ബിജുപ്രഭാകര് പോയതോടെ ഭക്ഷ്യ സുരക്ഷ നോക്കുകുത്തി, ഇപ്പോള് 42 തസ്തികകള് കൂടി... സര്വത്ര അഴിമതി
ബിജുപ്രഭാകര് തിരുവനന്തപുരം ജില്ലാകളക്ടറായി ചുമതലയേറ്റതോടെ വെളളാനയായി മാറിയ ഭക്ഷ്യ സുരക്ഷാ വകുപ്പില് 42 ഫുഡ് ഇന്സ്പെക്ടര്മാരുടെ തസ്തികകള് കൂടി അനുവദിച്ച് സര്ക്കാര് കടും വെട്ടിപ്പിന് കൂട്ടുനില്ക്കുന്നു. സ്റ്റാറ്റിയൂട്ടറി അധികാരങ്ങളുളള ഫുഡ്സേഫ്റ്റി കമ്മീഷണറേറ്റില് ഒരു കീഴ് ഉദ്ദ്യോഗസ്ഥനാണ് ഇപ്പോഴത്തെ മേധാവി. എന്എസ്എസിന്റെ നിര്ദ്ദേശപ്രകാരം മന്ത്രി വി.എസ് ശിവകുമാറാണ് അദ്ദേഹത്തെ ഫുഡ് സേഫ്റ്റി കമ്മീഷണറാക്കിയത്.
ഫുഡ് സേഫ്റ്റി കമ്മീഷണര് കേരളത്തില് യഥേഷ്ടം പണം സമ്പാദിക്കാന് സാദ്ധ്യതയുളള ഒരു കേഡര് പോസ്റ്റാണ്. ബിജു പ്രഭാകര് കമ്മീഷണറായിരിക്കെ നിരവധി പദ്ധതികള് നടപ്പിലാക്കുകയും ഫുഡ്സേഫ്റ്റിയെ കുറിച്ച് വിശ്വാസ്യത വര്ധിപ്പിക്കുകയും ചെയ്തിരുന്നു. എന്നാല് തിരുവനന്തപുരം ജില്ലാ കളക്ടറായി അദ്ദേഹം നിയമിതനായതോടെ ഫുഡ്സേഫ്റ്റിക്ക് നാഥനില്ലാതെയായി. ബിജു പോയതോടെ ഭക്ഷ്യസുരക്ഷാ പരിശോധനകള് അവസാനിച്ചു. ഹോട്ടലുകള് തൈക്കാടുളള കമ്മീഷണറേറ്റില് കൃത്യമായി പടി എത്തിച്ചാല് മതിയെന്ന നിയമം കൊണ്ടുവന്നു.
നിമസഭാ മണ്ഡലങ്ങള് തോറും ഫുഡ് സേഫ്റ്റി ഇന്സ്പെക്ടര്മാരെ നിയമിക്കാനാണ് സര്ക്കാര് തീരുമാനം. ഉദ്ദ്യോഗസ്ഥര്ക്കും നിയമസഭാ മണ്ഡലങ്ങള്ക്കും തമ്മില് എന്താണ് ബന്ധമെന്ന് രസികന്മാര് ചോദിക്കുന്നു. 98 തസ്തികകള് ഇപ്പോള് നിലവിലുണ്ട്. ഇതുകൂടാതെയാണ് 42 തസ്തികകള് അനുവദിച്ചിരിക്കുന്നത്. ഇതോടെ ഫുഡ് ഇന്സ്പെക്ടര്മാരുടെ എണ്ണം 140 ആവും.
കേരളത്തിലെ എല്ലാ ഹോട്ടലുകളും റെയ്ഡ് ചെയ്യുമെന്നാണ് വകുപ്പിന്റെ വീരവാദം. ഇതുവരെ ജീവനക്കാര് ഇല്ലാത്തതായിരുന്നു പ്രശ്നം. ഇനി വാഹനം വേണമെന്നാണ് ആവശ്യം. ആവശ്യാനുസരണം വാഹനങ്ങള് കിട്ടിയാല് ഫുഡ് ഇന്പെക്ടര്മാര്ക്കും കുടുംബാംഗങ്ങള്ക്കും തീര്ത്ഥാടനവും വിനോദയാത്രയും കൃത്യമായി നടക്കും.
ഭക്ഷ്യസുരക്ഷ സംബന്ധിച്ച് പലപ്പോഴും രഹസ്യവിവരങ്ങളാണ് ജനങ്ങള് നല്കാറുളളത്. രഹസ്യവിവരം അപ്പപ്പോള് ചോര്ത്തി നല്കാന് വകുപ്പില് തന്നെ സംവിധാനമുണ്ട്. 12 ലക്ഷത്തില് താഴെ വാര്ഷിക വരുമാനമുളളവരുടെ കടയും വ്യാപാര കേന്ദ്രങ്ങളും വര്ഷത്തിലൊരിക്കല് ഭക്ഷ്യസുരക്ഷാ ഉദ്യോഗസ്ഥര് പരിശോധിക്കണമെന്നാണ് ചട്ടം. എന്നാല് ഇത് കടലാസില് കുരുങ്ങുന്നു. ഭക്ഷ്യസുരക്ഷ ഗ്രൂപ്പ് കൂടാതെ നഗരസഭകളിലും ഫുഡ് ഇന്പെക്ടര്മാര് പ്രവര്ത്തിക്കന്നുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
