ക്രിസ്ത്യന്‍ മതന്യൂനപക്ഷത്തെ ഒപ്പം കൂട്ടുകയെന്നത് തന്നെയായിരുന്നു അമിത്ഷായുടെ കേരള സന്ദര്‍ശനത്തിന്റെ ഏറ്റവും പ്രധാനപ്പെട്ട ലക്ഷ്യങ്ങളിലൊന്ന്. ഇതിനായി മതമേലധ്യക്ഷന്മാരെ അമിത്ഷായെ കാണാന്‍ നേരിട്ടുപോയി ക്ഷണിച്ചത് സംസ്ഥാന അധ്യക്ഷന്‍ കുമ്മനം രാജശേഖരന്‍ തന്നെയാണ്. അങ്ങനെ ഒരുപിടി സഭാമേലധ്യക്ഷന്മാര്‍ അമിത് ഷായെയും ബിജെപി നേതാക്കളെയും കണ്ടു. രാഷ്ട്രീയം സംസാരിച്ചില്ലെന്ന് മതനേതാക്കള്‍ പറഞ്ഞുവെങ്കിലും അമിത് ഷായുടെ ലക്ഷ്യം ഏവര്‍ക്കും വ്യക്തമായിരുന്നു. സന്ദര്‍ശനത്തെ എതിര്‍ത്തും അനുകൂലിച്ചും രാഷ്ട്രീയ രംഗത്തെ പലരും രംഗത്തെത്തുകയും ചെയ്തിരുന്നു. ഇപ്പോളിതാ യാക്കോബായ സഭയുടെ നിരണം ഭദ്രാസനാധിപന്‍ ഗീവര്‍ഗീസ് കൂറിലോസാണ് ശക്തമായ പ്രതികരണവുമായി രംഗത്തെത്തിയത്. സവര്‍ണ്ണ ദേശീയ നേതാക്കളില്‍ നിന്നും ഇപ്പോള്‍ ലഭിക്കുന്ന ആശ്ലേഷം ധൃതരാഷ്ട്ര ആലിംഗനമാണെന്ന് ഗീവര്‍ഗീസ് മാര്‍ കൂറിലോസ് മുന്നറിയിപ്പ് നല്‍കി.
സവര്‍ണ്ണ ഫാഷിസവും ജാതി മേധാവിത്വവും മനുവാദവും മതന്യൂനപക്ഷ / ദളിത് /ആദിവാസി / സ്ത്രീവിരുദ്ധതയും മുന്നോട്ടുവയ്ക്കുന്ന സാംസ്‌കാരിക ദേശീയതയുമായി മതന്യൂനപക്ഷങ്ങള്‍ക്കും അടിസ്ഥാനസമൂഹങ്ങള്‍ക്കും ഒരു കാലത്തും പൊരുത്തപ്പെടുവാന്‍ സാധിക്കില്ലെന്ന് അദ്ദേഹം ഫെയ്‌സ്ബുക്കില്‍ കുറിച്ചു. കേരളത്തില്‍ പ്രത്യേകിച്ചും ഈ പ്രത്യയശാസ്ത്രം മുന്നോട്ടുവെക്കുന്ന സംഘപരിവാറുമായി മതന്യൂനപക്ഷങ്ങള്‍ക്ക് യോജിക്കാനാകില്ല. ഇവരുമായി ചര്‍ച്ച ചെയ്യുന്നതിന് മുന്‍പ്‌ ്രൈകസ്തവ മേലദ്ധ്യക്ഷന്മാര്‍ ഗ്രഹാംസ്‌റ്റെയിന്‍സിന്റെ കൊലയ്ക്കും കണ്ടമാല്‍ ഉള്‍പ്പെടെയുള്ള ആസൂത്രിത ഹത്യകള്‍ക്കും ഇന്നും തുടരുന്ന ദളിത്/ ആദിവാസി പീഡനങ്ങള്‍ക്കും ഇവര്‍ മാപ്പ് പറയണമെന്ന് ആവശ്യപ്പെടണമായിരുന്നുവെന്നും മാര്‍ കൂറിലോസ് പറയുന്നു. ദളിത് െ്രെകസ്തവരുടെയും ദളിത് മുസ്ലീങ്ങളുടെയും സംവരണ നിഷേധത്തിനെതിരെ അവരെക്കൊണ്ട് ചര്‍ച്ചയ്ക്ക് മുന്‍പ് മറുപടി പറയിക്കണമായിരുന്നു. ഭരണഘടനയുടെ അന്തസ്സത്തകള്‍ തിരുത്തുകയില്ല എന്ന് ചര്‍ച്ചയ്ക്ക് ഉറപ്പ് വാങ്ങണമായിരുന്നുവെന്നും അദ്ദേഹം തുറന്നടിച്ചു.
ഇതെല്ലാം മറന്ന് ചില്ലറ ലാഭങ്ങള്‍ക്കായി സവര്‍ണ്ണ താല്‍പര്യങ്ങളുമായി സന്ധി ചെയ്താല്‍, നേതാക്കന്‍മാരൊപ്പം വിശ്വാസികള്‍ കാണില്ലെന്നും മാര്‍ കൂറിലോസ് മുന്നറിയിപ്പ് നല്‍കുന്നു. അംബേദ്കറിനെയും അയ്യങ്കാളിയെയും ആലിംഗനം ചെയ്ത് സാമൂഹിക നീതിയുടെ ധാരകളെ ഇല്ലായ്മ ചെയ്യാനുള്ള ശ്രമം തന്നെയാണ് ബിജെപി ഇപ്പോഴും തുടരുന്നതെന്നും അദ്ദേഹം പറയുന്നു. സവര്‍ണ്ണ ദേശീയ നേതാക്കളില്‍ നിന്നും ഇപ്പോള്‍ ലഭിക്കുന്ന ആശ്ലേഷം ധൃതരാഷ്ട്ര ആലിംഗനം ആണെന്ന് തിരിച്ചറിഞ്ഞാല്‍ എല്ലാവര്‍ക്കും നന്ന്, എന്ന് പറഞ്ഞുകൊണ്ടാണ് അദ്ദേഹത്തിന്റെ ഫെയ്‌സ്ബുക്ക് പോസ്റ്റ് അവസാനിപ്പിക്കുന്നത്.
അധികാരത്തിലെത്താന്‍ മതന്യൂനപക്ഷങ്ങളുടെ വോട്ട് കൂടിവേണമെന്ന തിരിച്ചറിവിന്റെ അടിസ്ഥാനത്തിലാണ് ന്യൂനപക്ഷങ്ങളെ പാര്‍ട്ടിയോട് അടുപ്പിക്കാന്‍ ഷായുടെ നേതൃത്വത്തില്‍ ഇടപെടല്‍ നടന്നത്. അതിനെതിരെയാണ് മാര്‍ കൂറിലോസ് രംഗത്തെത്തിയിരിക്കുന്നത്. എന്തായാലും ബിജെപിയുടെ ശ്രമങ്ങള്‍ അത്ര പെട്ടന്ന് ക്ലച്ച് പിടിക്കില്ലെന്ന് തന്നെയാണ് പ്രതികരണങ്ങള്‍ സൂചിപ്പിക്കുന്നത്.