ഇടുക്കിയില്‍ നാല്‍പതിനായിരം വോട്ടുകളുടെ ഭൂരിപക്ഷത്തില്‍ യുഡിഎഫ് തെരഞ്ഞെടുപ്പ് കമ്മറ്റി. പ്രചരണത്തില്‍ വീഴ്ച പറ്റിയിട്ടില്ലെന്നും യോഗം വിലയിരുത്തി. മണ്ഡലത്തില്‍ മൂന്ന് ശതമാനം പോളിംഗ് കുറഞ്ഞിട്ടുണ്ട്. വീഴ്ച പറ്റിയിട്ടുണ്ടെന്ന വാദങ്ങള്‍ ശരിയല്ലെന്നും പോളിംഗ് കുറഞ്ഞത് എല്‍ഡിഎഫിന്റെ വോട്ടുകള്‍ പോള്‍ ചെയ്യപ്പെടാതെ പോയതുകൊണ്ടാണെന്നും യുഡിഎഫ് തെരഞ്ഞെടുപ്പ് കമ്മറ്റി വിലയിരുത്തി. ഇടുക്കിയില്‍ പോളിങ് ശതമാനം കുറഞ്ഞ സാഹചര്യങ്ങളായിരുന്നു ഇന്ന് രാവിലെ ചേര്‍ന്ന കമ്മറ്റി പ്രധാനമായും ചര്‍ച്ച ചെയ്തത്.

യുഡിഎഫ് അനുകൂല മണ്ഡലങ്ങളില്‍ വോട്ടുകള്‍ കുറഞ്ഞതിനെ തുടര്‍ന്ന് ആരോപണങ്ങളുമായി നേതാക്കള്‍ രംഗത്തെത്തിയിരുന്നു. തെരഞ്ഞെടുപ്പിന് ശേഷമുള്ള ആദ്യ അവലോകന യോഗം കൂടിയായിരുന്നു ഇത്.

യുഡിഎഫ് സ്ഥാനാര്‍ത്ഥി നിര്‍ണ്ണയം പാളിയെന്ന് ആരോപിച്ച് സര്‍ക്കാര്‍ ചീഫ് വിപ്പ് പി സി ജോര്‍ജ് രംഗത്തെത്തിയതോടെയാണ് വിവാദം തുടങ്ങിയത്. ആന്റോ ആന്റണിയും എം ഐ ഷാനവാസും മോശം സ്ഥാനാര്‍ത്ഥികളാണെന്ന് പറഞ്ഞ പി സി ജോര്‍ജ് ഇടുക്കിയില്‍ വോട്ട് കുറഞ്ഞാല്‍ കേരള കോണ്‍ഗ്രസിനെ പറയരുതെന്നും വെളിപ്പെടുത്തിയിരുന്നു. ഇടുക്കിയിലെ യുഡിഎഫ് സ്ഥാനാര്‍ത്ഥി ഡീന്‍ കുര്യാക്കോസിന്റെ വിജയസാധ്യതയെക്കുറിച്ച് ഒന്നും പറയാനാവില്ലെന്നും പി ടി തോമസ് മത്സരിച്ചിരുന്നുവെങ്കില്‍ വിജയം നൂറ് ശതമാനം ഉറപ്പായിരുന്നുവെന്നും പറഞ്ഞതോടെ വിവാദം കൊഴുത്തു.