വിഘ്‌നേഷ് സംവിധാനം ചെയ്യുന്ന 'ലൗ ഇന്‍ഷുറന്‍സ് കമ്പനി' എന്ന ചിത്രത്തിന്റെ ഓഡിയോ ലോഞ്ച് വേദിയില്‍ സര്‍പ്രൈസ് എന്‍ട്രി നടത്തി നയന്‍താര. ഇന്നലെ നടന്ന ചടങ്ങിലാണ് നയന്‍താര എത്തിയത്. ആരാധകര്‍ക്ക് മാത്രമല്ല വിഘ്‌നേഷിനും ഇത് ഒരു സര്‍പ്രൈസ് ആയിരുന്നു. സിനിമയിലെ നിര്‍മാതാവ് കൂടിയായ നയന്‍താരയെക്കുറിച്ച് വിഘ്‌നേഷ് പറയുന്നതിനിടെയാണ് നയന്‍താര സ്‌റ്റേജിലേക്ക് വരുന്നത്.പ്രദീപ് രംഗനാഥന്‍ നായകമായെത്തുന്ന ചിത്രം ഏപ്രില്‍ പത്തിനാണ് തിയേറ്ററുകളില്‍ എത്തുന്നത്.

'ഈ സിനിമയുടെ മലേഷ്യ ഷെഡ്യൂളിന് പോകുന്ന സമയത്താണ് ഒരു വലിയ പ്രശ്‌നം നടക്കുന്നത്. ഒടിടി മാര്‍ക്കറ്റ്എല്ലാം തകര്‍ന്ന സാഹചര്യമായിരുന്നു. കോസ്റ്റ് കുറയ്ക്കണമെന്ന ചര്‍ച്ച വന്നു. പക്ഷേ എന്റെ മനസില്‍ കണ്ടതുപോലെ ഈ സിനിമ ഷൂട്ട് ചെയ്യണമെന്ന് വലിയ ആഗ്രഹമായിരുന്നു. അങ്ങനെ സാമ്പത്തികമില്ലാതിരുന്നിട്ടും മലേഷ്യയിലേക്ക് പോയി ചിത്രീകരണം തുടങ്ങി. അന്ന് എന്നെ സഹായിച്ചത് ഭാര്യ നയന്‍താരയാണ്.

മൂക്കുത്തി അമ്മന്‍ എന്ന സിനിമയ്ക്ക് വാങ്ങിയ അഡ്വാന്‍സ് ആണ് എനിക്ക് അയച്ചുതന്നത്. ഇങ്ങനെ എന്റെ ഭാര്യ നയന്‍താര എനിക്ക് വലിയ പിന്തുണയാണ് നല്‍കുന്നത്. പക്ഷേ നയന്‍താരയ്ക്ക് ഓഡിയോ ലോഞ്ചിനൊന്നും വരുന്നതില്‍ താല്‍പര്യമില്ല. ഓഡിയോ ലോഞ്ചിന് ഇന്ന് വന്നിട്ടുണ്ട്. സ്‌റ്റേജിന്റെ പുറകില്‍ ഇരിപ്പുണ്ട് എന്ന് തോന്നുന്നു. ഇവിടെ ഉണ്ടെങ്കില്‍ ആരെങ്കിലും പോയി അവരെ സ്‌റ്റേജിലേക്ക് കൂട്ടിക്കൊണ്ട് വരാമോ? നടിയായ നയന്‍താരയെ ഓഡിയോ ലോഞ്ചിന് കൊണ്ടുവരാനുള്ള ശേഷി എനിക്കില്ല. പക്ഷേ ഒരു ഭാര്യയായോ നിര്‍മാതാവായോ വരാന്‍ കഴിയുമെങ്കില്‍ വരിക. ചിലപ്പോള്‍ പോയി കാണും' ഇങ്ങനെ വിഘ്‌നേഷ് പറയുമ്പോഴാണ് നയന്‍താര സ്‌റ്റേജിലേക്ക് എത്തുന്നത്.