രാജ കുടുംബത്തേയും സര്‍ക്കാരിനേയും നോക്കുകുത്തികളാക്കി സുപ്രീം കോടതിയുടെ സുപ്രധാന ഉത്തരവ്‌. രാജകുടുംബാംഗങ്ങളെ ഒഴിവാക്കി പത്മനാഭസ്വാമി ക്ഷേത്രത്തിന്റെ ഭരണസമിതിയെ സുപ്രീംകോടതി മാറ്റി. തിരുവനന്തപുരം ജില്ലാ ജഡ്ജിയുടെ അധ്യക്ഷതയിലുള്ള അഞ്ചംഗ ഭരണസമിതിയെ ക്ഷേത്രത്തിന്റെ ഭരണം ഏല്‍പ്പിക്കണമെന്ന് സുപ്രീംകോടതി വ്യാഴാഴ്ച്ച പുറത്തിറക്കിയ ഇടക്കാല ഉത്തരവില്‍ വ്യക്തമാക്കി.

അമിക്കസ് ക്യൂറിയുടെ റിപ്പോര്‍ട്ടിലെ സുപ്രധാന നിര്‍ദ്ദേശങ്ങള്‍ അതേപടി അംഗീകരിച്ചാണ് സുപ്രീംകോടതി ഇപ്പോള്‍ ഇടക്കാല ഉത്തരവ് പുറത്തിറക്കിയിരിക്കുന്നത്. ഇതുവരെ ക്ഷേത്രഭരണത്തിന്റെ കടിഞ്ഞാണ്‍ പിടിച്ചിരുന്ന രാജകുടുംബത്തിലെ അംഗങ്ങള്‍ ഒന്നും പുതിയ ഭരണസമിതിയില്‍ ഉണ്ടാകില്ല. പുതിയ ഭരണസമിതിയിലേക്ക് ഓരോ അംഗങ്ങളെ വീതം രാജകുടുംബത്തിനും സംസ്ഥാന സര്‍ക്കാരിനും നിര്‍ദ്ദേശിക്കാമെങ്കിലും അന്തിമ തീരുമാനം കൈക്കൊള്ളുക ഭരണസമിതി അധ്യക്ഷനായിരിക്കും.

ജില്ലാ ജഡ്ജി ഹിന്ദുവല്ലെങ്കില്‍ അഡീഷ്ണല്‍ ജില്ലാ ജഡ്ജിമാരിലെ മുതിര്‍ന്ന ഹിന്ദു മതവിശ്വാസിയായിരിക്കും ക്ഷേത്ര ഭരണസമിതിയുടെ അധ്യക്ഷന്‍. ഗുരുവായുര്‍ ദേവസ്വം ബോര്‍ഡിന്റെ മുന്‍ കമ്മീഷ്ണര്‍ സതീഷ് കുമാര്‍ ഐഎഎസ് ആയിരിക്കും ക്ഷേത്രത്തിന്റെ പുതിയ ചീഫ് എക്‌സിക്യൂട്ടീവ് ഓഫിസര്‍. ക്ഷേത്രാചാരവുമായി ബന്ധപ്പെട്ട തന്ത്രി, തമ്പി എന്നിവരെയും സുപ്രീംകോടതി ഭരണസമിതിയില്‍ ഉള്‍പ്പെടുത്തിയിട്ടുണ്ട്.

സുപ്രീംകോടതിയുടെ ഭാഗത്ത് നിന്നുമുണ്ടായിരിക്കുന്ന മറ്റൊരു സുപ്രധാന നീക്കം വരവ് ചെലവ് കണക്കുകള്‍ പരിശോധിക്കാന്‍ വിനോദ് റായിയെ നിയോഗിച്ചിരിക്കുന്നതാണ്. 2ജി സ്‌പെക്ട്രം അഴിമതി ഉള്‍പ്പെടെയുള്ള നിരവധി സാമ്പത്തിക ക്രമക്കേടുകള്‍ പുറത്ത് കൊണ്ടുവന്ന മുന്‍ സിഎജിയാണ് വിനോദ് റായ്. ക്ഷേത്രവുമായി ബന്ധപ്പെട്ട കഴിഞ്ഞ 25 വര്‍ഷത്തെ വരവ് ചെലവ് കണക്കുകള്‍ പരിശോധിക്കാന്‍ സുപ്രീംകോടതി വിനോദ് റായിക്ക് നിര്‍ദ്ദേശം നല്‍കിയിട്ടുണ്ട്. സ്വര്‍ണക്കടത്ത് ഉള്‍പ്പെടെയുള്ള ആരോപണങ്ങള്‍ക്ക് വിധേയമായ നിലവറകളുടെ താക്കോല്‍ ഭരണസമിതി അധ്യക്ഷന്‍ കൂടിയായ ജില്ലാ ജഡ്ജിയുടെ കൈവശമായിരിക്കും. ഇ, എഫ് നിലവറകളെ മാത്രമാണ് ഇതില്‍ നിന്ന് ഒഴിവാക്കിയിരിക്കുന്നത്. ദൈനം ദിന പൂജകള്‍ക്കുള്ള സാധന സാമഗ്രികള്‍ ഇവിടെയാണ് സൂക്ഷിച്ചിരിക്കുന്നത്. ക്ഷേത്രത്തിലെ കാണിക്ക ആഴ്ച്ചയില്‍ ഒരിക്കല്‍ കണക്കെടുക്കണം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha