ആചാരങ്ങള് സാധാരണ ഭക്തര്ക്ക് മാത്രം? ശബരിമല മേല്ശാന്തിയുടെ പ്രായപൂര്ത്തിയായ മകള് സന്നിധാനത്തെത്തി അയ്യപ്പനെ കണ്ടു വണങ്ങി
പത്തിനും അമ്പതിനും വയസിന് ഇടയിലുള്ള സ്ത്രീകള് മല ചവിട്ടരുതെന്ന ആചാരം ശബരിമല മേല്ശാന്തി തന്നെ തെറ്റിച്ചു. മേല്ശാന്തി പി എന് നാരായണന് നമ്പൂതിരിയുടെ പന്ത്രണ്ടുവയസായ മകളാണ് സന്നിധാനത്തെത്തി അയ്യപ്പനെ കണ്ട് മടങ്ങിയത്. കഴിഞ്ഞ ബുധനാഴ്ചയാണ് പെണ്കുട്ടിയടങ്ങുന്ന സംഘം ശബരിമലയില് എത്തിയത്. രാവിലെ പമ്പയില് നിന്ന് സംഘം മലകയറാന് തുടങ്ങിയപ്പോള് തന്നെ ഗണപതികോവിലിനു സമീപം പോലീസ് തടഞ്ഞിരുന്നു.
തുടര്ന്ന് പമ്പയില് ഡ്യൂട്ടിയിലുണ്ടായിരുന്ന എസ്.ഐ. മേല്ശാന്തിയുടെ മകളാണെന്നു പറഞ്ഞു കയറ്റിവിടുകയായിരുന്നു.
11 മണിയോടെ ഇവര് സന്നിധാനത്തെത്തി. മേല്ശാന്തിയുടെ മുറിയില് വിശ്രമിച്ച പെണ്കുട്ടി പടിപൂജയില് പങ്കുകൊള്ളാന് പുറത്തിറങ്ങിയപ്പോള് അയ്യപ്പസേവാസംഘം പ്രവര്ത്തകര് പെണ്കുട്ടിയുടെ പ്രായത്തില് സംശയം പ്രകടിപ്പിച്ച് തടയാന് ഒരുങ്ങി. ഇതേത്തുടര്ന്ന് ദേവസ്വം ഗാര്ഡുമാരുടെ സഹായത്തോടെ പെണ്കുട്ടിയെ തിരികെ മേല്ശാന്തിയുടെ മുറിയിലേക്കു കൊണ്ടുപോയി. വിവാദം ഭയന്ന് പിന്നീട് പെണ്കുട്ടിയെ പുറത്തിറക്കിയില്ല. മൂന്നുദിവസം പെണ്കുട്ടി സന്നിധാനത്ത് തങ്ങി. ഉത്രം-വിഷു ഉത്സവത്തിന് സമാപനം കുറിച്ചു നടയടച്ച് കഴിഞ്ഞ ശനിയാഴ്ച രാത്രി 12 ന് മേല്ശാന്തിയുടെ അളിയന് വനംവകുപ്പിന്റെ അനുമതി വാങ്ങി കുട്ടിയെ ട്രാക്ടറില് പമ്പയില് എത്തിക്കുകയായിരുന്നു.
ദേവസ്വം ബോര്ഡിന്റെ ഫോട്ടോഗ്രാഫര് കുട്ടി സന്നിധാനത്ത് നില്ക്കുന്ന ചിത്രം എടുത്തിരുന്നു. ഇതറിഞ്ഞ ബോര്ഡിലെ ഉന്നത ഉദ്യോഗസ്ഥര് കാമറയില് നിന്നും ചിത്രങ്ങള് നീക്കാന് ആവശ്യപ്പെട്ടിരുന്നു. ശബരിമലയിലെ സി.സി.ടി.വികളിലെല്ലാം പെണ്കുട്ടി സന്നിധാനത്തെത്തിയതിന്റെ ദൃശ്യങ്ങള് പതിഞ്ഞിട്ടുണ്ട്.
അതേസമയം തന്റെ മകള് ശബരിമല ദര്ശനം നടത്തിയതില് ആചാര ലംഘനം ഉണ്ടായിട്ടില്ലെന്നു മേല്ശാന്തി പി.എന്. നാരായണന് നമ്പൂതിരി അറിയിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
