സുനിക്ക് ദിലീപ് ക്വട്ടേഷന്‍ നല്‍കിയത് നേരിട്ടാണെന്നും നടിയുടെ ചിരിക്കുന്ന മുഖവും വിവാഹ നിശ്ചയ മോതിരവും ദൃശ്യങ്ങളില്‍ വേണമെന്ന് ദിലീപ് നിര്‍ബന്ധം പിടിച്ചെന്നും പൊലീസ് പറയുമ്പോള്‍ അത് സാധൂകരിക്കുന്നതാണ് പിടിച്ചെടുത്ത വിഡീയോ. ഈ തെളിവാണ് ദിലീപിന് എതിരെ ഏറ്റവും നിര്‍ണ്ണായകമാകുന്നത്. പള്‍സര്‍ സുനിയുടെ മൊഴിയും വിഡീയോയും തമ്മിലുള്ള സാദൃശ്യവുമാണ് ദിലീപിനെ വെട്ടിലാക്കിയത്. ചോദ്യം ചെയ്യലില്‍ ദിലീപ് ഇതെല്ലാം സമ്മതിക്കുകയും ചെയ്തു. ദൃശ്യങ്ങള്‍ ഏറ്റുവാങ്ങിയത് മാഡമാണ്. ഈ മാഡത്തേയും പൊലീസിന് വ്യക്തമായി അറിയാം. അവരേയും ഉടന്‍ അറസ്റ്റ് ചെയ്യും.

താര സംഘടനയായ 'അമ്മ'യുടെ സ്‌റ്റേജ് ഷോയുടെ റിഹേഴ്‌സല്‍ ക്യാംപിനിടയില്‍ മോശം പെരുമാറ്റത്തെ പരസ്യമായി ചോദ്യം ചെയ്ത നടിയുടെ നടപടിയാണ് നടിയെ ഉപദ്രവിക്കാനുള്ള ദിലീപിന്റെ തീരുമാനത്തിനു വഴിയൊരുക്കിയത്. വാക്കേറ്റം നിയന്ത്രിക്കാന്‍ മറ്റു നടീനടന്മാര്‍ ഇടപെട്ടിരുന്നു. ഈ ക്യാംപിനിടയിലാണ് നടിയുടെ നഗ്‌ന ദൃശ്യങ്ങള്‍ പകര്‍ത്താന്‍ ദിലീപ് പദ്ധതിയിട്ടതെന്നു പൊലീസ് ആരോപിക്കുന്നു. ഇതിനായി പള്‍സര്‍ സുനിയെ ദിലീപ് നിയോഗിച്ചതും ഇതേ ക്യാംപില്‍ വച്ചാണ്. ഇതിനായി ഒന്നരക്കോടി രൂപയും ദിലീപിന്റെ സിനിമകളില്‍ അഭിനയിക്കാനുള്ള അവസരവും വാഗ്ദാനം ചെയ്തു. നഗ്‌നദൃശ്യങ്ങള്‍ യഥാര്‍ഥമാണെന്നു പരിശോധിച്ചു ബോധ്യപ്പെട്ടാല്‍ മാത്രമേ പണം തരികയുള്ളൂവെന്നും ദിലീപ് പറഞ്ഞിരുന്നു.

എന്നാലിപ്പോള്‍ ദിലീപിന്റെ അറസ്റ്റിനു ശേഷം കാവ്യാ മാധവന്‍, അമ്മ ശ്യാമള, തമ്മനത്തെ ഫ്‌ലാറ്റിലെ നടി എന്നിവരാണ് സംശയ നിഴലില്‍. ഇതില്‍ കാവ്യയല്ലെ ദൃശ്യം വാങ്ങിയതെന്ന് പൊലീസ് സ്ഥിരീകരിക്കുന്നു. എന്നാലും കേസില്‍ കാവ്യയും പ്രതിയാകാന്‍ സാധ്യതയുണ്ട്. കുറ്റകൃത്യത്തെ കുറിച്ച് നേരത്തെ കാവ്യയ്ക്ക് അറിയാമോ എന്നതാണ് ഇനി നിര്‍ണ്ണായകം. അമ്മ ശ്യാമളയും പ്രതിയാകാന്‍ സാധ്യത വളരെ കൂടുതലാണ്. പള്‍സര്‍ സുനിക്ക് രണ്ട് ലക്ഷം രൂപ നല്‍കിയത് ശ്യാമളയുടെ അറിവോടെയാണോയെന്ന സംശയം പൊലീസിനുണ്ട്. ഇതെല്ലാം സ്ഥിരീകരിച്ചാല്‍ ദിലീപിനൊപ്പം കാവ്യയും അമ്മയും അഴിക്കുള്ളിലാകും. പള്‍സര്‍ സുനിയുടെ കാമുകിയുടെ സുഹൃത്തായ യുവ നടിയും കടുത്ത പ്രതിസന്ധിയിലാണ്. ഇവരുടെ നീക്കമെല്ലാം പൊലീസ് പരിശോധിക്കുന്നുണ്ട്.

കാവ്യയുടെയും അമ്മയുടേയും പങ്കാളിത്തത്തിന്റെ സൂചനയാണ് കാക്കനാട് കാവ്യയുടെ സ്ഥാപനത്തില്‍ നടന്ന പൊലീസ് റെയ്ഡിനെ കണക്കാക്കുന്നത്. ഇവരുടെ പങ്ക് തെളിഞ്ഞാല്‍ കൂടുതല്‍ കുരുക്ക് മുറുകുമെന്നാണ് റിപ്പോര്‍ട്ടുകള്‍. ഗൂഢാലോചനയില്‍ പങ്കുണ്ടെന്ന് സംശയിക്കുന്ന ഒരു നടിയെ കേന്ദ്രീകരിച്ചും അന്വേഷണം നടക്കുന്നുണ്ട്. ഈ നടിയുടെ തമ്മനത്തെ ഫ്‌ളാ്റ്റില്‍ പൊലീസ് പരിശോധന നടത്തിയിരുന്നു. ഇവരെക്കൂടാതെ മറ്റേതെങ്കിലും സ്ത്രീകള്‍ക്ക് ആക്രമണത്തിന്റെ ഗൂഢാലോചനയില്‍ പങ്കുണ്ടോയെന്നും പൊലീസ് അന്വേഷിക്കുന്നുണ്ട്. അതിനിടെ മാഡം എന്ന് വിളിക്കുന്ന സ്ത്രീകഥാപാത്രത്തിന്റെ അറസ്റ്റ് ഒഴിവാക്കുന്നതിന് ദിലീപ് കീഴടങ്ങുകയായിരുന്നെന്നും സൂചനയുണ്ട്. 

ദിലീപ് അറസ്റ്റിലായില്ലായിരുന്നെങ്കില്‍ പകരം മാഡം അറസ്റ്റിലാകുമെന്ന അവസ്ഥയുണ്ടായി. ഇതാണ് ദിലീപ് അറസ്റ്റ് വരിക്കാന്‍ തയ്യാറായതെന്നാണ് റിപ്പോര്‍ട്ട്. ദൃശ്യം കൃത്രിമം അല്ലെന്നു ദിലീപിനെ ബോധ്യപ്പെടുത്താന്‍ നടിയുടെ മുഖം, കഴുത്ത്, മോതിര വിരല്‍ എന്നിവ സൂക്ഷ്മമായി ചിത്രീകരിച്ചിട്ടുണ്ട്. ഇതു ദിലീപിനെതിരെ സുനില്‍ നല്‍കിയ മൊഴികളുമായി പൊരുത്തപ്പെടുന്നുണ്ട്. 

ജയിലിനുള്ളില്‍ നിന്നു സുനി പുറത്തേക്കു വിളിച്ച ഫോണിന്റെ ലൊക്കേഷന്‍ ജയിലിനു സമീപത്തെ ടവറിനു കീഴിലാണ്. ഇതേ ഫോണില്‍ നിന്നാണു ദിലീപിന്റെ അടുത്ത സുഹൃത്ത് നാദിര്‍ഷാ, ഡ്രൈവറും മാനേജരുമായ അപ്പുണ്ണി എന്നിവരെ തുടര്‍ച്ചയായി വിളിച്ചത്. കുറ്റകൃത്യത്തിനു ശേഷം ദൃശ്യങ്ങള്‍ ദിലീപിന്റെ അടുത്ത ബന്ധുവിന്റെ പക്കല്‍ ഏല്‍പിച്ചിട്ടും നേരത്തേ പറഞ്ഞുറപ്പിച്ച പ്രതിഫലം ലഭിക്കാതിരുന്നതു സുനിയെ പ്രകോപിപ്പിച്ചു. ഇതാണു ജയിലിനുള്ളില്‍ നിന്നുള്ള ഫോണ്‍ വിളികള്‍ക്കു വഴിയൊരുക്കിയത്. സുനി ഇക്കാര്യം പറയാന്‍ അപ്പുണ്ണിയെ വിളിച്ചപ്പോഴെല്ലാം സമീപം ദിലീപുണ്ടായിരുന്നതിന്റെ തെളിവുകളും ലഭിച്ചെന്ന് അന്വേഷണ സംഘം വ്യക്തമാക്കുന്നു.

 
ഈ തെളിവും ദിലീപിന് വിനയായി. തന്റെ ഫോണില്‍ സംസാരിച്ചത് ദിലീപാണെന്ന് അപ്പുണ്ണിയും മൊഴി നല്‍കിയിട്ടുണ്ടെന്നാണ് സൂചന. മൂന്നു മിനിട്ട് ദൈര്‍ഘ്യമുള്ള വീഡിയോയാണ് ദിലീപ് പള്‍സര്‍ സുനിയോട് ആവശ്യപ്പെട്ടത്. മൂന്ന് മിനുട്ട് ദൈര്‍ഘ്യമുള്ള വീഡിയോക്കാണ് ഒന്നരക്കോടി ക്വട്ടേഷന്‍ നല്‍കിയത്. ക്വട്ടേഷന്റെ ഭാഗമായി പതിനായിരം രൂപ അഡ്വാന്‍സും നല്‍കി. ദിലീപും മഞ്ജുവാര്യരും തമ്മിലുള്ള വിവാഹബന്ധത്തില്‍ വിള്ളല്‍ വീഴ്ത്തിയതും കാവ്യാമാധവനുമായുള്ള ബന്ധം പ്രചരിപ്പിച്ചതുമാണ് നടിക്ക് ക്വട്ടേഷന്‍ നല്‍കാനുള്ള ഗൂഢാലോചനയിലേക്ക് ദിലീപിനെ എത്തിച്ചത്. ക്വട്ടേഷന്‍ നല്‍കിയത് ദിലീപ് നേരിട്ടാണെന്നും പൊലീസ് പറയുന്നു.