അതിരപ്പള്ളി വിഷയത്തില്‍ സിപിഐയ്‌ക്കെതിരെ രൂക്ഷ വിമര്‍ശനവുമായി വൈദ്യുത മന്ത്രി എംഎം മണി. അതിരപ്പള്ളി ജലവൈദ്യുത പദ്ധതിയെ സിപിഐ എതിര്‍ക്കുന്നത് വിവരക്കേടു കൊണ്ടാണെന്നും പദ്ധതി നടപ്പിലാക്കാന്‍ തന്നെയാണ് സിപിഐഎമ്മിന്റെയും കെഎസ്ഇബിയുടേയും തീരുമാനമെന്നും എംഎം മണി വ്യക്തമാക്കി. എല്ലാവര്‍ക്കും വൈദ്യുതിയും എസിയും വേണമെന്നും മണി കൂട്ടിച്ചേര്‍ത്തു. അതിരപ്പള്ളി പദ്ധതി വിഷയത്തില്‍ സിപിഐഎമ്മും സിപിഐയും തുടക്കം മുതല്‍ ഇരുചേരികളാണ്.
കാനം രാജേന്ദ്രന്‍ ജില്ലാ സെക്രട്ടറിമാരെക്കൊണ്ട് സര്‍ക്കാരിനെതിരെ പറയിപ്പിച്ച് ഇതു പിന്നീട് പാര്‍ട്ടി നിലപാടെല്ലെന്ന് പറഞ്ഞ് കൈകഴുകുമെന്നും എംഎം മണി പറഞ്ഞു. അതിരപ്പള്ളി പദ്ധതിയ്‌ക്കെതിരെ ഇപ്പോള്‍ വിമര്‍ശനമുന്നയിക്കുന്ന കോണ്‍ഗ്രസ് ഭരണത്തിലായിരുന്നപ്പോള്‍ എന്തുകൊണ്ട് പദ്ധതി വേണ്ടെന്നു വച്ചില്ലെന്നും എംഎം മണി ചോദിച്ചു.
അതിരപ്പിള്ളി വിഷയത്തില്‍ വൈദ്യുതി മന്ത്രി എംഎം മണിക്കെതിരെ സിപിഐ നേതാവും മുന്‍ മന്ത്രിയുമായ ബിനോയ് വിശ്വം രംഗത്തെത്തിയിരുന്നു. അതിരപ്പള്ളി പദ്ധതിയുമായി മുന്നോട്ട് പോകാന്‍ ആര്‍ക്കും കഴിയില്ലെന്ന് നേരത്തെ ബിനോയ് വിശ്വം വ്യക്തമാക്കിയിരുന്നു. അതിരപ്പിള്ളി ജലവൈദ്യുത പദ്ധതി നടപ്പാക്കാനിവില്ലെന്ന് വിഎസ് അച്യുതാനന്ദനും പറഞ്ഞിരുന്നു. അതിരപ്പിള്ളി പദ്ധതി നടപ്പാക്കാന്‍ ഇടതുമുന്നണി തീരുമാനിച്ചിട്ടില്ലെന്നും ഏകപക്ഷീയമായി പദ്ധതി നടപ്പാക്കാന്‍ സര്‍ക്കാരിന് കഴിയില്ലെന്നുമാണ് വിഎസ് പറഞ്ഞത്.
അതിരപ്പിള്ളി ജലവൈദ്യുത പദ്ധതി ഉപേക്ഷിച്ചിട്ടില്ലെന്ന് വൈദ്യുതി മന്ത്രി എംഎം മണിയുടെ പ്രസ്താവനയോടെയാണ് വിഷയം വീണ്ടും സജീവമാകുന്നത്. അതിരപ്പള്ളി വിഷയത്തില്‍ തീരുമാനത്തിലെത്താന്‍ യുഡിഎഫിനും ഇതുവരെ സാധിച്ചിട്ടില്ല. പരിസ്ഥിതി കോട്ടം തട്ടാതെ സമവായത്തിലൂടെ അതിരപ്പള്ളി വിഷയത്തില്‍ പരിഹാരം കാണമെന്നാണ് മുന്‍ മുഖ്യമന്ത്രി ഉമ്മന്‍ ചാണ്ടി പറഞ്ഞത്.