സംസ്ഥാനത്തെ മദ്യവില്‍പ്പനക്ക് നിയന്ത്രണം വേണമെന്ന് ജസ്റ്റിസ് എം രാമചന്ദ്രന്‍ കമ്മീഷന്‍ റിപ്പോര്‍ട്ട്. നിലവാരം ഉയര്‍ത്താതെ ബാര്‍ ലൈസന്‍സ് നല്‍കരുത്. ത്രീസ്റ്റാര്‍ പദവി ഉള്ളവര്‍ക്ക് മാത്രമേ ബാര്‍ ലൈസന്‍സ് നല്‍കാവൂ. മദ്യം വാങ്ങുന്നവരുടെ പ്രായം തെളിയിക്കുന്ന സര്‍ട്ടിഫിക്കറ്റ് ഹാജരാക്കണം. ബാറുകളുടെ പ്രവര്‍ത്തനസമയം പുനക്രമീകരിക്കണം. പ്രവര്‍ത്തനസമയം രാവിലെ 11.30 മുതല്‍ രാത്രി 10 വരെയാക്കണം. ബാറുകള്‍ക്ക് താല്‍ക്കാലിക ലൈസന്‍സ് നല്‍കരുതെന്നും കമ്മീഷന്‍ ശുപാര്‍ശ ചെയ്യുന്നു.

മദ്യോപയോഗം കൂടുതലുള്ള കേരളത്തില്‍ അതിന്റെ ദോഷവശങ്ങള്‍ കാണുന്നുണ്ട്. മദ്യം വാങ്ങാന്‍ വില്‍പനശാലകളിലെത്തുന്നവരില്‍ യുവാക്കളേറെയാണ്. ആത്മഹത്യാ നിരക്ക്, വാഹന അപകടം, കുടുംബബന്ധങ്ങളിലെ തകര്‍ച്ച, സ്ത്രീകള്‍ക്കെതിരായ അതിക്രമം, കുറ്റകൃത്യങ്ങള്‍ എന്നിവ ഇവിടെ കൂടുതലാണ്. അതിലെല്ലാം മദ്യത്തിന്റെ സ്വാധീനമുണ്ട്.

സമ്പൂര്‍ണ മദ്യനിരോധനം പ്രായോഗികമല്ല. വീര്യം കുറഞ്ഞ മദ്യത്തിന്റെ ലഭ്യത വര്‍ധിപ്പിക്കുകയും സ്പിരിറ്റ് ലോബിയെ നിയന്ത്രിക്കുകയും വേണം. കള്ളുഷാപ്പുകള്‍ രാവിലെ എട്ട് മണിമുതല്‍ രാത്രി എട്ട് വരെ മാത്രം പ്രവര്‍ത്തിക്കണമെന്നും കമ്മീഷന്‍ ശുപാര്‍ശ ചെയ്യുന്നു.

2014 മാര്‍ച്ച് 4നാണ് ജസ്റ്റിസ് എം. രാമചന്ദ്രന്‍ കമ്മീഷന്‍ സര്‍ക്കാറിന് 175 പേജുള്ള റിപ്പോര്‍ട്ട് സമര്‍പ്പിച്ചത്. 

ഇതേസമയം മദ്യവില്‍പനയ്‌ക്ക് നിയന്ത്രണം വേണമെന്ന്‌ വ്യക്‌തമാക്കിക്കൊണ്ടുള്ള ജസ്‌റ്റിസ്‌ എം. രാമചന്ദ്രന്‍ കമ്മിഷന്‍ റിപ്പോര്‍ട്ട്‌ എക്‌സൈസ് വകുപ്പ് തള്ളി. നിലവില്‍ പൂട്ടിക്കിടക്കുന്ന ബാറുകള്‍ക്ക്‌ ആറു മാസത്തേയ്‌ക്ക് ഉപാധികളോടെ ലൈസന്‍സ്‌ പുതുക്കിനല്‍കണമെന്ന്‌ ആവശ്യപ്പെട്ടുകൊണ്ടുള്ള ശിപാര്‍ശയാണ്‌ എക്‌സൈസ്‌ വകുപ്പ്‌ സര്‍ക്കാരിന്‌ നല്‍കിയിരിക്കുന്നത്‌. 418 ബാറുകളാണ്‌ നിലവില്‍ പൂട്ടിക്കിടക്കുന്നത്‌. ഇതുമൂലം നിരവധി തൊഴിലാളികള്‍ക്ക്‌ തൊഴില്‍ നഷ്‌ടമായിട്ടുണ്ടെന്നും ബാറുകള്‍ പൂട്ടിയതുമായി ബന്ധപ്പെട്ട്‌ രണ്ടുപേര്‍ ആത്മഹത്യ ചെയ്‌തുവെന്നും എക്‌സൈസ്‌ വകുപ്പ്‌ ശുപാര്‍ശയില്‍ ചൂണ്ടിക്കാട്ടിയിട്ടുണ്ട്‌.