കൊച്ചിക്കാര്‍ക്കു കൗതുകമായി കറുത്ത വിമാനം. ഫോര്‍ സീസണ്‍സ് എന്ന സ്വകാര്യ ചാര്‍ട്ടര്‍ വിമാനമാണ് നെടുമ്പാശേരിയില്‍ കൗതുകമായത്. വിമാനത്തിന്റെ കറുത്ത നിറമാണ് ഏറ്റവും ആകര്‍ഷണീയമായ വസ്തുത. 80 ധനിക സഞ്ചാരികളാണു വിമാനത്തില്‍ ഉണ്ടായിരുന്നത്. മുംബൈയില്‍ നിന്നെത്തിയ വിമാനത്തിലെ യാത്രക്കാര്‍ രണ്ടു ദിവസം കേരളത്തിലെ പ്രകൃതിഭംഗി ആസ്വദിച്ച ശേഷം ഇന്നലെ വൈകിട്ടാണ് മടങ്ങിയത്. 

യുകെയിലെ ടാഗ് ഏവിയേഷന്റെ ഉടമസ്ഥതയിലുള്ളതാണു ഈ കറുത്ത വിമാനം. നിരന്തരം ലണ്ടനില്‍ നിന്നു പ്രീമിയം വിദേശയാത്രകള്‍ സംഘടിപ്പിക്കുന്ന ചാര്‍ട്ടര്‍ കമ്പനിയാണ് ഫോര്‍ സീസണ്‍സ്. ആദ്യമായാണു ഫോര്‍ സീസണ്‍സ് കേരളത്തിലെത്തുന്നത്. കൊച്ചിയുള്‍പ്പെടെ രാജ്യത്തെ പത്തു പ്രമുഖ വിനോദസഞ്ചാര കേന്ദ്രങ്ങള്‍ സന്ദര്‍ശിക്കും. ബോയിങ് കമ്പനിയുടെ 757-200 വിമാനമാണു ഫോര്‍ സീസണ്‍സ് ഇന്ത്യന്‍ യാത്രയ്ക്ക് ഉപയോഗിച്ചത്. 

80 പേര്‍ക്കു യാത്രചെയ്യന്‍ കഴിയുന്ന ഈ വിമാനത്തിന്റെ നീളം 47 മീറ്ററാണ്. ചിറകറ്റം വരെയുള്ള വീതി 38 മീറ്ററും. ഉയരം 13.6 മീറ്ററുമുണ്ട്. 58,390 കിലോഗ്രാം ആണു വിമാനത്തിന്റെ ഭാരം. 43,490 ലീറ്റര്‍ വരെ ഇന്ധനം നിറയ്ക്കാം. മണിക്കൂറില്‍ 850 കിലോമീറ്റര്‍ വരെ വേഗത്തില്‍ പറക്കാനാകും.ആഡംബരം നിറഞ്ഞതാണ് ഇതിലെ യാത്ര. പ്രീമിയം സഞ്ചാരികള്‍ക്കായി ലോകത്തെ അടുത്തടുത്ത കുറഞ്ഞതു പത്തു സ്‌റ്റേഷനെങ്കിലുമുള്‍പ്പെടുത്തിയുള്ള യാത്രാ പാക്കേജുകളാണ് ഫോര്‍ സീസണ്‍സ് സാധാരണയായി നടത്തുന്നത്. 

കൊച്ചിയില്‍ എത്തുന്ന വിനോദ സഞ്ചാരികളുടെ എണ്ണത്തിലും വര്‍ധനവുണ്ടാകുന്നുണ്ട്. ചാര്‍ട്ടര്‍ വിമാന സര്‍വീസുകള്‍ക്കും സ്വകാര്യ ജെറ്റ് വിമാനങ്ങള്‍ക്കുമായി പ്രത്യേക ടെര്‍മിനല്‍ കൊച്ചി വിമാനത്താവളത്തിലുണ്ട്.