മലപ്പുറം, ചങ്ങരംകുളത്ത് പൊലീസ് കസ്റ്റഡിയിലെടുത്ത മാളൂര്‍ സ്വദേശിനി അനീഷ(23)യെ സ്‌റ്റേഷനുള്ളില്‍ മരിച്ചനിലയില്‍ കണ്ടെത്തി. ചങ്ങരംകുളം പൊലീസ് സ്‌റ്റേഷനുള്ളിലെ ഫാനില്‍ തൂങ്ങിയനിലയില്‍ പുലര്‍ച്ചെ അഞ്ച് മണിയോടെയാണ് മൃതദേഹം കണ്ടത്. മോഷണക്കേസില്‍ പൊലീസ് കസ്റ്റഡിയിലായിരുന്നു ഇവര്‍.
രണ്ടുമാസം മുമ്പാണു അനീഷയുടെ പിതാവ് മരണപ്പെട്ടത്. മൂന്നു മാസത്തോളം വിവിധ ആശുപത്രികളില്‍ ചികിത്സയ്ക്കു ശേഷമാണു പിതാവ് മരിച്ചത്. മൂത്തസഹോദരനും കുടുംബവും മറ്റൊരു വീട്ടിലേക്കു താമസം മാറ്റിയിട്ടുണ്ട്. അനുജനും രോഗാതുരയായ മാതാവുമാണ് കുടുംബവീട്ടില്‍ ഇപ്പോള്‍ താമസിക്കുന്നത്.

കഴിഞ്ഞ പത്തൊന്‍പതിനു കുറ്റിപ്പുറത്തിനും എടപ്പാളിനും ഇടയിലുള്ള യാത്രാമധ്യേ പടിഞ്ഞാറങ്ങാടി സ്വദേശിനിയുടെ പത്തു പവന്‍ സ്വര്‍ണവും എ.ടി.എം കാര്‍ഡും നഷ്ടപെട്ടിരുന്നു. മോഷ്ടിക്കപെട്ട കാര്‍ഡ് ഉപയോഗിച്ച് കഴിഞ്ഞ ദിവസം കുറ്റിപ്പുറത്തെ എ.ടി.എം കൗണ്ടറില്‍ നിന്നും 22000 രൂപ പിന്‍വലിച്ചിരുന്നു.

കൗണ്ടറിലെ ക്യാമറയില്‍ പതിഞ്ഞ വീഡിയോയില്‍ നിന്ന് തിരിച്ചറിഞ്ഞാണ് അനീഷയെ ചങ്ങരംകുളം പോലീസ് അറസറ്റ് ചെയ്തത്. ചോദ്യം ചെയ്യലില്‍ സ്വര്‍ണം എടപ്പാള്‍ കുറ്റിപ്പുറം റോഡിലും തൃശ്ശൂര്‍ റോഡിലുമുള്ള കടകളില്‍ വില്‍പന നടത്തിയതായി അനീഷ പറഞ്ഞതായി പോലീസ് അറിയിച്ചു. ഇന്നലെ വൈകിട്ട് തെളിവെടുപ്പ് നടത്തിയിരുന്നു.

രാവിലെ പ്രാഥമിക കര്‍മങ്ങള്‍ക്കു ശേഷം പുറത്തിരുത്തി വനിതാ പോലീസ് ഉദ്യോഗസ്ഥ രതിക ബാത്തുറൂമില്‍ കയറിയ തക്കം നോക്കിയാണു അനീഷ ചുരിദാറിന്റെ ഷാള്‍ ഉപയോഗിച്ച് തൂങ്ങിയത്. ഉടന്‍ തന്നെ ആശുപത്രിയിലെത്തിച്ചെങ്കിലും രക്ഷിക്കാന്‍ സാധിച്ചില്ലെന്നാണ് പോലീസ് പറയുന്നത്. ഇന്ന് രാവിലെ ഇവരുടെ അറസ്റ്റ് രേഖപ്പെടത്താനിരിക്കെയാണ് ദുരൂഹ സാഹചര്യത്തില്‍ അനീഷയുടെ മൃതദേഹം കാണപ്പെട്ടത്.

അതേസമയം, തന്നെ അനീഷയ്ക്കു തൂങ്ങിമരിക്കേണ്ട സാഹചര്യമുണ്ടെന്നു വിശ്വസിക്കാന്‍ നാട്ടുകാര്‍ക്കു ബുദ്ധിമുട്ടുണ്ട്. മൃതദേഹത്തില്‍ മര്‍ദ്ദനമേറ്റ പാടുകളുണ്ടെന്നും റിപ്പോര്‍ട്ടുണ്ട്.

സംഭവത്തില്‍ ചങ്ങരംകുളം പൊലീസ് സ്റ്റേഷനിലെ എഎസ്ഐ തിലകന്‍, പൊലീസുകാരായ ഗിരീഷ്, ലതിക എന്നിവരെയാണ് അന്വേഷണ വിധേയമായി സസ്പെന്‍റ് ചെയ്തത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha