തെരഞ്ഞെടുപ്പായതിനാല്‍ ചാരക്കേസിനെപ്പറ്റി മൗനം പാലിച്ച കെ. മുരളീധരന്‍,കെ കരുണാകരന്റെ രാജി ചാരക്കേസില്‍ ആയിരുന്നില്ലെന്ന മുഖ്യമന്ത്രി ഉമ്മന്‍ചാണ്ടിയുടെ പ്രസ്താവന തള്ളി.കരുണാകന്റെ രാജി ചാരക്കേസില്‍തന്നെയായിരുന്നുവെന്ന് മുരളീധരന്‍ പറഞ്ഞു.ചാരക്കേസ് കാരണമാണ് യുഡിഎഫിലെ ഘടകക്ഷികള്‍ കരുണാകരനെതിരെ തിരിഞ്ഞത്.നരസിംഹറാവുവിന് കരുണാകരനോട് വിരോധമുണ്ടായിരുന്നു. ചാരക്കേസ് വന്നപ്പോള്‍ ആ അവസരം റാവു മുതലെടുത്തെന്നും മുരളീധരന്‍ കുറ്റപ്പെടുത്തി.

രാഷ്ട്രീയത്തില്‍ കരുണാകരന്‍ നേരിട്ട ഏറ്റവും വലിയ പ്രതിസന്ധികളില്‍ ഒന്നായിരുന്നു ഐ.എസ്.ആര്‍.ഒ. ചാരക്കേസ്. കേസ് വിവാദമായതിനെ തുടര്‍ന്ന് 1995ല്‍ മുഖ്യമന്ത്രിപദം കരുണാകരന് രാജിവെക്കേണ്ടി വന്നു. തിരുവനന്തപുരം ഐ.എസ്.ആര്‍.ഒയിലെ രണ്ട് ഉദ്യോഗസ്ഥരുമായി ചേര്‍ന്ന് മറിയം റഷീദ എന്ന മാലി സ്വദേശിനി വഴി ഇന്ത്യയുടെ ബഹിരാകാശ പരിപാടിയുടെ രഹസ്യങ്ങള്‍ വിദേശികള്‍ക്ക് ചോര്‍ത്തിനല്‍കി എന്നതായിരുന്നു ആരോപണം.

കെ കരുണാകരന്റെ രാജി ചാരക്കേസില്‍ ആയിരുന്നില്ലെന്ന് മുഖ്യമന്ത്രി ഉമ്മന്‍ചാണ്ടി നേരത്തെ പ്രതികരിച്ചിരുന്നു. ചാരക്കേസില്‍ കരുണാകരന്റെ രാജി ആവശ്യപ്പെട്ടിട്ടില്ല. അന്ന് താന്‍ കരുണാകരന്‍ മന്ത്രിസഭയില്‍ അംഗമായിരുന്നെന്നും ഉമ്മന്‍ചാണ്ടി പറഞ്ഞിരുന്നു.

എന്നാല്‍ ഉമ്മന്‍ചാണ്ടിയുടെ പ്രസ്താവന അന്ന് തന്നെ കരുണാകരന്റെ മകള്‍ പത്മജ വേണുഗോപാല്‍ തിരുത്തിയിരുന്നു. ചാരക്കേസുമായി ബന്ധപ്പെട്ട വിവാദങ്ങളാണ് രാജിക്കിടയാക്കിയത്. സത്യം ഉമ്മന്‍ചാണ്ടിക്കേ അറിയാവൂ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha