്ങള് കേരളത്തിന്റെ തീരപ്രദേശങ്ങളില് നടപ്പിലായത് ഇടതുസര്ക്കാറിന്റെ അക്ഷന്തവ്യമായ വീഴ്ചകൊണ്ടായിരുന്നു. ഇടതുസര്ക്കാര് സമയോചിതമായി നിര്ദേശങ്ങള് സമര്പ്പിക്കാതിരുന്നതിനെ തുടര്ന്ന്, കേരളത്തിന്റെ തീരദേശത്തെ ജനങ്ങളെ ഏറെ പ്രതികൂലമായി ബാധിക്കുന്ന രീതിയില് 2011 ജനുവരി ആറിനാണ് തീരദേശ നിയന്ത്രണ മേഖലാ വിജ്ഞാപനം നിലവില് വന്നത്. അതിനു മുമ്പ് നിര്ദേശങ്ങള് സമര്പ്പിക്കാനുള്ള നിരവധി അവസരങ്ങള് ഇടതുസര്ക്കാര് പാഴാക്കി. യുഡിഎഫ് സര്ക്കാര് അധികാരമേറ്റ ഉടനെ തീരദേശ നിയന്ത്രണം മൂലം ജനങ്ങള്ക്കുണ്ടാകുന്ന ബുദ്ധിമുട്ടുകള് ലഘൂകരിക്കാന് നടപടി എടുക്കുകയും ഏഴ് തീരുമാനങ്ങള് എടുക്കുകയും ചെയ്തതായും മുഖ്യമന്ത്രി പറഞ്ഞു.
https://www.facebook.com/Malayalivartha
