തമ്മിലടിച്ച്‌ കോണ്‍ഗ്രസ്‌ കലമുടച്ചതായി ഇന്റലിജന്‍സ്‌; ബലവാന്‍മാരെല്ലാം തോല്‍ക്കും, മന്ത്രിസഭക്കും ഭീഷണി
മേയ്‌ 16 ലോക്‌സഭാ തെരഞ്ഞെടുപ്പ്‌ ഫലം പുറത്തുവരുമ്പോള്‍ ഘടകകക്ഷികളും കേണ്‍ഗ്രസും തമ്മിലുളള ഐക്യത്തിന്‌ വിളളല്‍ വീഴുമെന്ന്‌ ഇന്റലിജന്‍സ്‌ റിപ്പോര്‍ട്ട്‌. പത്തനംതിട്ട, കോട്ടയം, ഇടുക്കി മണ്‌ഡലങ്ങളില്‍ കോണ്‍ഗ്രസും കേരളകോണ്‍ഗ്രസും തമ്മില്‍ ആത്മബന്ധം ഉണ്ടായിരുന്നില്ലെന്നും ഇത്‌ ഫലങ്ങളെ ബാധിക്കുമെന്നുമാണ്‌ ഇന്റലിജന്‍സ്‌ റിപ്പോര്‍ട്ട്‌. കോട്ടയത്ത്‌ യു.ഡി.എഫ് മികച്ച ഭൂരിപക്ഷം നേടുമെന്നും എന്നാല്‍ അത്‌ സ്ഥാനാര്‍ത്ഥിയുടെ മികവു കാരണമാണെന്നും റിപ്പോര്‍ട്ടിലുണ്ട്‌. ചാലക്കുടി, തൃശൂര്‍ , ഇടുക്കി, പത്തനംതിട്ട, കണ്ണൂര്‍ മണ്‌ഡലങ്ങള്‍ കോണ്‍ഗ്രസിനെ കൈവിടുമെന്നും റിപ്പോര്‍ട്ട്‌ പറയുന്നു. കോണ്‍ഗ്രസിലുളള ഗ്രൂപ്പ്‌ പ്രവര്‍ത്തനങ്ങളാണ്‌ പ്രതികൂല ഫലങ്ങള്‍ക്ക്‌ കാരണമാകുന്നതെന്നും ഇന്റലിജന്‍സ്‌ റിപ്പോര്‍ട്ട്‌ പറയുന്നു.
ചാലക്കുടിയില്‍ ഐ ഗ്രൂപ്പ്‌ നിര്‍ജീവമായിരുന്നു. ഐ ഗ്രൂപ്പിന്റെ കൈയിലാണ്‌ ജില്ലയിലെ മൂന്നു നിയമസഭാ മണ്‌ഡലങ്ങളുളളത്‌. ഇത്‌ ഇന്നസെന്റിന്റെ അനായായ വിജയത്തിന്‌ കാരണമാകും. തൃശൂരില്‍ സിറ്റിംഗ്‌ എം.പിയായ പി.സി.ചാക്കോയോടുളള വിരോധം ധനപാലിന്‌ ദോഷമായി. എ ഗ്രൂപ്പിന്റെ ധനപാലന്‌ വേണ്ടി കൈയും മെയ്യും മറന്ന്‌ രംഗത്തിറങ്ങില്ലെന്നും ആരോപണമുണ്ട്‌. ഉടുമ്പന്‍ചോല, ഇടുക്കി, നിയമസഭാ മണ്‌ഡലങ്ങളില്‍ യു.ഡു.എഫിന്റെ പ്രവര്‍ത്തനം നിര്‍ജീവമായിരുന്നു. കോണ്‍ഗ്രസുകാര്‍ പോലും ഇടതു സ്ഥാനാര്‍ത്ഥിക്ക്‌ വേണ്ടി പ്രവര്‍ത്തിച്ചു.
പി.ടി തോമസിനെതിരെ പ്രവര്‍ത്തിച്ച്‌ കോണ്‍ഗ്രസിലെ ഒരു വിഭാഗമാണെന്നും ഇന്റലിജന്‍സ്‌ റിപ്പോര്‍ട്ടിലുണ്ട്‌. പി.ടി തോമസ്‌ തോല്‍ക്കുമെന്ന്‌ ഇവര്‍ പ്രചരിപ്പിച്ചു. സഭാ നേതൃത്വത്തെ അദ്ദേഹത്തില്‍ നിന്നും അകറ്റി. പി.ടിയുടെ സ്വാകാര്യ സംഭാഷണങ്ങള്‍ പോലും ഊതിപ്പെരുപ്പിച്ച്‌ സഭാ നേതൃത്വത്തിനു മുമ്പിലെത്തിച്ചു. രണ്ട് കെ.പി.സി.സി. എക്‌സിക്യൂട്ടീവ്‌ അംഗങ്ങള്‍ ഇടുക്കിയില്‍ ഇടതു സ്ഥാനാര്‍ത്ഥിക്ക്‌ വേണ്ടി പ്രവര്‍ത്തിച്ചതായും ഇന്റലിജന്‍സ്‌ റിപ്പോര്‍ട്ടില്‍ പറയുന്നു.
പി.സി. ജോര്‍ജിനോടുളള അഭിപ്രായ വ്യത്യാസം കാരണം കോട്ടയത്ത്‌ ഒരു സംഘം കോണ്‍ഗ്രസ്‌ പ്രവര്‍ത്തകര്‍ പ്രചാരണ രംഗത്തുണ്ടായിരുന്നില്ലെന്ന്‌ റിപ്പോര്‍ട്ടില്‍ പറയുന്നു. അവസാന നിമിഷം മുഖ്യമന്ത്രിയും വനം മന്ത്രിയും നടത്തിയ ഇടപെടല്‍ ഫലപ്രദമായില്ലെന്നും റിപ്പോര്‍ട്ട്‌ പറയുന്നു. കണ്ണൂരില്‍ കെ.സുധാകരന്റെ പ്രചാരണ പ്രവര്‍ത്തനങ്ങളില്‍ എ ഗ്രൂപ്പുകാര്‍ ഉഴപ്പന്‍ സമീപനം സ്വീകരിച്ചതായും റിപ്പോര്‍ട്ടിലുണ്ട്‌. അതേസമയം കണ്ണൂരില്‍ സി.പി.എം നടത്തിയത്‌ ചിട്ടയായ പ്രവര്‍ത്തനമാണെന്നും ഇത്‌ ഇടതു സ്ഥാനാര്‍ത്ഥിക്ക്‌ ഗുണകരമാകുമെന്നും റിപ്പോര്‍ട്ടില്‍ പറയുന്നു.
കേരളത്തില്‍ എല്‍ഡി.എഫ് തരംഗമാണെന്ന ജല്‍പനങ്ങളാണ്‌ ഇന്റലിജന്‍സ്‌ റിപ്പോര്‍ട്ടുലുളളത്‌. ഇന്റലിജന്‍സ്‌ റിപ്പോര്‍ട്ടിലെ വസ്‌തുതകള്‍ അന്വേഷിക്കാന്‍ സുധീരന്‍ കെ.പി.സി.സി. നേതാക്കള്‍ക്ക്‌ നിര്‍ദ്ദേശം നല്‍കിയിട്ടുണ്ട്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
