ഓണം സ്‌പെഷ്യല്‍ ഭക്ഷ്യ സാധനങ്ങള്‍ വാങ്ങാന്‍ റേഷന്‍ കടയിലെത്തിയവര്‍ക്ക് സാധനം ലഭിക്കാതെ മടങ്ങേണ്ടി വന്ന സംഭവം അട്ടിമറിയാണെന്ന് സംശയം. ഭക്ഷ്യവകുപ്പിലെ ചില ഉന്നതര്‍ക്ക് റേഷന്‍ അട്ടിമറിയില്‍ പങ്കുണ്ടെന്ന സംശയത്തിന്റെ പേരില്‍ സര്‍ക്കാര്‍ അന്വേഷണം തുടങ്ങി. ഭക്ഷ്യവകുപ്പിലെ ചില ഉന്നതരുടെ തല തെറിക്കുമെന്ന് ഇതോടെ ഉറപ്പായി.

5 കിലോ അരി, ഗോതമ്പ്, ആട്ട എന്നിവ നിലവിലെ വില അനുസരിച്ചും ഒരു കിലോ പഞ്ചസാര 22 രൂപക്കും ലഭിക്കും എന്ന മൊബൈല്‍ സന്ദേശമാണ് റേഷന്‍ കാര്‍ഡ് ഉടമകള്‍ക്ക് ലഭിച്ചത്. മൂന്നിനോ മുമ്പോ വാങ്ങണമെന്നാണ് സന്ദേശം ലഭിച്ചത്.

നന്നായി പ്രവര്‍ത്തിക്കുന്ന മന്ത്രിയാണ് തിലോത്തമന്‍. ബഹളങ്ങള്‍ക്കും പബ്‌ളിസിറ്റിക്കും നില്‍ക്കാതെ തന്റെ ജോലി ചെയ്യുന്ന തിലോത്തമനെ സംബന്ധിച്ചടത്തോളം ഇത്തവണത്തെ ഓണത്തിന് ഒരു മുട്ടും വരരുതെന്ന നിര്‍ബന്ധമുണ്ടായിരുന്നു. പോയ കാലത്തിന്റെ നന്മ തിരികെ കൊണ്ടുവരാനാണ് തിലോത്തമന്‍ ശ്രമിച്ചത്. ചരക്കു സേവന നികുതി ഏല്‍പ്പിച്ച ആഘാതം മറികടക്കാനാണ് അദ്ദേഹം ശ്രമിച്ചത്. ഒരാള്‍ പോലും പട്ടിണി കിടക്കരുതെന്ന ലക്ഷ്യം മുന്നില്‍ കണ്ടാണ് ഭക്ഷ്യമന്ത്രി മുന്നോട്ട് പോയത്.

എന്നാല്‍ സംഭവിച്ചത് തിരിച്ചാണ്. എല്ലാ നല്ല ശ്രമങ്ങളെയും ചിലര്‍ തകര്‍ത്തു. അവര്‍ സര്‍ക്കാര്‍ പദ്ധതി മുഴുവന്‍ അട്ടിമറിച്ചു. മൊബൈല്‍ സന്ദേശം കണ്ട് റേഷന്‍ കടയിലെത്തിയവര്‍ സാധനം കിട്ടാതെ ഇളിഭ്യരായി മടങ്ങി. അവര്‍ മന്ത്രിയെയും മന്ത്രിസഭയെയും പ്രാകി.

ഇത്തവണത്തെ ഓണത്തിന് ഏറ്റവും നന്നായി പ്രവര്‍ത്തിച്ചത് ഭക്ഷ്യവകുപ്പാണെന്ന ഖ്യാതിക്ക് ഒരു കാതം മുന്നേയാണ് ചിലര്‍ സകലതും അട്ടിമറിച്ചത്. റേഷന്‍ സാധനങ്ങള്‍ കടകളിലെത്തിയെന്ന് ഉറപ്പാക്കിയ ശേഷമാണ് മൊബൈല്‍ സന്ദേശം നല്‍കിയതെന്ന് മന്ത്രി പറയുന്നു. പിന്നീട് എന്താണ് സംഭവിച്ചതെന്ന് മന്ത്രിക്ക് മനസിലായിട്ടില്ല. എന്നാല്‍ പത്തു ദിവസമായി തുടരുന്ന റേഷന്‍ വിതരണം ഒടുവിലത്തെ ദിവസം തീര്‍ന്നു എന്നാണ് സപ്ലൈകോ എം.ഡി മുഹമ്മദ് ഹനീഷ് പറഞ്ഞത്. എം.ഡിയുടെ പ്രസ്താവനയില്‍ മന്ത്രിക്ക് അതൃപ്തിയുണ്ടെന്നറിയുന്നു. ഓണം കഴിഞ്ഞാലുടന്‍ നടപടി ഉണ്ടാകുമെന്ന് ഉറപ്പായി.

സംഭവത്തിനു പിന്നില്‍ രാഷ്ട്രീയമുണ്ടോ എന്നും സര്‍ക്കാര്‍ അന്വേഷിക്കുന്നുണ്ട്.